Inzira 6 zigaragaza uko abamarayika bakorana natwe

Mu gitabo cy’Abaheburayo havuga cyane ibyerekeye abamarayika , hatubwirako Yesu yarutaga cyane abamarayika, kandi akaba ari bo badufasha gukorera Imana mu buzima bwacu bwa buri munsi.

Abamalayika bagira umumaro ukomeye mu mibereho y’abantu. Byongeye kandi intego yabo y’ibanze ni ukubafasha gukorera Imana.

“Mbese abamarayika bose si imyuka iyikorera, itumwa gukora umurimo wo gufasha abazaragwa agakiza?”(Abaheburayo1:14)

1.Abamarayika bazana ubutumwa bw’ubuhanuzi

Abamarayika bamenyesheje abashumba inkuru ya Mesiya wari wavukiye I Betelehemu. Marayika Gaburiyeli kandi yabonekeye Zakariya amubwira amagambo y’ubuhanuzi yerekeye Yohani Umubatiza wari kuzavuka.

“Akibitekereza, marayika w’Umwami Imana amubonekera mu nzozi ati “Yosefu mwene Dawidi, witinya kurongora umugeni wawe Mariya, kuko imbuto imurimo ari iy’Umwuka Wera.”(Matayo 1:20)

Daniyeli nawe yasuwe na Gaburiyeli, amuzaniye inkuru y’ibyari kuzaba(Dan .9). Byongeye kandi ni marayika wabwiye Filipo aho akwiye kwerekeza ngo ahure n’Umunyetiyopiya w’inkone(Ibyakz8). Ni marayika kandi wabwiye koroneliyo gutumira Petero kugira ngo abe inzira y’agakiza ku mahanga yose.

2.Abamarayika baraturinda

Mu gitabo cy’Ibyakozwe n’Intumwa hatubwira uburyo marayika w’umwami Imana yakinguye inzu y’imbohe harimo intumwa zigasohoka akazibwira kujya mu rusengero kwigisha abantu iby’ubugingo(Ibyakz5:20). Marayika nanone niwe wabohoye Petero aramubyutsa amukura munzu y’imbohe(Ibyakz12)

Zaburi 91:11 hagira hati: “Kuko azagutegekera abamarayika be, Ngo bakurindire mu nzira zawe zose.” Mu Kuva , Imana yaravuze ngo: “Dore ndatuma marayika imbere yawe akurindire mu nzira akujyane aho nakwiteguriye.”(Kuva 23:20, 23; 32:34; 33:2). Marayika kandi ni we wabumbye iminwa y’intare ntizarya Daniyeli (Daniyeli6)

3. Abamarayika barwanya abadayimoni

Igihe Daniyeli yari amaze iminsi ashaka Imana, marayika ubwo yamugeragaho yamubwiyeko yamaze mu ntambara n’abadayimoni iminsi makumyabiri n’umwe yose(Dan10:13). Igishimishije ni uburyo Daniyeli yafashije marayika muri urwo rugamba akomeza gusenga. Ntidukwiye kureka gusenga ahubwo dukwiye gusenga ubudasiba.

Mu byahishuwe na ho , tuhasomako Mikayeli n’abamarayika be batabariye kurwanya cya kiyoka.( Ibyahishuwe12:7)

4.Abamarayika bajya badufasha mu bigeragezo

Bibiliya itubwirako satani yasize Yesu mu butayu ubwo yamugeragezaga, maze ako kanya abamarayika baza kumukorera.

“Umwanzi aherako aramureka, maze haza abamarayika baramukorera.”(Matayo4:11)
Kandi igihe yari mu murima wa Getsemani, ababajwe n’uburyo agiye gutandukana na se, marayika yaramubonekeye amwongerera imbaraga. “Marayika uvuye mu ijuru aramubonekera, amwongera imbaraga”(Luka22:43)

5.Abamarayika bashobora kuza mu ishusho y’abantu

“Ntimukirengagize gucumbikira abashyitsi, kuko bamwe bacumbikiye abashyitsi, bacumbikiye abamarayika batabizi.”(Abaheburayo13:2)

Igitekerezo cyirimo hano, ni uko niba umuntu agukeneye, bishobora kuba ari isuzuma, kandi byashoboka ko ari marayika ufashishe.

Loti yacumbikiye abamarayika bari baje mu isura y’abagabo. Igihe Mariya yahuraga n’abamarayika babiri nyuma y’izuka rya Yesu, (bambaye ibyera), ntiyahise asobanukirwako ari abamalayika mu gihe baganiraga. Igihe Yesu yajyaga kwa Yosuwa mu ishusho ya marayika, na we ntiyahise amumenya .(Yosuwa5)

6.Abamarayika boherezwa kurimbura inkozi z’ibibi

Herode ubwo yishyiraga hejuru akigira imana aho guha Imana icyubahiro, yishwe na marayika w’Imana. Abamarayika nibo batumwe n’Uwiteka kurimbura Sodomu na Gomora .

“Tugiye kurimbura aha hantu, kuko gutaka kw’abaharega kwagwiriye imbere y’Uwiteka, akadutuma kuharimbura.”(Itang.19:13) Umumarayika w’Imana kandi niwe watsinze Abasiriya mugihe cya Hezekiya.

Ibyahishuwe kandi hatubwirako abamarayika bamenyesheje iby’urubanza, bavuza impanda:
“Uwa mbere avuza impanda. Hakurikiraho urubura n’umuriro bivanze n’amaraso, bijugunywa mu isi. Nuko kimwe cya gatatu cy’isi kirashya, kimwe cya gatatu cy’ibiti na cyo kirashya kandi ibyatsi bibisi byose birashya………(Ibyahishuwe 8:7-13).

“Nanone marayika yahura umuhoro we mu isi, aca imbuto z’umuzabibu w’isi azijugunya mu muvure munini w’umujinya w’Imana.”(Ibyahishuwe 14:19)

Abamarayika bahora batureberera kandi babana natwe, kuko Imana ibohereza gukorera abakiranutsi. Ikindi kandi Ntidukwiye gusenga abamarayika kuko byatujyana mu buyobe. Yesu ubwe yadusabye gusenga Imana no mu izina rye, kandi ko ibyo dusaba byose bizasubizwa.

“Kandi icyo muzasaba cyose mu izina ryanjye, nzagikorera kugira ngo Data yubahirizwe mu Mwana we. Nimugira icyo musaba cyose mu izina ryanjye nzagikora.”(Yohana14:13-14)

“Uwo munsi muzasaba mu izina ryanjye, kandi simbabwira ko nzabasabira kuri Data, kuko Data na we abakunda ubwe kuko mwankunze mukizera yuko navuye ku Mana.”(Yohana16:26-27)

Muri iyi minsi, dukwiye gusaba Uwiteka akohereza abamarayika bo kubana natwe mu buzima bwacu bakaturinda kandi bakatuyobora gukomeza gukora gukiranuka kw’Imana.

Sophie @agakiza.org