Kwihana ibyaha / Ev. François NTAKIRUTIMANA

“Kandi ko kwihana no kubabarirwa ibyaha bikwiriye kubwirwa amahanga yose mu izina rye, bahereye kuri Yerusalemu.”( Luka 24:47)

Kwihana ni imyemerere ikomeye ya Bibiliya ku bantu bakijijwe, no ku batarakizwa bose bakeneye kwihana. Kwihana bivuga guhindukira ukava mu byaha cyangwa guhindura imitekereze n’imyumvire ipfuye, ugahindukirira Imana.

Kuva mu itangiriro kugeza mu byahishuwe tugenda tubona ingero z’ abavugabutumwa bihanishaga ibyaha ari bo:

1.Henoki niwe muvugabutumwa wa mbere wihanishaga .(Yuda 1:14-15 )

2.Nowa yazanye ivugabutumwa ryo gukiranukira Imana .(2 Petero 2:5)

3.Yona mu kuvuga ubutumwa kwe abantu benshi barenga miliyoni barahindukira bihana ibyaha bemera inzira y’agakiza. (Yona 3:4,9)

4. Umuhanuzi Ezekiyeli

5.Yohana umubatiza. (Matayo 3:2-7)

6. Petero abwiriza ijambo ryo kwihana ku munsi wa pentekoti. (Ibyakozwe n’intumwa 2:38)

7.Pawulo yabwirizaga ijambo ryihanisha riganisha ku gakiza mu ngendo zose yagize z’ivugabutumwa .

Kwihana :
-Si ukumva ugize ikimwaro: Benshi hari igihe bumva bafite ikimwaro cy’ibyaha bakoze ariko ntibakizwe .Urugero nka Feliki aratinya cyane ariko ntiyakizwa Ibyakozwe 24:25.

-Si ukumva ubabajwe n’ igihano cy’ibyaha: Abantu benshi bababara batabitewe n’ibibi bakoze ahubwo babitewe n’ ingaruka z’ibibi bakoze . Urugero, Dawidi yagiraga umutima Imana ikunda kuko yagiraga umutima ubabazwa n’ibibi yakoze akarizwa na byo akabisabira imbabazi .

- Si ugushaka kuba umuntu mwiza ( imfura)
: Abantu benshi bashakisha ingufu zabo kuba abantu beza bagahindura ubuzima bari babayemo ariko nta muzi wo gukiranuka bafite .Ibyo ntabwo ari ukwihana Imana ishaka .

-Si ukuba umunyedini : Abafarisayo bari abanyedini ku rwego rwo hejuru bariyirizaga, bakanasenga ariko ntibigeraga bihana.

Yesu yatubwiye ko kwihana no gukiranuka kwacu nikutaruta ukw’abanditsi n’ Abafarisayo ,tutazinjira mu bwami bw’Imana.

Aha ni ho abantu benshi bapfiriye. Kujya mu rusengero ntibisobanura ko wihannye, wakijijwe. Urugero: Iyo ugiye mu mahanga uri kumwe n’abazungu uvuga neza icyongereza nk’Abanyamerika ntibivuze ko uri Umunyamerika. Kuba uririmba, ukavuga ubutumwa ariko utaragera ku rwego rwo kwihana ukamenekera Imana ntuba uragakizwa.

-Si ukumenya ukuri : Kuba ufite ubumenyi cg inararibonye uzi ukuri ,ntibihagije ko twemera ko ukuri uzi kwabaye ubuzima niba utarahindutse ngo wihane. (Abaroma10:10 ).

Kwihana icyo aricyo :

1. Gusaba imbabazi Imana kubw’ibyaha wakoze n’umutima imenekeye Imana.( Zaburi 51)

2.Kubwiza Imana ukuri ibyaha byawe .(Zaburi 32:5)

3.Guhindukira ukava mu byaha.( Imigani 28:13)

4.Kumva wanze ibyaha .(Abaheb1:9 )

5.Niba bishoboka gusubiza ibyo wambuye .(Luka 19:8)

Imana iduhe kugira umutima umenetse kugira ngo dukore ibiyitunganiye.
Amen

François @Agakiza.org