KIZITO Mihigo: Ibyago bitwegereza Imana ikatwigarurira, yabivuze mu ndirimbo ye nshya yise "AHO KUGUHOMBA YAGUHOMBYA "

Umuhanzi Kizito Mihigo yasohoye indirimbo ye ya mbere yise "Aho kuguhomba yaguhombya", igaruka cyane ku mpuwe z’Imana n’urukundo rwayo rutuma idakura amaboko kuri muntu kabone n’iyo yaba yarayigomeyeho birenze urugero.

Kizito Mihigo wavuye muri Gereza muri Nzeri uyu mwaka afunguwe ku mbabazi za Perezida wa Repubulika, indirimbo yasohoye niyo ya mbere nyuma yo kuva muri Gereza.

"Aho kuguhomba yaguhombya" ni indirimbo icurangitse mu njyana y’indirimbo zihimbaza Imana zikunze kuririmbwa muri Kiliziya Gatolika
Iyi ndirimbo ya mbere ya Kizito nyuma yo kuva muri Gereza, ikubiyemo ubutumwa bwa gikirisitu bugaruka cyane ku gukomera ku Mana no kuyigarukira mu gihe waba wayikoshereje.

Mu butumwa yashyize ahagaragara ubwo yamaraga gusohora iyi ndirimbo yavuze ko ayituye abakunzi b’ibihangano bye bose.

Yagize ati "Bavandimwe, Nimwakire indirimbo nabemereye. Nayise "AHO KUGUHOMBA YAGUHOMBYA". Nicyo gihangano cya mbere nshyize ku mugaragaro nyuma yo kuva muri Gereza. Ni ubutumwa bwa gikristu bumvuye ku mutima. "

Yunzemo ati "Ndizera ko iyi ndirimbo izafasha abakunzi b’ibihangano byanjye, cyane cyane abemera Imana, kuyikomeraho no kuyigarukira mu gihe bari kure yayo. Igihe ubutunzi n’ibyubahiro byo ku isi byaturangaje tukayitera umugongo, ishobora kwemera ko tubibura ariko tukongera tukayigana kuko ariyo Nyirubuzima. Aho kuduhomba, yakwemera ikaduhombya tugasubira ku isuka tugatangira bundi bushya ariko tukayigarukira nka wa mwana w’ikirara. Mugire Amahoro ! "

Umva indirimbo ya Kizito "AHO KUGUHOMBA YAGUHOMBYA"