Impamvu 3 zikwiye gutuma uhora ushima Imana no mugihe cy’ingorane

“Mwishime iteka, musenge ubudasiba, mu bibaho byose muhore mushima, kuko ari byo Imana ibashakaho muri Kristo Yesu.”(1 Abatesalonike5:16-18)

Bibiliya itubwirako dukwiriye kuba abantu bahora bashima Imana muri buri kintu cyose duhura nacyo. Abenshi muri twe bagerageza kubikora ariko bikabananira kuko akenshi na kenshi bahura n’ingorane zibabuza gushima , ariko niba tutabona impamvu yadutera gushima tuzahora mu maganya adashira bityo duhinyure amashimwe yacu.

Yego birashoboka hari inzira yadutera gushima , niyo mpamvu dukwiye kwitoza guhora dushima iminsi yose .
Abenshi muri twe bashobora gutekerezako Imana yikunda , ari inyagitugu ishaka guhora ishimwa n’ubwo twe dushobora kumva tudafite impamvu yo kuyishima. Tureba ubuzima tubayemo tukabona ibibazo, ububabare , umunaniro ,ubukene, … Igihe ibi bihe bitugezeho, twumva nta mpamvu yo gushima Imana, bikatubera nk’umutwaro kuyishima kuko nta cyiza tuba tubona. Iyo tutabona ineza yayo mu mibereho yacu kuberako tuzengurutswe n’ibintu bidashimishije , bidutera kubura impamvu yatuma tuyishima.
Nshuti Imana si nyamwigendaho ahubwo ishaka kwakira amashimwe no mugihe turi mu ngorane. Bibiliya itubwirako Imana izi imibabaro yacu kandi ihora ishaka kuyidukiza. Ishaka ko tugira ubushobozi bwo kuyishima kuko ibikwiriye , dushobora kumva idahari ariko iba itwitayeho kandi iduhozaho ijisho.

Kugira ngo tube abantu bahora bashima buri gihe, hari ibintu ukwiye guhora ukora buri munsi :

Tekereza imigisha yose wagiye ugira

Reba imigisha yose wagiye ugira,muri wowe bizagenda bigufasha kugira umuco wo gushima. Suzuma amasengesho wasenze niba Imana yarayasubije maze bigutere gushima kuko n’ibyo itakoze izabikora.

Ukwiye nanone gusubiza amaso inyuma ukibuka igihe Imana yagukoreye ikintu cyiza. Birashoboka ko utabonye amafaranga ariko ukabona ikindi kintu cyiza nko kunguka inshuti y’umumaro,kuguhuza n’ abo mutaherukanaga n’ibindi byinshi. Ibyo byose rero bikwiye kugutera gushima.

Ibuka intambara zose Imana yagukijije

Zirikana ingorane zose wagiye uhura nazo maze Imana ikahaba. Birashoboka ko abenshi bafite ibihe banyuzemo biruhije mu mibereho yabo ariko Imana ntitume bibageraho kuko ari nziza kandi yari ibafiteho umugambi mwiza. Reba ingorane zose Imana yagutambukije maze uyishimire ineza yayo.

Tekereza ko kuva kera Imana yari ikuzi

Umvako Imana yahabaye ibihe byose ko kuva kera yari ikuzi . Imana iragukunda cyane na mbere y’uko uvuka, ijisho ryayo ryari rikuriho ukiri munda ya mama wawe kandi ikomeza kukwitaho. Niyo mpamvu ibyishimo biba byinshi iyo ugiye kuri Yesu ukihana.( Zaburi 139:13-18, Luka 15:7, 10)

Mu buzima tubayemo dushobora kumva Imana idahari ariko muby’ukuri iba ihari. Ntizatureka cyangwa ngo idusige nk’uko isezerano ryayo riri , niyo mpamvu dukwiye guhora tuyishima igihe cyose.

[email protected]