Imirongo ya bibiliya yagukomeza igihe ineza yawe yiturwa inabi

Umwami Yesu yatubwiyeko atwohereje nk’intama mu birura. Kubw’izo mpamvu ni ibihamya by’uko tudakwiye gutungurwa igihe tubabajwe cyangwa turenganyijwe. Byaba bitangaje uramutse wumvako uzahora ugenzerezwa neza , ahubwo ukwiye kumenyako turi mu isi yakoze icyaha ukakira ibikubaho.

Ibi bivuzeko tudakwiye kugira ipfunwe ryo kugirira neza abandi kubera gutinya kugirirwa nabi. Dukwiye gukomeza gukora neza uko tubishoboye. Nibyiza ko abakristo baza ku Mwami igihe cyose biturwa inabi na satani kubw’ibyiza bakora. Umwami Yesu ubwe yumva uko baba bamerewe, kandi azi uburyo abafasha akabatera imbaraga zo gukomeza urugendo no kubakomeza.

Kugira ngo tugufashe kurenga ingorane zizanwa na satani kubw’ibyiza ukora no kugufasha gukomeza inzira yo kukomeza gukora neza. Aha hari imirongo ya bibiliya yo kugukomeza:

Kristo ni we Rugero wihanganiye byose

“Nuko natwe ubwo tugoswe n’igicucu cy’abahamya bangana batyo, twiyambure ibituremerera byose n’icyaha kibasha kutwizingiraho vuba, dusiganirwe aho dutegekwa twihanganye dutumbira Yesu wenyine, ari we Banze ryo kwizera kandi ari we ugusohoza rwose, yihanganiye umusaraba ku bw’ibyishimo byamushyizwe imbere ntiyita ku isoni zawo, yicara iburyo bw’intebe y’Imana.
Nuko muzirikane uwo wihanganiye ubwanzi bw’abanyabyaha bukomeye butyo, kugira ngo mudacogora mukagwa isari mu mitima yanyu.” (Abaheburayo12:1-3)

Kristo afite ubushobozi bwo kudufasha kuko nawe yabaye kimwe na twe

“Kandi rero tuzi yuko atari abamarayika yatabaye, keretse urubyaro rwa Aburahamu. Ni cyo cyatumye yari akwiriye gushushanywa na bene Se kuri byose, ngo abe umutambyi mukuru w’imbabazi kandi ukiranuka mu by’Imana, abe n’impongano y’ibyaha by’abantu. Kuko ubwo yababajwe no kugeragezwa ubwe, abasha no gutabara abageragezwa bose.” Abaheburayo2:16-18)

Kristo ababarana natwe

“Nuko ubwo dufite umutambyi mukuru ukomeye wagiye mu ijuru, ari we Yesu Umwana w’Imana, dukomeze ibyo twizera tukabyatura. Kuko tudafite umutambyi mukuru utabasha kubabarana natwe mu ntege nke zacu, ahubwo yageragejwe uburyo bwose nkatwe, keretse yuko atigeze akora icyaha. Nuko rero, twegere intebe y’ubuntu tudatinya, kugira ngo tubabarirwe tubone ubuntu bwo kudutabara mu gihe gikwiriye.”(Abaheburayo4:14-16)

Turi mu isi yanduye kandi satani ahora aduhiga ngo tuve mu byizerwa , ni yo mpamvu dukwiye gukora neza tudatinya kubabazwa no kugambanirwa kuko Kristo ari we rugero wahuye n’ ibyo byose kandi aba yiteguye kudutabara mu makuba yose , iyo tumwiziritseho.

Imana idushoboze gukomeza urugendo kwihanganira ibitugerageza.

[email protected]