Imirongo ya bibiliya igusubizamo imbaraga niba ucitse intege

Kutagera kubyo ugambiriye ni ibintu bisanzwe mu buzima, ntidukwiye kwiringirako icyo dukoze cyose cyigenda uko tucyifuza:twabuze byinshi ku munota wa nyuma, imishinga yacu yarahombye,hangiritse ibikoresho byatugiriraga umumaro , ntitwabashije gusaba imbabazi mu gihe cyari gikwiye n’ibindi byinshi cyane umuntu aba agambiriye kugeraho ntibigende uko abyifuza.

Abenshi muri twe bacika intege nyuma yo kugerageza inshuro nyinshi byanga, niko bigenda iyo dutsinzwe inshuro nyinshi bikagera n’ aho tugiye kumenyera ijambo gutsindwa cyangwa kutagera kucyo twiyemeje,mbese bikaba kuvomera mu kiva ariko ntidukwiye kumera gutyo, kuko mugihe tugihumeka haba hakiri ibyiringiro.

Aha hari amagambo yagusubizamo imbaraga niba ujya ugerageza kenshi bikanga :
Ese uziko uwo mwuka uhumeka uri mu bihaha byawe uturuka mu kanwa k’Uwiteka?

Mu gitabo cy’itangiriro hagira hati:« Uwiteka Imana irema umuntu mu mukungugu wo hasi,imuhumekera mu mazuru umwuka w’ubugingo,umuntu ahinduka ubugingo buzima. »
Tekerezako umwuka uhumeka uva ku muremyi waremye ijuru n’isi.
Mu gihe ukiri muzima, ibuka ko Imana ariyo ikigutije ubuzima,igufitiye umugambi ugomba kuzuza. Ugomba kuyihesha icyubahiro mu byo ukora byose.Kuko wabonye amahirwe yo kubaho,ntukwiye gutakaza icyizere nyuma yo gutsindwa.ugomba gukomeza kwiringira Imana.

Iyi ni imwe mu mirongo yo muri bibiliya yagufasha

Kugirango tugufashe gukomeza kwizera na nyuma yo gutsindwa inshuro nyinshi, hano hari imwe mu mirongo ya bibiliya wasoma,ukayitekerezaho ,ukanayubaha.

Imigani24:16

“Kuko umukiranutsi naho yagwa karindwi yakongera akabyuka, ariko abanyabyaha bazagushwa n’amakuba.” (Imigani24:16)

Abantu bose bafite ibyiringiro ku Mana bazahaguruka, hatitawe ku nshuro baguye kuko Imana ibafasha.Ntutakaze icyizere mu buzima kuko Imana ariyo iba mu ruhande rw’abayizera.

1Samuel 16:1

“Bukeye Uwiteka abaza Samweli ati “Uzageza he kuririra Sawuli, kandi nanze ko aba umwami wa Israyeli?Uzuza ihembe ryawe amavuta ngutume kuri Yesayi w’i Betelehemu, kuko niboneye umwami mu bahungu be”.(1Samuel 16:1)

Samweli, umwe mu bahanuzi bakomeye bo mu isezerano rya kera, yaririye Sawuli umwami yari yarimitse ngo ayobore Isirayeli.Imana ariko yari ifite indi migambi itandukanye ni ye , asaba Samweli kongera kugaruka ku murimo we.
Imana ihora ikora ibintu bishya kuri twe ,ntidukwiye gucika intege kuko ntiducika intege bizatugira impumyi ntitubashe kubona ibyiza idukorera.

Abafilipi 1:6

“Icyo nzi neza rwose ntashidikanya, ni uko Iyatangiye umurimo mwiza muri mwe izawurangiza rwose, kugeza ku munsi wa Yesu Kristo.( Abafilipi 1:6)

Imana ntijya isiga umurimo wayo utarangiye.Niba yaratangiye umurimo muri twe, izanawusohoza.Ntizahagarara gukorana natwe,ititaye y’uko tujya tunanirwa, ahubwo dukwiye guhora tuyikurikiye.

Abaroma 8:37-39

“Oya , ahubwo muri ibyo byose turushishwaho kunesha n’uwadukunze, kuko menye neza yuko naho rwaba urupfu cyangwa ubugingo, cyangwa abamalayika cyangwa abategeka, cyangwa ibiriho cyangwa ibizaba, cyangwa abafite ubushobozi cyangwa uburebure bw’igihagararo cyangwa uburebure bw’ikijyepfo, cyangwa ikindi cyaremwe cyose, bitazabasha kudutandukanya n’urukundo rw’Imana ruri muri Kristo Yesu umwami wacu.”( Abaroma 8:37-39)

Nta gipimo gihari cyo gutsindwa ,kutagera kucyo ugambiriye ntibikwiye kudutandukanya n’urukundo Imana idukunda.Tugomba kuzirikana ko urukundo idukunda ruhoraho n’ubwo twaca mu ntambara n’ibikomeye by’ubuzima by’uburyo bwose.

Imigani 3:5-8

“Wiringire Uwiteka n’umutima wawe wose, we kwishingikiriza ku buhanga bwawe.Uhore umwemera mu migendere yawe yose, Na we azajya akuyobora inzira unyuramo.Ntiwishime ubwenge bwawe,ujye wubaha Uwiteka kandi uve mu byaha.Bizatera umubiri wawe kuba mutaraga, ukagira imisokoro mu magufwa yawe.”(Imigani 3:5-8)

Nta mpungenge rero y’ibyo duhura nabyo, ntidukwiye kubishyira mu biganza byacu ahubwo tugomba buri gihe kwizera Imana.Twahura n’ibyiza cyangwa ibibi,twatsinda cyangwa twatsindwa,tuzakora neza kandi tuzabaho neza nidutinya Imana tukanayizera igihe cyose.

[email protected]