Incamake y’ ishusho y’igitabo cy’Ibyahishuwe (Igice 2) Rev Pastor Antoine RUTAYISIRE

Ikindi kintu kigaragara muri iki gitabo cya Yohana, cyanditse neza cyane ni nko gutera umwete abakirisito. Igice ya mbere atangira akwereka Yesu na Yohana ku kirwa cya Patimo. Yohana ari ku kirwa cya Patimo ahorwa ubutumwa bwiza ajya mu mwuka abona Yesu yazutse mu bwiza bwe amusobanurira ko ariwe ufite urufunguzo rw’urupfu n’ikuzimu.

Urumvako kiriya gice cya mbere cyonyine kidushushanyiriza uburyo igitabo cyose giteye: Ari ku kirwa cya Patimo, bamutotereza gukunda Yesu no kumukorera ariko Yesu aramusanga aramubwira Yohana ntuhangayike, arabanza aramubwirango nanjye Shobuja nari narapfuye none ndi muzima kandi ubu ni njyewe ufite urufunguzo rw’urupfu n’ikuzimu, ntucike intege, none wandike ibyo ngiye kukwereka. Igice cya mbere ni Yohana umaze gusubizwamo imbaraga, arangije aramubwirango andikira bene so bari mu matorero arindwi ari muri Aziya. Igice cya 2 ni cya 3 , Yohana aba arimo kwandikira amatorero yo muri Aziya ) ariko yose ajyenda ayabwirango nzi imirimo yawe, nzi ibyo wihanganiye, nzi n’ibyakunaniye uretse itorero rya Lawodokiya n’irya Sarudi bashimwe, ntacyo banengwa.

Igice cya 4 gitangira Imana imubwirango egera hejuru ngire ibindi nkwereka, iramubwirango ibi nibyo urikubona mu isi , ngwino nkwereke ibyo mubikiwe mu ijuru, Nibwo abona bya bizima n’abakuru barimo kuramya Imana no mu gice cya gatanu barimo kuramya umwana w’intama w’Imana. Aravugango ni byiza iyi si ndimo ndabona irimo kungora , ibyo tubikiwe ni byiza aravugango burya kwihangana ni ngombwa. Urebye uko igitabo cyanditse kigenda kitwereka ibirimo kubera ku isi kikagenda kituzamura mu by’ijuru. Igice cya 6 kugeza ku cya 9 avuga ibyago by’uburyo butandukanye n’ibimenyetso.

Igice cya 4 kugeza 5,Yohana yerekwa mu ijuru uko hasa, noneho akagaruka ku isi. Mu gice cya 6 akabona Yesu amena ibimenyetso, buri kimenyetso amena haza ibyago. Amena ikimenyetso kimwe haza inzara nayo iza mu buryo bw’ibishushanyo tuzabona nitubigeraho, akamena ikindi kimenyetso hakaza intambara, ariko wibuke umena ibimenyetso ni Yesu bivugango amateka yose yo ku isi niwe uyagenzura ayaganisha ku iherezo ryo kuvanaho ibibi ibyiza bikaganza. Iyo ugeze ku gice cya karidwi na none nyuma yo kumwereka ibyo byago byose arongera akamuzamura ku musozi wera: Akamwereka abera hamwe na Yesu bambaye amakanzu akamubwira ngo abo ni bande ? Ni abameshe ibishura byabo mu maraso y’umwana w’intama bavuye mu mahanga yose mundimi zose. Igice cya 12 kugeza ku cya 14 amwereka neza inkomoko ya ya ntambara hagati y’ikibi n’ikiza, akabona inyamaswa iva mu Nyanja, akabona inyamaswa iva mu butaka , akabona ya nyamaswa ifite amahembe abiri nka y’umwana w’intama irikuvuga nk’ikiyoka, akamwereka noneho intambara ikomeye n’inkomoko yayo yarangiza mu gice cya 14 akongera akamwereka mu ijuru, akabona abera bari hamwe n’umwana w’intama w’Imana. Akagaruka mu gice cya 15, 16 na 17 avuga inzabya 7 noneho bamena umujinya w’Imana ku isi ariko byarangira mu gice cya 19 akongera akamusubiza mu ijuru akumva baramya Imana bavugango iraguye babuloni , ubona iteka ari urugendo rumeze rutyo hasi mu isi hejuru mu ijuru. Ibyago mu isi, umunezero mu ijuru . kugeza ubwo agera mu gice cya 20, satani n’ingabo ze na wa muhanuzi w’ibinyoma n’abanyabyaha bose bajugunwa mu nyanja yaka umuriro, noneho Imana iravugango byose ndabirangije dore byose ndabihindura bishya.

Hari ibintu bimwe tugomba gusobanukirwa, reka tujye ku mfunguzo zidufasha kumva kino gitabo. Hari imfunguzo zimwe igitabo ubwacyo kiduha kuko nko mu gice cya 1 haravugango ufite inyenyeri hirya akadusobanurirako izo nyenyeri ari abamarayika, akadusobanurirako amatabaza ari amatorero, nimusoma hari aho muzahita mubona ubusobanuro buboroheye hanyuma igice 17 umurongo wa 1 kugeza 5 bavugamo marayika ukomeye barangiza bakadusobanurira uwo marayika ukomeye ngo ni Babuloni ariko wakitegereza ukumva bavugango uwo marayika ukomeye yicaye ku misozi irindwi(7) . Ugahita umenyako yanze kuvugako ari Roma irimo itoteza, ayita Babuloni, ayita Egiputa ariko kuko Abayuda bari bazi icyo Babuloni yabakoreye nicyo Egiputa yabakoreye bakamenya ibyo ari kuvuga. Mu mvugo zizimije mu bitabo bya apokaributike bakoresha umugore bashaka kuvuga ubwoko runaka niyo mpamvu nitugera mu gice cya 12 tuzahasanga umugore ufite inyenyeri urwana n’inzoka, abakatolike baramusobanura bakavugango buriya ni bikiriyamariya, Abayuda bakakubwira ati oya ntabwo ari bikiramariya uriya ni ubwoko bwa Isirayeli.

