Incamake y’ ishusho y’igitabo cy’Ibyahishuwe (Igice 4) Rev Pastor Antoine RUTAYISIRE

Ndagirango nugera ahantu abantu batazi aho uherereye, uzibukeko Yesu azi aho uri.Yesu yaje abwira Yohana ati “ narinarapfuye ariko none ndimuzima, ninjye ufite imfunguzo z’urupfu n’ikuzimu” kandi mporaho iteka ryose, none ntukangwe nibyo, komeza umurimo.

Njya nibaza ukuntu umuntu ajya mu mwuka ari mku kirwa cy’ipatimo ariko ubwo niko Imana yacu ikora, amina. Tekereza umuntu akubwire ngo narindi mu byago bikomeye nihebye hanyuma ndasenga, njya mu mwuka ngo hanyuma mbona Yesu, Imana izatugirire gutyo ariko hari ikintu nabonye, ibyo ngibyo Imana ijya ibikora. Niba hariho ibihe nabonye Yesu ni hagati ya 1990 na 1994, kuko buri munsi nabaga ndi mu kaga. Icyo gihe nakoraga mu banyeshuri ngenda cyane kandi aho ngenda hari za bariyeri nyinshi kandi mbi kuko kampisi(campus) nyinshi zari mu majyaruguru ariko Imana yagumanye nanjye irandinda.

Hari igihe Yesu agusanga ku kirwa cy’i Patimo, ubwoba bwakwishe ugiye gupfa , akakubwira ngo humura ninjye ufite urufunguzo rw’urupfu n’urw’ i Kuzimu. Iyo ugezo mu kaga nibwo ubona Yesu w’ukuri, mu zima. Iyo tugeze mu bihe bikomeye Yesu aradusanga kandi aza mu butware bwe, ntabwo aza agenza buhoro, nimusoma iki gice nta kindi muzabona, muzabona Yesu aha Yohana inkomezi, niyo mpamvu Yesu mbere yuko atuma Yohana, yarabanje amwiyereka, Yohana abona Yesu wazutse kandi ufite ubutware bwose, itangirio n’iherezo, alufa na omega.

kuva muri Isirayeli kugeza I Roma hafi amatorero menshi yashinzwe na Pawulo ndetse nabo yabwirije. Ntabwo nzi impamvu yatoranyijemo amatorero arindwi gusa . Uko ariya matorero atondetse abantu benshi babibonamo uko itorero ry’Imana ryagiye rigenda: bakavugango ryarabanje risa na Filadelifiya, rigeza aho rimera nka Simuruna, rigera aho rizakonja rimera nka Lawodokiya, rigenda rikonja kugera igihe ryabaye akazuyaze . Abandi babona igishushanyo cy’amatorero muri rusange. Dushobora gutangira itorero tugasusuruka, tugashyuha hanyuma tugeraho tugatangira gutakaza urukundo rwa mbere, tukazageraho tugatakaza imbaraga, tukazageza igihe tuzaba nka Lawodokiya, abantu badashyushye, ntibabire, buri torero ryose rinyura muri ziriya etape uko ari indwi.

Buri torero rifite icyo rishimwa nicyo rigawa , kandi buri torero rifite icyo risezeranwa niriramuka ryihanye kandi kuri buri torero Yesu yagiye yigaragaza.

Muri iyi mijyi harimo ibintu bitatu biyiranga ari nabyo bituma abakirisito baho baragiraga ikibazo. Icya mbere iyi mijyi yose nimureba ku ikarita ku bafite bibiliya zirimo ikarita . Iyi mijyi yari iyo ku mihanda y’amahuranirizo kuberako muri iki gihe Yohana yandikaga, isi y’icyo gihe abaroma bamaze gufata ubutegetsi basizeho icyo bitaga “Pagise romana” yatangiye nyuma yo kuvuka kwa Yesu ikomeza kugeza igihe ubwami bw’abaroma bwaviriyeho. Abaroma Barabanje baravugango tugiye gushyiraho amahoro kubera imbaraga za Roma , barabanza bajya ,mu Nyanja bakuramo abajura , mujya mwumva abapirate ku nkengero za Somaliya bibye amato bagaca abantu amafaranga menshi ngo bayarekure. Icyo gihe cy’abaroma na mbere yabo mu Nyanja ya mediterane habagamo abapirate benshi , Roma yashyizemo amato yabo a bakuramo abapirate.

