Ingaruka zizanwa no kuyoborwa n’abashumba batujuje indangagaciro za gishumba/ Pastor Desire HABYARIMANA

Hari imyitwarire myiza, Bibiliya igaragaza ikwiye kuranga abashumba, uko bakagombye kuba bameze. Umushumba cyangwa umwungeri w’Intama, akwiye kuba ari umuntu witonda cyane, kuba inyangamugayo, kuba umugabo w’umugore umwe, udakunda ibisindisha wirinda, ugira gahunda mu kubaho kwe, ukunda gucumbikira abashyitsi, ufite ubwenge bwo kwigisha, utari umunywi wa vino cyangwa umunyarukoni, ari umugwaneza utarwana, atari umukunzi w’impiya, utegeka neza abo mu rugo rwe, agatera abana be kumvira no kubaha rwose, ntakwiriye kuba uhindutse Umukristo vuba, akwiriye gushimwa neza n’abo hanze.( 1 Timoteyo 3:1-8)

Kuva kera abantu bakeneraga abashumba no mu isezerano rishya dukenera abashumba badufasha kugera ku Mana. Abo bantu ni abantu twizera ko bateye intambwe ziruta izo twe twateye cyangwa se basobanukiwe byinshi kuruta ibyo tumaze gusobanukirwa, bafite ubunararibonye bashobora kutugeza kuburyo rwo gusenga bwiza. Iyo urebye abo bantu tubagirira ikizere kukigero cyo hejuru, rimwe na rimwe hari ubwo twibeshya tukumva ari abantu bera cyane badashobora gukora ikosa, tukibagirwako ari bantu babyawe n’abagore, bakomoka kuri Adamu, bashobora gukora amakosa nk’ayo natwe twese twakora.

Abakirisito benshi bagiye bagira ibikomere bitewe nuko bagiye bafata amarangamutima n’ubuzima bwabo bakizera umuntu, bakabasangiza ibigize ubuzima bwabo hanyuma yazasanga uwo yasangije ubuzima atariwe hanyuma akahavana ibikomere biteye ubwoba.

1.Kwigenga: Iyo umuntu abuze umurera ufite indangaciro nziza za gishumba, uwo muntu abaho yigenga. Abaho adafite uwo agisha inama, abaho ubuzima bwa wenyine, abikora uko abyumva .

2.Gufata iby’agakiza nabi: Abantu bahinduka abayoboke b’amatorero ariko nta mpinduka y’agakiza bafite, abantu bahindura aho bahoze ariko uko bahozeho ntiguhinduke, ni ingaruka zo kuba abantu bataragize abashumba beza babayobora.


3.Kugendana ibyaha bitatuwe:
Ukaba wubatse urugo ugaca inyuma uwo mwashakanye ukazabura umuntu waturira kuko nubivuga mu rusengero bazagutaranga, nubibwira pasiteri wawe azagutenga, nubyaturira uwo mubana urugo ruzasenyuka, ugahitamo kugendana umutwaro utazi ugihe uzaturira.
Murabiziko umuntu wese wabyawe n’umugore agizwe no kwibeshya, agizwe n’intege nke niyo mpamvu umuntu wese akenera inyunganizi, babiri baruta umwe , iyo umwe aguye undi aramubyutsa. Niyo mpamvu Imana yashyize abantu mu nzira yacu ndavuga abashumba n’abandi bantu badufasha mu nzira ijya mu ijuru kugirango urugendo rwacu rutubere rwiza ariko iyo ubuze umubyeyi ugufasha mu buryo bw’umwuka ugendana ingaruka z’ibyaha bitatuwe, umuntu akagendana umutima uremereye uhora umucira urubanza.

4.Abantu bahora bahinduranya amatorero: Hano usanga umuntu asengera nko mu matorero nk’atanu adahuje amazina , adahuje abashumba, ahora ahindura kugirango abone ahantu aruhukira ariko rimwe na rimwe aho agiye agasanga ni bibi kuruta aho yavuye. Ni ingaruko zo kutagira abashumba beza.

5. Kubura aho ukoreshereza umuhamagaro wawe: Nta muntu numwe udafite impano, nta muntu numwe udafite icyo Imana imutekerezaho yakora mu bwami bw’Imana ariko iyo utagize umuntu wareba impano yawe , iyo utagize umuntu wagufasha gukoresha umuhamagaro wawe ibikurimo ntibigira umumaro isi bitwe nuko utagize umuntu ukurera. Gukorera Imana ntabwo biri mu rusengero gusa ahubwo iyo impano zacu ziyobowe neza zishobora kugirira umumaro isi yose.

6. Kuvuka kw’amatero mu bwigomeke: Umuntu asengera ahantu hari umushumba ugoranye nawe akazahita ajya gushinga itorero kandi icyo umuntu yahawe n’icyo azatanga kandi usanga amatorero agenda avuka mu bwigomeke bitari urukundo rw’umurimo w’Imana ahubwo ari ukugiranga akire wa mushumba umeze kwa kukindi nawe yagenda akaba mubi kumurusha.

7. Itorero risuzugurwa nabo hanze: Umuririmbyi yararirimbye ngo yewe kintu kazanye ibice mu itorero kikarisuzuguza abataririmo, Iyo abashumba batabaye beza rimwe na rimwe uko itorero rifatwa hanze biba bibi. Iyo bagiye kuvuga ubutumwa bashaka indamu bituma abantu babafata nkabadafite icyerekezo, badafite aho baganisha abo bayoboye bigatuma itorero ritukwa nabo hanze bitewe nuko abantu bitwaye nabi.

Nujya guhitamo itorero cyangwa umuntu uzagushumba ujye ubanza usenge, Ujye ubanza kubitekerezaho inshuro nyinshi. Abizerwa baracyahari uramutse usenze ukamusaba Imana, Imana yamuguha. Abashumba barahari benshi, ntabwo twavuga nka Eliya wavuzengo ninjye usigaye wenyine ariko Imana ifite abantu benshi babizerwa bayoboye amatorero neza ariko bisaba gusenga Imana ikakuyobora.

Umunshumba yakagombye kuba ari umuntu mubabarana ubabaye, mukishimana wishimye, akaba ari umuntu wakaturira ntazakuvemo, yagombye kuba ari umuntu ugufitiye umwanya, yagombye kuba ari umuntu mwagendana urugendo rw’ubuzima ukumva ufite umutekano wejo hazaza.