Abakirisito bavugako uriya mugore ashushanya itorero rya kirisito rirwana na satani uko byagenda kose aba batatu baba bavuga ukuri, kuko mugishushanyo cy’umugore bose barimo. Mu bitabo bya apokaributike habamo abagore babiri: tuzabibona mu gice cya 17 na 18 harimo undi mugore ariko wa maraya, ufite mu ntoki ze igikombe kirimo ibizira byose kandi wahaze amaraso y’abera, iyo ibi ubisomye uhita wumva uwo ariwe: ni Roma, ni Babuloni, ni Egiputa, nkuko Yohana yabyanditse ariko Roma ntayo yashyizemo kugirango atiteranya gusa avugako uwo maraya yicaye ku misozi irindwi kandi mu gihe cyabo bo bari babizi. Abazi amateka Roma yari yubatse ku misozi irindwi nubwo yayise Babuloni cyangwa Egiputa ariko ni Roma. Amahembe iteka ryose ashushanya ubutware , mu gice cya gatanu n’ahandi hose mu Ibyahishuwe habamo amaso, amaso iteka ryose asobanura gusobanukirwa, iyo twigiye hirya mu gice cya 8 kugeza 11 harimo impanda, impanda iteka ryose muri bibiliya ni ikimenyetso cy’ijwi riburira, ribwira abantu ngo imbuzi ariko ivuye mu ijuru. Harimo n’amakanzu, amakanzu yera, mu gice 6:11, amakanzu yera mu gice 6 ashushanya ubwiza bw’Imana ariko ahandi agashushanya imirimo yo gukiranuka y’abera ndetse baranayisobanura mu gice cya 19 babivuga neza.

Hanyuma ikindi, mu gice 6:11 harimo amakamba ni igishushanyo cy’ubutware. Hanyuma rero harimo imibare, mu bitabo bya apokaributike harimo imibare igera kuri ine ikomeye cyane, ikunze kugaragara ni 3, 4,7,10 na 12 indi yose igaruka muri iyi ngiyi. Iyi mibare urebye nka hano mu byahishuwe, wenda reka mbahe urugero nko mu byahishuwe umubare 7 uza inshuro 52. Harimo za hahirwa 7, harimo amatorero 7, harimo ibitereko by’amatabaza 7, harimo imyuka 7, harimo inyenyeri 7, harimo ibimenyetso 7, harimo amakamba 7, harimo ibyago 7, harimo inzabya 7 za zahabu , harimo imisozi 7, harimo abami 7 usanga aka karindwi kagaruka haba mu bibi cyangwa mu byiza. Karindwi muri apokaributike ni umubare w’ikintu cyuzuye. Imana yaremye isi mu minsi 7 , karindwi bisobanura kuzura.

Undi mubare ugaruka kenshi ni 3 na 4 ni 10. Murebe ukuntu bishimishije 7 kaboneka uteranyije 4 na 3. 10 ni 7 +3. Naho 12 ni 3 ukubye 4, usanga bakomeza bakina niyo mibare. Baravugango nuko mbona abatowe ibihumbi 144 iyo ubifashe ukabisesengura usanga ahari 10 bivuga kuzura kw’Imana. Kuberako bandikaga kuburyo ababigenewe babyumva ariko abatabigenewe ntibabashe kubyumva hari ibintu basa nkabacurikiranya hamwe akwereka Imana, mu rundi ruhande akakwereka satani ariko amaherezo akakwerekako izi mbaraga z’Imana zizanesha iza satani, akakwigiza hepfo akakwereka abizera barimo gutotezwa n’abasenga inyamaswa ariko akavugango mwihangane nubwo mutotezwa ariko amakamba y’imperuka ni ayanyu, bariya bazajya mu Nyanja yaka umuriro. Bagafata umugore, bagafata umugeni wa kristo wambaye ibyera bakababangikanya na maraya ukomeye wicaye ku misozi 7 ariko amaherezo nawe akarangira agiye mu Nyanja yaka amazuku.

Apokaributike zabaga zubatse muri ubwo buryo , ariko muhumure abera b’Imana muzataha, muhumure abera nubwo babatoteza nubwo babica kuko iwacu si mu isi.

Ndagirango mubonye umusogongero ubafasha gukomeza, ntimwibeshye ngo mwabyumvise, nukugerageza. Uko tuzagenda tubyiga muzarushaho kubyumva. Ubutaha tuziga igice 1 kugeza 3 kuberako iki gitabo ari kinini ntitwakiga buri gice kimwe tuzakirangize. Igice cya 4 ni 5 ni ukuramya naho icya gatandatu ni ibimenyetso, icya 7 tubona abera mu ijuru, icyamuna 8 tukagaruka ku nzabya n’impanda.

Mureke tugarukire aha ngaha yari umusegongero w’Ibyahishuwe ibindi tuzabikomeza. Nubwo Yohana yandikiye amatorero arindwi ariko uno munsi nitwe torero turi ku isi. Kandi tuzareba biriya yandikiraga amatorero natwe turabifite. Hari ukuba mu gitabo cy’ubugingo ukajya mu ijuru ariko hari no kugira ibindi ukora kuko nabyo tuzabihemberwa.

[email protected]