KIGALI: Hateguwe igitaramo cyo gutanga inkunga yo kuvuza Hosiane hatumirwamo n’ Ibyamamare muri Gospel

Abashinze umuryango Hosiane Family baratangaza ko ku wa 21 Ukwakira 2018 bateguriye abanyarwanda bose igitaramo kigamije gukusanya inkunga yo gufasha Uwitonze Hosiane wakoze impanuka ya moto bikamuviramo uburwayi bumukomereye.

Iki gikorwa cy’urukundo cyo gufasha uwitonze Hosiane ngo cyatumiwemo abahanzi bazasusurutsa imbaga y’abazacyitabira barimo Rene Patrick, Luc Buntu, Deo Munyakazi wamenyekanye mu ndirimbo zihimbaza Imana akoresheje inanga gakondo, Papy Clever, Edie Mico na Alexis Dusabe.
Iki gitaramo kandi kizitabirwa n’amakorari nka Shekinah Worship Team, na The Chrap ndetse n’umwigisha Pasteur Habimana Didier kikazabera Kimisagara ku itorero Evangelical Resoration Church.

Agaruka ku buzima bw’uyu mukobwa, Tuyizere yavuze ko uyu mukobwa yari ari kuri moto ahetse igikapu cyari ikirimo mudasobwa maze iyo moto ikoze impanuka, mudasobwa imuvuna umugongo ku buryo ubu arembye bikomeye.

Uyu mukobwa amaze gukora impanuka ngo yajyanywe ku bitaro bya Kibungo biri mu karere ka Ngoma mu Ntara y’Iburasirazuba kugira ngo yitabweho n’abaganga ariko ntibyagira icyo bitanga.
Ibi bitaro byamwohereje mu bitaro bikuru bya kaminuza bya Kigali CHUK ariko kumuvura birananirana akomeza kuremba.
Nyuma yaho ngo yajyanwe ku bitaro bya gisirikare i Kanombe no ku bindi bitaro bitandukanye bikuru byo mu Rwanda kugira ngo barebe ko yavurwa ariko ntibyagira icyo bitanga.

Abaganga bagaragaje ko kugirango Hosiane avurwe bimusaba kujya kwivuriza mu gihugu cy’Ubuhindi.
Tuyizere yavuze ko umuryango wa Uwitonze udafite ubushobozi bwo kumuvuza ngo ikaba ari na yo mpamvu yatumye we n’inshuti za Hosiane bashinga umuryango Hosiane Family ugamije gutegura igitaramo kigendereye gukusanya inkunga yo kumufasha kwivuriza mu Buhindi.

Mu butumwa yageneye abanyarwanda muri rusange, Tuyizere yabasabye kugira umutima w’urukundo bagasengera Hosiane kandi ngo n’ufite ubushobozi bw’ibifatika uko bwaba bungana kose azaze abwitwaje muri iki gitaramo.

Tuyizere Yagize ati: “Uzitabira iki gitaramo yaza afite umutima w’urukundo kugira ngo yumve ko Hosiane amubabaje akaba yanamusengera kuko isengesho naryo rirafasha…ariko biramutse binashobotse mu bushobozi bwe hari icyo yakora ku gikorwa cyo kuvuza Hosiane”.

Iki giterane kizatangira ku isaha ya sa kumi zuzuye kikarangira sa mbiri z’ijoro gifite insanganyamatsiko ivuga ngo Kugira neza no kugira urukundo ntimukabyibagirwe nk’uko biri mu Baheburayo 13:16.

AMAFOTO YA UWINEZA HOSIANE UKENEYE UBUFASHA