Komeza ibisigaye / Pastor Desire HABYARIMANA

“Wandikire marayika w’Itorero ry’i Sarudi uti “Ufite imyuka irindwi y’Imana n’inyenyeri ndwi aravuga aya magambo ati ‘Nzi imirimo yawe n’uko ufite izina ry’uko uriho, nyamara ukaba uri intumbi. Jya uba maso ukomeze ibisigaye bigiye gupfa, kuko nabonye ko ari nta mirimo mwakoze itunganye rwose imbere y’Imana yanjye. Nuko ibuka ibyo wākiriye n’ibyo wumvise, ubyitondere kandi wihane. Ariko rero nutaba maso nzaza nk’umujura, nawe ntuzamenya igihe nzagutungurira. Icyakora ufite amazina make y’ab’i Sarudi batanduje imyenda yabo. Ni bo bazagendana nanjye bambaye imyenda yera kuko babikwiriye.’ “Unesha ni we uzambikwa imyenda yera, kandi sinzahanagura izina rye na hato mu gitabo cy’ubugingo, ahubwo nzatūrira izina rye imbere ya Data n’imbere.” (Ibyahishuwe 3 :1-5)

Muri iyi nyigisho tugiye kwiga amagambo atatu: Ijambo rya mbere ni ukuba maso , ijambo rya kabiri ni ukuba maso mu buzima bwacu , ijambo rya gatatu ni ugukora imirimo isozera(gusoza). Hano ni Yesu wabibwiye Yohana kugirango yandike aya magamb akomeye. Haari aho Yesu ababwirako bibwirako ari bazima kandi bapfuye , Hari igihe umuntu ahura n’ibimwica mu buzima bwe akajya yibwirako ari muzima kandi hari ibintu byinshi byamwishe, yarapfuye mu buryo bw’umwuka birumvikanako yigeze agira ubuzima ariko agahura n’ibimwica bikagera igihe bikamwica, akabaho mu rusengero akorera Imana, aramya Imana , akora imirimo itandukanye , akitwa izina ryiza ariko Imana yamureba ikabona ubuzima burapfuye , hano Yesu yahise atanga inama: Icya mbere jya uba maso, icya kabiri ukomeze ibisigaye bitarapfa, icya gatatu ukore imirimo myiza isozera (gusoza).

Ubutumwa bwiza ngufitiye Yesu yakuntumyeho, ndagirango nkwibutse jya uba maso , iyo bavuze kuba maso hano ntabwo ari ugukanura gusa urebe ahubwo ni ukuba maso kwihishurirwa, ni ukuba maso ko kurinda ibintu by’agaciro. Bibiliya iravuga ngo rinda umutima kuruta ibindi byose birindwa kuko iby’ubugingo ariho bikomoka, iyo ushoboye kurinda umutima uba urinze ibintu by’agaciro. Bibiliya iravuze ngo jya uba maso ukomeze ibisigaye bigiye gupfa, ni ukuvuga ngo hari ibyapfuye none ukwiye kuba maso, ukabera maso ubugingo bwawe, uzarebe ahantu hari ibintu by’agaciro baraharinda cyane. Iyo urebye mu bihugu bikomeye ku isi , ingengo nini y’imari igenda ku mutekano w’abayobozi kuberako nibo babitse amabanga akomeye, bagomba kurindwa mu buryo butangaje. Ndagirango nkwibutseko iyo usobanukiwe agaciro ku bugingo , ugasobanukirwa icyo Yesu yakoze ku musaraba warushaho kwirinda, wamenyako nubwo agakiza Imana yakaduhereye ubuntu ariko Yesu karamuruhije, usobanukiwe ibyo warinda ubugingo bwawe kuruta ibindi bintu byose birindwa.

Ijambo rya kabiri ni ukumenya ibyo satani yishe mu buzima bwawe. Ibintyu bipfira ahantu hatatu mu muryango , muri sosiyete no mu bidukikije. Hari igihe umuntu ahura n’ibibazo mu muryango bikangiza ubuzima bwe, bikangiza ejo hazaza , kuko mu muryango niho abantu bakomerekera kuruta ahandi, sosiyete nayo ijya ikomeretsa, no mu bidukikije naho tujya tuhahurira n’ibikomere. Hanyuma umuntu ku giti cye agizwe n’ibice bitatu : Umwuka, ubugingo n’umubiri. Ufate akanya utekereze ni ibihe satani yishe mu mwuka, ndagirango nkwibutseko kuva kuri Adamu akoze icyaha umuntu yahindutse mubi, kugera uyu munsi ,umuntu wese ukomoka kuri Adamu haba hari mu ibintu bibi mubuzima bwe: imirimo ya kamere n’ibindi bitandukanye, iyo ukijijwe uba uhawe andi mahirwe ya kabiri, kugirango Yesu abone gusana ibyangijwe muri wa muntu w’imbere, igihe Adamu akora icyaha bamwirukanye muri ya ngobyi ya Edini ibintu bihinduka bibi. Kuva icyo gihe abakora ibyo gukiranuka niko basobanukiwe ayo mahirwe Imana itanga muri Krisito Yesu. Na mbere yuko Yesu aza hari abantu bari barasobanukiwe mu mubano bafitanye n’Imana akaba ariho hava imbaraga zituma banesha imbaraga z’umubiri. Yesu yaje gukuraho ibyaha byabari mu isi aduha andi mahirwe yo gukora imirimo myiza yose ikorerwa muri Yesu. Birashoboka ko umuntu agira imyitwarire atariko yakagombye kwitwara kubera ubuzima bw’ibikomere, ni ngombwa ko dukora imirimo myiza.

