Kuki ari ingenzi kwera imbuto zikwiriye abihannye?

“Ngaho nimwere imbuto zikwiriye abihannye, kandi ntimutangire kwibwira muti ‘Ko dufite Aburahamu akaba ari we sogokuruza!’ Ndababwira yuko ndetse Imana ibasha guhindurira Aburahamu abana muri aya mabuye.”(Luka3:8)

Bibiliya itwigisha ko kwihana ari ingenzi, tukaba abakijijwe by’ukuri kuko iyo bidakozwe umuntu atera imbuto zikwiriye abihannye,kuko umuntu wese wakijijwe by’ukuri aba icyaremwe gishya, akareka n’ inzira ze mbi yagenderagamo kera .

Reka turebere hamwe impamvu ari ingenzi ‘kwera imbuto cyangwa kwihana’ :

Ubuzima bw’umuntu bwerekanwa no kuvuka k’umwana muto agakura akaba umuntu mukuru, gukizwa no kuvuka bundi bushya nabyo bigaragazwa n’ubuzima buhindutse bugeza ku kigero cya Kristo.
Buri mukristo agomba kumenya ko rimwe gusa twakiriye agakiza gaturutse muri Kristo, niyo mpamvu tugomba kuva mu bintu twahozemo ibyo Kristo yapfiriye.

Iyo tubwirwa kwera imbuto zikwiriye abihannye, biba bivuze kubaho ubuzima bwihana, bwejejwe muri Kristo, kuko tukiri mu byaha twahungaga Imana ariko ubu turayisanga, twabagaho ubuzima bukora icyaha ariko ubu tugerageza kubaho ubuzima bushimisha Imana. twafatanyaga n’abandi kubaho ubuzima bw’umubiri, ariko ubu imibiri yacu yapfanye na Kristo tubaho ku bw’ umwuka.

Niba twihannye tugomba kwera imbuto buri munsi kandi zishimisha Imana. Kwihana kwacu gukwiye kugaragara kandi kukumvikana mu mibereho yacu.

Kwihana si ikintu kiba umunsi umwe, aho tubwira Imana ko twihana kuko twakoze iki cyangwa kiriya ahubwo ni uguhora twihana uyu munsi, ejo, ndetse n’ejobundi kuko tubaho mu buzima bukora icyaha. Kwihana bihoraho kugirango tubeho ubuzima bushimisha Imana.

Umunsi twakizwaga, ni wo munsi twatangiye kubaho ubuzima bushimisha Imana, kandi dukwiye gukomeza kuyishimisha buri munsi kugeza igihe tuzapfira.

Igihe Kristo azagaruka ku isi hazaba urubanza. Ese kwihana kwacu azakubonamo imbuto zizamushimisha? Cyangwa tuzaba muri bamwe batazakirwa mu bwami bwe?

“Umuntu wese umbwira ati ‘Mwami, Mwami’, si we uzinjira mu bwami bwo mu ijuru, keretse ukora ibyo Data wo mu ijuru ashaka. Benshi bazambaza kuri uwo munsi bati ‘Mwami, Mwami, ntitwahanuraga mu izina ryawe, ntitwirukanaga abadayimoni mu izina ryawe, ntitwakoraga ibitangaza byinshi mu izina ryawe?’ Ni bwo nzaberurira nti ‘Sinigeze kubamenya, nimumve imbere mwa nkozi z’ibibi mwe.”(Matayo7:21-23)

Abakristo bakwiye kubaho ubuzima bwihana kuko kwihana ari yo nzira yonyine ituma wemerwa n’Imana kandi ukazaba mu mubare w’abazinjira mu bwami bwo mu ijuru aho bahora bashima Imana Nyir’ibihe.

Tubifurije kubaho ubuzima buzira icyaha!

[email protected]