Kwihana kuticuzwa

2ABAKORINTO 7.1-10
10.Agahinda ko mu buryo bw’Imana gatera kwihana kuticuzwa, na ko kukazana agakiza, ariko agahinda ko mu buryo bw’isi gatera urupfu.

Ntabwo bishoboka ko watandukana n’icyaha utabanje kugira agahinda ko mu buryo bw’Imana (ngo wumve ubabajwe n’intege nke wagize ugatukana, ukabeshya, ugafata ibyo utagenewe, ugasambana, n’ibindi), maze ngo kagutere kwihana kuticuzwa, ibyo iyo bitabayeho, gutandukana n’icyaha ntibishoboka.

Kuko aka gahinda ni ko gatuma watura, kandi kwatura kwiza ni ukwerura, ukanamiza, ukemera ko uri umunyabyaha; icyaha ukacyiyumvisha neza maze ukagiha uburemere bwayo, ntugisasire ngo ubanze ukimaremo ubukana, ucyumvikanisha nk’aho bwari uburenganzira bwawe.kuko burya ikintu cyakubuza ubugingo kiba kiremereye cyane, ni yo mpamvu uba ugomba kugitinya kurusha uko utinya ikindi kintu icyaricyo cyose.

Agahinda ko mu buryo bw’Imana rero ni ko gatera umuntu kwihana amaramaje rwose, ku buryo adashobora gusubira inyuma ngo yicuze impamvu yihannye, burya kuba wakoroshya icyaha cyo kuriganya, gusambana, cyangwa kugambana, n’ibindi by’hanyuma wajya kubyatura ukavuga ngo Imana ikubabarire intege nke, uku kuba ari ukwiyerurutsa.

_Aka gaciro gake abantu baha ibyaha ni ko gatuma babasha no kubikorana umurimo w’Imana bikabashobokera, kuko baba biyumvisha ko nta cyo bitwaye, kandi burya kuko ibiva mu muntu ari byo bimuhumanya (Mariko 7.20), ni yo mpamvu umuntu atabasha kwezwa by’ukuri iyo kwatura kwe kutakozwe neza.

Igikorwa cyo kwatura rero ni ingenzi cyane kandi nticyoroshye, kuko ari urugamba rwo kwirwanya rubera imbere mu mutima, umuntu akemera kwicisha bugufi cyane akigaragaza uko ari abandi batazi kugira ngo akizwe, arokore ubugingo bwe (Yakobo 5.16)

Ingaruka ziva mukutihana neza,ni nyinshi ndetse amaherezo ni ukujya mu irimbukiro,ariko ingaruka, zo kwihana neza, ni ugukiza ubugingo bwawe, ukazimana na data ingoma y’amahoro.
Imana itugwirize, imbaraga zo guca bugufi byo mu mutima, no kugira agahinda ko mu buryo bw’umwuka, gatera umuntu kwihana, kuticuzwa.

[email protected]