Impamvu zitera abayobozi b’amatorero kugwa

“Ahubwo umuntu wese yoshywa iyo akuruwe n’ibyo ararikiye bimushukashuka. Nuko iryo rari riratwita rikabyara ibyaha, ibyaha na byo bimaze gukura bikabyara urupfu.”(Yakobo1:14-15)

Ese niki gitera abayobozi b’amatorero kugwa, bakagwa kimwe nk’uko abandi bakristo bagwa? Ni uko bamwe bakururwa n’ibyo bararikiye bikabashukashuka, nuko iryo rari rigakura rikabyara ibyaha.

Reka turebere hamwe uko ibyaha byinjira bikagusha abantu:

Gutekerezako udashobora gukora ibyaha

“Nuko rero uwibwira ko ahagaze, yirinde atagwa.”( 1Abakorinto 10:12). Uyu murongo utubwirako n’ubwo ushobora gutekerezako uhagaze , ukwiye kwitonda kugirango utagwa.

“Kwibona kubanziriza kurimbuka, Kandi umutima wirarira ubanziriza kugwa.(Imigani16:18). Ubwibone bushobora kukuvugisha ngo “sinzasambana”, ntibizambaho , ariko ukwiye guca bugufi ukavuga ngo” kubw’ubuntu bw’Imana, sinzakora ibyaha, kandi nzabyirinda mbishobore”.

Hari byinshi byatuma ucika intege ukagwa ariko imbaraga zawe zikwiye kugaragarira ahari intege nke :

“Ni cyo gituma ku bwa Kristo nzishimira intege nke zanjye no guhemurwa, nzishimira n’imibabaro no kurenganywa n’ibyago. Kuko iyo mbaye umunyantege nke ari ho ndushaho kugira imbaraga.”(2Abakorinto 12:10)

Ntakindi kwibona kuzana uretse gukingura amarembo y’ubugoryi, bigahinyura ukuri. Kwemera ibyaha byawe n’intege nke zawe si inyundo igukubita mu mutwe ahubwo ni ijwi rihumuriza umutima wawe.

Kutabonera umwanya Imana

Akenshi dushyira Imana ku mwanya wa kabiri. Ariko nitugira ubuzima bw’isengesho bushyira Imana imbere bizaduhuza na yo kandi abantu bazabaho neza nibasenga. Igihe uretse gufata umwanya wo gusenga uba waguye. Birakomeye kuba wagwa igihe umwanya munini uwumara uri ku mavi usenga.

Ukwiye gufata umwanya ugakora ibyo ijambo ry’Imana rigusaba. Ukwiye kwihererana n’Imana, ukiga n’ijambo ryayo kandi ukaryubaha, bizongera ubusabane bwawe na yo kandi igukomeze. “Ariko rero mujye mukora iby’iryo jambo, atari ugupfa kuryumva gusa mwishuka”(Yakobo1:22)

Inshuro nyinshi uzabona abayobozi bagwa , ni uko baba batakigira umwanya w’isengesho mu buzima bwabo.

Kudakiranuka

Umwanzi ahora ashaka uko yadutandukanya no gukiranuka kw’Imana. Abenshi muri twe bongera gusubira mu byaha kuberako batacengeye ngo bamenye neza gahunda y’uburinzi bw’Imana binyuze mu kwera no gukiranuka kwayo.

Gukiranuka ni intwaro ikwiye kudukingira ibitero bya satani. “Muhagarare mushikamye mukenyeye ukuri, mwambaye gukiranuka nk’icyuma gikingira igituza.”(Abefeso6:14). Ikigero kidashyitse cyo gukiranuka kigutera gucika intege aho kwihana . Ibitekerezo byawe ntibishobora kuba byuzuye umwijima nurangiza wiringireko umucyo wa Kristo uzarasira ubuzima bwawe.

Abenshi bikundira kubaka umubano n’abo badahuje igitsina akenshi usenya

Aha abayobozi b’amatorero bakwiye kuhitondera cyane kandi aha hantu bakahitwara neza. Satani ntakwereka ibyabera muri gahunda yo guhura utanga inama, inama zimwe na zimwe zo mu biro, umubano wihariye, n’ibindi… Ashobora kukuyobya ukaba wagira indi mitekerereze mibi kandi ukumva uri mu murimo mwiza wo gufasha abandi.

Niba warashatse, ukaba ugikururwa n’abandi bantu cyangwa ukumva urakururwa n’izindi mbaraga, gerageza ushake uko wakwikura aho hantu. Ubusambanyi butangirira mu mushyikirano woroheje usanzwe. Biroroshye gukururwa , ejo ugatangira gushyikirana, ejo ugatangira kugira amahitamo mabi, ukazisaga wageze hasi waguye, wasambanye.

“Muzibukīre gusambana. Ibindi byaha byose umuntu akora bikorerwa inyuma y’umubiri, ariko usambana aba akoze icyaha cyo mu mubiri we.”(1Abakorinto6:18)

Kutita ku inshingano zawe

Inshingano zawe ntizikwiye kubazwa undi. Ukwiye kwita ku nshingano zawe kuko ari uburinzi kandi umutima wawe ukwiye kuba mu kubaha ijambo ry’Imana. Nukora inshingano zawe neza , bizakongerera uburinzi mu rugamba rwo kurwanya icyaha.

Satani akunda gukorera mu mwijima ngo atuyobye. Ariko uko ushyira imbaraga muku murwanya, niko uzabona imbaraga z’umwuka n’ubushobozi bwo kumwirinda.

Niba wendaga kugwa cyangwa wararangije kugwa, fata igihe wihane. Biravuna ariko bizabyara imbuto.
“Ariko nimutagenza mutyo muzaba mucumuye ku Uwiteka, kandi mumenye neza yuko icyaha cyanyu kizabatoteza.”(Kubara32:23)

Niwihana uzabona ubuntu bw’Imana, kandi umuntu wihannye ava mu byaha, agakora inshingano ze nta soni, nta gishyika cyangwa umujinya. Ukwiye gushaka ikiganza cy’Imana gikiza kuruta kubaho ukomerekeye hanze y’ubuntu bwayo.
Umuyobozi w’itorero akwiye kuba intangarugero, akayobora intama neza ,akazereka inzira igana ijuru, akazabirata nk’iminyago yakuye mu isi .

Sophie @ agakiza.org