Kuki hari amasengesho Imana idasubiza?

Isengesho ni inzira ya bugufi ihuza Imana n’abantu, ni ibiryo bitunga abakristo.Ni igice cy’ingenzi ku buzima bw’abakurikiye Kristo, ikigeretseho ni inzira ituma baganira n’Imana ibakunda, ihora ibashakira ibyiza. Imana yifuza ko abantu bamenya gusenga kugirango bakomeze bagirane ubusabane.

Birashoboka cyane ko umuntu asenga ariko ntabone icyo yasabye, birashoboka rwose gusenga wizeye ariko ntubone icyo wasengeye kandi tuzi ko Yesu yavuze ko ibyo tuzasaba twizeye tuzabihabwa byose.( Matayo21:22).

Abakristo bakwiye kumenya ko Imana yumva amasengesho y’abayisaba bizeye ariko kandi bagasobanukirwa n’amasengesho idashobora kumva(irayumva ariko ntishobora gutanga icyo mwasabye).

Aya ni amwe mu masengesho Imana idashobora gusubiza:

1. Isengesho ryo kwiyemera

Mu butumwa bwiza bwa Luka, hatubwira inkuru y’Umufarisayo n’umukoresha w’ikoro.Umufarisayo yagaragaje kwikuza avuga ko atari umunyabyaha ko ahubwo akiranuka nyamara ariwe munyabyaha kurusha abandi. Umukoresha w’ikoro we yaciye bugufi yemerako ari umunyabyaha asaba Imana kumubabarira.

Yesu yavuze ko uwo mukoresha w’ikoro ariwe watsindishirijwe kuruta wa wundi, avugako uwishyira hejuru azacishwa bugufi n’uwicisha bugufi agashyirwa hejuru.(Luka 18:9-14).

Uko ni ko Imana idasubiza amasengesho dusengana ubwirasi, ahubwo ikumvira abafite umutima umenetse, bayisaba kubabarirwa ibyaha byabo.

2. Isengesho ry’irari

“Murasaba ntimuhabwe kuko musaba nabi mushaka kubyayisha irari ryanyu ribi”.(Yakobo 4: 3 ).
Muri iyi minsi abakristo ntibakimenya gusenga ngo basabe ibyatunga ubugingo bwabo , ahubwo basaba ibijyanye n’ibyo imibiri yabo yifuza, uko niko Imana itigera isubiza amasengesho y’ubwikunde, kuko anyuranyije n’ibyo ishaka.

3.Isengesho risubiwemo.

Abantu benshi bakunze gusenga batekerezako Imana itumvise amasengesho yabo bityo bakayavuga bayasubiramo inshuro nyinshi. Amasengesho asubiwemo nta kamaro ahubwo abakristo bakagombye gusenga basaba kandi bakizera ko bazahabwa ibyo basabye.

Abakristo bakwiye kumenya ko niba bizera Imana,amasengesho yabo ataba impfabusa ahubwo bagategereza igisubizo cyayo bizeye.

[email protected]