Kwiyanga kubwo gukurikira Yesu.


MARIKO 8: 34
Ahamagara abantu n’abigishwa be arababwira ati"Umuntu nashaka kunkurikira niyiyange, yikorere umusaraba we ankurikire,
35kuko ushaka kurengera ubugingo bwe azabubura, kandi utita ku bugingo bwe ku bwanjye no ku bw’ubutumwa bwiza azabukiza.Matayo 10:38
Kandi utikorera umusaraba we ngo ankurikire, ntakwiriye kuba uwanjye.

Gukurikira Yesu neza bisaba kwiyanga cyangwa kwiyibagirwa. Ntushobora kuba umwigishwa wa Yesu wikunda; utuntu twose witaga utwawe uratuzinukwa. Ntuba ukigenda nkuko abapagani bagenda cyangwa ngo ukore nk’ibyabo, kuko Yesu niwe kitegererezo.

Gukizwa ni ugutandukana n’ubupagani ku buryo abakureba bose babonako wahindutse rwose, ukareka ibyari inyungu yawe kubera umusaraba wa kristo.

Ugeze ku musaraba bakwambura imyambaro y’ubushwambagara, bakakwambika umwambaro mushya, ukubuza gukurikiza imigambi y’ababi, guhagarara mu nzira y’abanyabyaha, no kwicarana n’abakobanyi.

Uwageze ku musaraba ntiyigishwa uko avuga, agenda, yicara, yambara asokoza,....kuko ku musaraba mwiza ahasanga umwigisha icyo akwiriye gukora. Amakuru yo ku musaraba ntawayakwigisha ahubwo bisaba kwigerayo ukabyigishirizwayo.

Kwiyanga biva ku rukundo ukunda Yesu; kuko ushaka kurengera ubugingo bwe azabubura, kandi utita ku bugingo bwe ku bwa Yesu no ku bw’ubutumwa bwiza azabukiza (Mariko 8:35); kandi nta waba umusirikare, ngo yishyire mu by’ubu bugingo, ngo abe akinejeje uwamwandikiye ubusirikare(2 Timoteyo 2:4)

Ibyo ureka byose singombwa ko abandi bantu babibonako ari icyaha, ahubwo ukomeza kugenda uko wahamagawe; ukirinda kubera inkomyi ubutumwa bwiza.

Uwiyanze ngo akurikire Yesu, ntacyo agundira, areka byose byatuma mwenese agwa akava mu byizerwa, naho we ataba ariko abibona.

Yesu ntiyavuzeko bazatumenyera kubyo dukora cyangwa tuvuga ahubwo yavuze ko bazatumenyera ku mbuto.

Mugeni wa Yesu irinde, we kugundira iby’isi, ahubwo uzirikane ko waguzwe amaraso y’igiciro cyinshi, uzinukwe iby’inzaduka, bishaka kugukura mu gakiza wahawe ku bw’ubuntu. Amen
[email protected]