Ndagirango mbibutseko ntabwo Imana izahembera abantu ubwinshi bw’ibyiza bakoze ahubwo izabahembera ko bakoze ibyo baremewe gukora, Tabita ntabwo yazuwe n’amarira y’abapfakazi, iyaba ari ukurira baba bararize abagabo babo bakazuka ahubwo imirimo myiza Tabita yakoze niyo yamuzuye. Koroneliyo yabanye n’Imana irangije imutumaho marayika iramubwira ngo gusenga kwawe kumviswe gusenga n’ubumuntu ugira byazamukiye kuba urwibutso imbere y’Imana. Si Ugusenga gusa ahubwo ugerekaho imirimo myiza. Bibiliya iravuga ngo hahirwa abantu bapfa bapfira mu Mwami imirimo izagenda ibaherekeje, imirimo dukora izaduherekeza kandi si ugukora imirimo gusa ahubwo no kuyikorana urukundo. Iyi mirimo yose dukora bazayinyuza mu muriro, bazafata imyaka itatu n’igice yo gupima imirimo, imirimo yose tutakoranye urukundo izasigara mu muriro niyo mpamvu dukwiye gukora imirimo myiza kugira ngo ituzanire umugisha , iyo dukoze imirimo myiza niyo nzira Imana yaciye yo kugira ngo tubone imigisha , kuko gutanga bizana umugisha kurusha guhabwa kandi iyo dukoze imirimo myiza y’Imana iraturinda, niba ushaka kuzarama igihe kirekire ukwiye gutekereza ibintu byagutse wakorera Imana. Iyo dukora imirimo myiza tuguma mubusabane n’Imana. Ikindi abana bacu tuzabona umurage tubasigira biturutse ku mirimo myiza, Dawidi yatekereje kubakira Imana inzu , Imana iramubwirango ntabwo ari wowe uzanyubakira ariko na none urantangaje, inzu izubakwa n’umwana wawe ariko ntangajwe nukuntu nagukuye inyuma y’intama ejo bundi ukaba utekereje kunyubakira inzu. Imana iramubwirango kera nabaga mu ihema rikansaziraho nkimukira mu rindi none wowe utekereje kunyubakira inzu !Imuha amasezerano menshi akomeye, imubwirako atazabura uwo kumusimbura ku ngoma, urubyaro rwe ruzagira umugisha , atazaba impunzi , imuha isezerano ry’imbabazi ritazarangira. Ndagirango mbibutseko iyo dukorera Imana, izabitwibukira kandi izabana natwe. Bibiliya yatubwiye, jya uba maso, urinde ibisigaye bitarapfa, hanyuma ukore imirimo myiza nk’iya mbere byashoboka ko hari ibyo satani yishe mu muryango wawe. Wubatse urugo uziko ugiye ahantu ho kuruhukira hanyuma satani arabyica, Imana ifite andi mahirwe ya kabiri yaguha ukongera ugasabana n’Imana, ukagirirwa neza n’Imana, watangiye inzira y’agakiza ariko satani yagiye yica ibitari bike mu mibereho yawe,Imana yagufasha kandi Imana ikabana nawe.

Kuva mu isi nta mahitamo dufite twese tuzahava ariko ikibazo uzahava warakoze iki? Ni iki abantu bazakuvugaho umunsi wavuye mu isi ? Bazavugako wari umukiranutsi ? Bazavugako wafashije impfubyi n’abapfakazi ? Bazavugako witwaraga nabi? Bazavugako wakundaga gukorera Imana iki ? Uzasiga irihe zina imusozi? Ni iki uzaraga umuryago wawe ? Ni iki itorero rizakwibukiraho igihe uzaba waravuye mu isi ? Menya agaciro k’ubugingo ugerageze gukora ibyo gukiranuka, Imana izabana nawe, Imana izaguha umugisha , ifite umugambi mwiza ku buzima bwawe.

Imana iguhe umugisha niba ufashe umwanzuro wo kubera maso ubugingo bwawe, ugakora imirimo myiza kandi ukirindako satani yakomeza kwica bimwe mu byo Imana yaguhaye : impano n’ibindi.

Dusenge, Data mu izina rya Yesu ubu ni ubutumwa bwiza twumvise ndagirango udushoboze kuba maso, udushoboze kwirinda, udushoboze kubera maso ubugingo bwacu, udushoboze kurinda iby’agaciro waduhaye kandi turasenze kugira ngo nubwo hari ibyapfuye udushoboze guteza imbere ibisigaye, udushoboze gukora imirimo myiza yo gukiranuka. Mu izina rya Yesu krisito Amen.