Iyo igihe cyawe cyo kwibukwa kigeze Imana irakora / Ev Marina Uwiduhaye

Iyo umuntu ahuye ni ikigeragezo akenshi atekerezako hari ubwo Imana yamwibagiwe ariko iyo witegereje usanga Atari ukuri ko Imana yo mu ijuri isumbabyose ishobora kwibagirwa. Ese umuntu waremwe n’Imana yagira ubushbozi bwo kwibuka, Imana yo yamuremye ntibugire ? oya Imana irazirikana kandi igasohoza ibyo yavuze ikarenzaho nibyo itakubwiye. Ntabwo iyaremye ugutwi yananirwa kumva , ntabwo iyaremye amaso yananirwa kubona kandi isi n’ibiyuzuye byose ni iby’Imana, iyo ipfumbatuye ikiganza cyayo ihaza ibyaremwe.

"Umwami atumira Mefibosheti , amukura mu rugo rwa Makiri mwene Amiyeli i Lodebari amuzana i bwami" –(2 Samweli 9:5)
Uno munsi nafashijwe n’ubuzima bwa Mefibosheti. Natangajwe n’uburyo Imana yamukuye i Lodebari akisanga i Bwami ku meza ya Dawidi.

Mpereye kuri iki cyanditswe, hari amasomo meza nize akurikira:

1.Hari icyo Imana iheraho yibuka umuntu ishaka gukemurira ikibazo

Kuri Mefibosheti Imana yibukije: Dawidi ineza ya Yonatani. Kuri Moridekayi Imana yibukije Umwami amakuru yatanze yo kuburizamo umugambi mubisha wamugambaniraga. Ndakwifuriza kugira icyo wibukirwaho none.

2.Iyo Imana igiye gukemura ikibazo cy’umuntu ikoresha umugiraneza

Siba yabaye umutangamakuru. Mu gihe cya Yosefu, umuhereza wa Vino y’i Bwami yabaye umuranga.
Ndasaba ngo Imana ikohereze Umuntu w’ingirakamaro.

3.Iyo Imana igiye gukura umuntu mu kibazo, ntihera ku bushobozi bw’uwo igiye gutabara

Ntacyo Mefibosheti yasabwaga kuba yujuje cg gukora. Ibyo utujuje n’ibyo udashoboye si imbogamizi ku mugambi Imana igufiteho. Niba nta cyaha wishinja imbere y’Imana, Tuza kandi wizere Imana kuko wujuje ibyo Imana yaheraho.

4.Imana Ntiyita ku mateka yawe

Ntinanizwa n’uko uri kure (i Lodebari), ntabwo igisha umuntu inama. Iyo Dawidi agisha inama bari kumwibutsa ibibi bya Sawuli. Urusheho kugira imbabazi zituma urenga urugero rwo gutekereza ibi wagiriwe.

5.Iyo igihe kigeze Imana ikora yihuse

Ntabwo gukura umuntu mu kibazo atinzemo bisaba Imana iminsi myinshi yo kubitegura no kubisohoza.
Mu munsi umwe, Imana ikura umuntu mu buvumo ikamwicaza i Bwami, Imana ikura umuntu muri gereza ikamwicaza i Bwami (Yosefu); Imana ikura umuntu mu mva ikamwicaza mu bazima (Lazaro), ...

Ndakwifuriza ngo Imana isohoze ibyo yakuvuzeho muri iki gihe mu izina rya Yesu!
Kandi urusheho kugwiza imbaraga z’umutima kugirango ushobozwe kunesha amoshya yose yica ubugingo

[email protected]