Ingaruka zizanywa n’umutima wirarira

Imana ntishakako hagira umuntu n’umwe ubeshya(ubeshya abandi cyangwa we ubwe ngo yibeshye). Abenshi batekerezako kubeshya abandi ari byo bibi kandi bisenya, ariko kwishuka ubwacu byo ni bibi cyane ku buzima bwacu no ku bandi bantu badukikije.

Muri iyi nkuru turarebera hamwe zimwe mu ngaruka zizanwa n’umutima wishuka:

1.Kugendera mu nzira igana urupfu

Iyo umuntu yibeshya ubwe yiyumvisha ko ibyo akora ari byiza ariko mu by’ukuri akaba ari mu nzira igana urupfu. Imigani 14:12 ,16:25 hagira hati:
“Hariho inzira itunganiye umuntu, Ariko iherezo ryayo ni inzira z’urupfu.”(Imigani 14:12)
“Hariho inzira umuntu yibwira ko ari nziza, Ariko iherezo ryayo ni inzira z’urupfu.”(Imigani16:25)
Igihe twiyumvisha ko ntawundi utunganye uretse twe, tuba twishyira munzira yitwa urupfu.

Abana batatojwe ikinyabupfura bazakurana imyumvire mibi , batekerezako ikibi aricyo kibaha ibyishimo bityo bagifate nk’ikintu cy’ingenzi hatitawe uko cyagezweho , mbese hazemo no gukora ibyaha. Nikimwe no kubona umuntu utekereza ko ikintu cyose akoze kiba ari cyiza, kidakwiye gukosorwa .

2.Kutemera amakosa yacu

Abantu bibeshya ubwabo baba bafite ibyago byo kwanga kwicuza ibyaha byabo. ‘Nta cyaha nakoze, kuki nkwiriye kwihana?’
Abenshi batekerezako batunganye bityo bakihamirizako badashobora gukora icyaha bagendeye uko biyumva, ntibabashe kwigenzura ngo bumve ubukana bw’ibibi bakoze, maze bakava mu byizerwa.

“Ariko Umwuka avuga yeruye ati “Mu bihe bizaza bamwe bazagwa bave mu byizerwa, bīte ku myuka iyobya n’inyigisho z’abadayimoni” bayobejwe n’uburyarya bw’abigisha b’abanyabinyoma, bafite inkovu z’ibyaha mu mitima yabo nk’iz’ubushye.”(1Timoteyo 4:1- 2)
Aba bantu banga kwihana kandi hatabayeho kwihana nta mbabazi z’ibyaha ushobora kubona.

3.Gushinja abandi gukora icyaha

Iyindi ngorane ni igihe twanze kwemera ibyaha byacu, tukumva dukeye ahubwo bikarangira dushinja abandi ibyaha.
Ese mwibuka ibyabaye kuri Adamu na Eva aho kwemera icyaha?Adamu aho kwemera icyaha yakoze akabishinja Eva na we akabishinja inzoka? Byari kuba byiza iyo bemera icyaha bakihana.

Birumvikana , icyaha cyinjiye mu isi binyuze kuri Adamu. Urukundo rw’Imana ntirwigeze ruhinduka na nyuma y’uko umuntu acumura, rwagumyeho, kuko yanabambitse igihe bari bamaze gucumura.(Itangiriro 3:21) Kandi urukundo rwayo rwatumye yohereza umwana wayo Yesu Kristo ahabwa igihano twari dukwiriye kugirango atubone kandi nitumwizera dushobore kwakira imbabazi z’ibyaha kandi tube abo mu muryango w’Imana.

Kwibeshya ubwacu, gushinja abandi ibyaha byacu no kwanga kwihana ntibyatuma twakira izo mbabazi. Kandi niba turi abakristo, ubuntu bw’Imana ntibutwemerera gukora icyaha no kwiyumvisha ko twababariwe hatabayeho kwihana.

“Ariko kandi ndabandikira itegeko rishya, ari ryo ry’ukuri kuri we no kuri mwe, kuko umwijima ushize, umucyo w’ukuri ukaba umaze kurasa. Uvuga ko ari mu mucyo akanga mwene Se, aracyari mu mwijima na bugingo n’ubu. Ukunda mwene Se aguma mu mucyo, nta kigusha kiri muri we.”(1Yohana1:8-10)

Imana idushoboze kugira umutima uciye bugufi!

Sophie @Agakiza.org