Iyi mijyi yari imijyi y’ubucuruzi, yari imijyi irimo ingoro z’ibigirwamana by’abagiriki, yari imijyi irimo inzoga n’ubusambanyi .


Buri mujyi wagiraga ikigirwamana cyawo.

Muri Efeso : Aha ni hamwe Pawulo yagiye baramubwirago aruteme y’abanyefeso irakomeye , mu bagiriki iyi mana yitwaga aruteme yitwaga diyane, yari imana y’ingore. Aho icyo kigirwamana cyabaga habaga utubyiniro cyangwa utubari kuko iyo bajyaga kuramya dayana cyangwa aruteme barabyinaga kugeza igihe bambara ubusa bikageza igihe bakora ibindi bintu bibi , kuba mu mujyi nkuwo rero uri umukirisito hari ubwo bakubwirango wowe warahombye cyane cyane nk’urubyiruko, bakababwira ngo hariya haba sex y’ubuntu, uragenda ukabyina abantu bamara guta mashati n’amajipo ibisigaye mukinezeza , ugasanga rimwe na rimwe n’abakirisito nabo baragwa mu mutego wo kujyayo kandi nuno munsi birahari, hari igihe abakirisito bagenda bakajya mukabyiniro bakakubwirango ariko n’ubundi pasite birabujijwe kubyina ? ko tujya tubyina mu rusengero se , ariko burya biterwa naho ubyinira kuko mu kabyiniro no mu rusengero biratandukanye.

Muri Simuruna: uyu munyi wo ufite umwihariko ukomeye cyane, muzi intambara yabaye mu bakirisito kuko bashakaga ko baramya umwami w’abami w’ abaroma. Uyu mujyi wa simurina niho ishusho ya tiberiyusi umwami wambere w’abaroma yariri, habayeho ipiganwa , niho batangiye gusenga umwami. Bakoze ishusho y’umwami tiberiyusi , noneho imijyi itandandu yagombaga kurushanwa, bakareba umujyi usanzwe ukomeye, usanzwe uzwi, ushobora kwakira iyo shusho akaba ariho batangira kuramya umwami hanyuma simuruma aba ariyo ibitsindira kandi iki kintu cyo kuramya umwami ntabwo cyari ikintu kigoye, ntabwo bagusabaga ibintu byinshi kuko byageze aho muri buri mujyi haba ibiro cyangwa ingoro yo kuramya umwami ariko icyo basabaga buri muturage cyari cyoroshye waragendaga ukajya muri iyo ngoro yitiriwe kuramya umwami, harimo ibintu bacana ukagenda ukiyandikisha ukivuga mu izina ko uje kuramya umwami hanyuma umwanditsi w’umujyi akaguha Serifika (certificate) yuko wakoze umuhango wo kuramya umwami. Ukayijyana ukayimanika munzu yawe bazaza gusuzuma bakazasanga uwawe murimo warawukoze, urumva kuba umukirisito mu mujyi nkuwo waranze kujya kuramya umwami iyo bazaga bagasanga nta cyemezo ufite cyo kuramya umwami ubuzima bwawe bwabaga buri mu kaga. Uyu mujyi wa simuruna niwe wabanje mbere gushyirwamo ingoro yo kuramirizamo umwami.

Tuzakomeza ubutaha twumve ikigirwamana umujyi wa Perugamo wasengaga, twumve ubuzima abakirisito baho bari babayeho

Imana ikomeze ibahe imbaraga kugirango murusheho kubana nayo no mu bikomeye , mukomere mubyo mwizeye umwami azabashoboza kuba intwari aho rukomeye.