Kuba uri mu bigeragezo ntibivuga ko Imana yakuretse

Kuba uri mu bigeragezo ntibivuga ko Imana yagutaye/Pastor Hakizimana Stephen

“Kuko uzibagirwa umubabaro wawe, uzawibuka nk’amazi amaze gutemba kandi ubugingo bwawe buzarabagirana kurusha amanywa y’ihangu. Naho haba umwijima hazatambika umuseke kandi uzaba amahoro kuko hariho ibyiringiro. Ni ukuri uzakebuka ibigukikije, wiruhukire mu mahoro, uzaryama he kugira ugutera ubwoba.” Yobu 11: 16-19.

Abantu b’Imana benshi ntibashaka kugeragezwa ahubwo barashaka kubaho mu mudendezo wuzuye nk’aho twageze iyo tujya kandi ntibishoboka mu gihe cyose tukiri muri iyi si.

Ni ngombwa ko habaho n’igihe cyo kugeragezwa kugira ngo bidukebure tutibwira ko twageze iyo tujya tukirara, bityo uku kugeragezwa kwacu gutume turushaho gukomeza kugira inyota yo gushaka gakondo yo mu ijuru aheza twabikiwe n’Uwiteka Imana idukunda.
Mu by’ukuri si uko byananiye Imana kutureka tukabaho mu munezero gusa. Ariko ntiyabikora ityo kuko byatuma twebwe abantu yaremye twirara tukibeshya ko twageze iyo tugana, bikaba byatuma twumva ko mu Isi ari ho heza ntitwongere kugira inyota yo gusenga no gushaka Imana.

Imana ijya yemera abantu bayo bakageragezwa rwose bakababazwa kugira ngo bakomeze kwibuka ko mu isi atari iwabo ndi ko iyi isi turiho atari iyo kwifuzwa bitume Abakirisito bashishikarira gushaka gakondo yo mu ijuru.

Imana icyo ihora ishaka ni uko abantu bose bakizwa bakamenya ukuri kugira ngo bazabane nayo mu ijuru ryayo ryera, ahari amahoro n’umunezero by’iteka.

Kenshi na kenshi hari ubwo mu mibereho yawe nk’Umukirisitu wireba ukabona ni wowe uhorana ibigeragezo bidashira kandi nyamara uko wisuzumye ugasanga ntacyo umutima wawe ugushinja cyatuma uvuga ko ari ingaruka zikugeraho, ari naho bamwe muri twe bitumerera bityo tukihutira gushaka abadusengera (Delivrance) ngo ni imivumo karande yo mu miryango.

Abandi baratabaza ngo ni abadayimoni babateye bagashaka ko babasengera ngo babohoke, ariko tukibagirwa ko hari ubwo Imana yemera ko ikigeragezo runaka kikugeraho kugira ngo wige, uhuguke, urusheho gusobanukirwa neza iby’iyi nzira y’agakiza, umenye n’uko ukwiye kwitwara muri ibyo bihe nk’umwana wayo ikunda.

Ibi birajyana nuko, iyo uri muri ibyo bihe by’ikigeragezo uhura n’inyigisho ziyobya, bamwe bigisha amagambo amwe n’amwe ashingiye ku nyungu zabo bwite, bavuga ko umukiranutsi w’Imana adashobora kugeragezwa, umukiranutsi w’Imana adashobora gukena, umukiranutsi w’Imana adashobora kurwara, umukiranutsi w’Imana ntiyagendesha ibirenge cyangwa gusonza kandi ngo isi n’ibiyuzuye ari iby’Uwiteka, umukiranutsi w’Imana ngo imigisha yose iri imbere ye n’ibindi.

Yego ntitubihakana rwose imigisha y’Imana irahari pe, ariko bakundwa bene Data, ndabibutsa ko iyo migisha tutayihabwa mu kajagari kuko Imana ni Imana izi ubwenge ibona ko nikugomororera iyo migisha yose urahita ugwa ukayibagirwa ikakubura, bityo bigatuma yanzura kudahutiraho. Hari aho rero iyo migisha tuvuga tugomba kuyihererwa nta handi ni “Mu bushake bw’Imana.”

Muri ubu bushake bw’Imana rero ntabwo kenshi naho uzasanga ari umudendezo gusa. Oya! Aho naho turahageragerezwa, aho naho turaharwanyirizwa, mu bushake bw’Imana hari n’ubwo dukubitika rwose abantu bakatwibazaho, yewe hari n’igihe kigera natwe ubwacu tukibaza ku Mana gushidikanya kukaza tugatangira kuvuga tuti: “Imana ntihari, Imana ntibaho.” Mu by’ukuri si uko Imana idahari kuko ituretse nk’uko tubyibwira twashira nta n’umwe Satani yarebera izuba.

Bibiliya ijambo ry’Imana itubwira neza ngo “Abo bose bapfuye bakizera bari batarahabwa ibyasezeranijwe ahubwo babirebaga biri kure cyane bakabyishimira bakavuga ko ari abashyitsi n’abimukira mu isi. Abavuga batyo baba berekana ko bashaka gakondo. Kuko iyo baza gukumbura aho bavuye baba barabonye uburyo bwo kuhasubira ariko noneho barashaka gakondo yo mu ijuru iruta icyo gihugu bavuyemo kuba cyiza, nicyo gituma Imana idakorwa n’isoni zo kwitwa Imana yabo.” Abaheburayo 11.13-16.

Nubwo bigoye, ariko nshuti bavandimwe nimuze dukomeze tujye imbere hari ingororano ziri imbere ku bihanganye. Kimwe mu byo nkundira iyi Mana twakurikiye, ni uko n’ubwo yakwemera ko ugeragezwa ntishobora kukureka burundu ngo igutere umugongo, ahubwo uko uyegera igenda iguha imbaraga zo kubikomeramo kugeza ubwo ubisohotsemo nk’intwari inesheje.

Bakundwa bene data, ndabarema umutima yuko aho tugana mu ijuru hari ubutunzi bw’agaciro kuruta ubwa hano turi, hari icyubahiro kiruta cyane icyo dushakashaka buri munsi. Renza amaso ibyo ubona urwanire gusingira icyo Kirisito yagufatiye ari bwo bugingo buhoraho.

Umwigisha:Pastor Hakizimana Stephen
Email: [email protected]