Imirongo ya bibiliya igaragaza icyubahiro cy’Imana

Ijambo icyubahiro ryagiye risobanurwa cyane cyane mu magambo y’igiheburayo n’ikigiriki haba mu isezerano rya kera n’irishya. Inkomoko yaryo mu giheburayo ni ubudahangarwa cyangwa ubushobozi, mu kigereki rigasobanura agaciro cyangwa gushima. Iyo ijambo icyubahiro rikoreshejwe ku Mana, risobanura icyubahiro cyiyihabwa kubera ibyiza byayo by’agaciro, ubushobozi n’ubuyobozi ifite n’uko yagiye yiyerekana ku kiremwa muntu.

Imana yagiye yerekana icyubahiro cyayo mu gihe abantu bishyiraga hejuru ikabacisha bugufi ndetse bamwe ikabarimbura ikerekana gukomera kwayo imbere y’amahanga.

Iyi ni imirongo 9 yo muri bibiliya yerekana icyubahiro cy’Imana:

1.“Nanjye ndanangira umutima wa Farawo abakurikire. Nziheshereza icyubahiro kuri Farawo no ku ngabo ze zose, Abanyegiputa bamenye yuko ndi Uwiteka.”(Kuva:14:4)

Imana yiheshereje icyubahiro mu gihugu cya Egiputa ubwo Farawo yinangiraga umutima yanga kurekura ubwoko bwa Isirayeli, maze ingabo za Farawo zose azimarira mu nyanja.

2. “Mu maso y’Abisirayeli, ishusho y’ubwiza bw’Uwiteka yameraga nk’umuriro ukongora ku mutwe w’uwo musozi” (Kuva24:17) .

Iki ni igihe Imana yahamagaraga Mose kuza ku musozi wa Sinayi , aho yamuhereye ibisate by’amabuye biriho amategeko n’ibyategetswe bagombaga gukurikiza. Abisirayeli ntakindi babonaga uretse icyubahiro cy’Imana cyabonekaga kuri uwo musozi Mose yariho.

3. “ Ibera Isirayeli amaboko ntibeshya, kandi ntiyihana kuko atari umuntu ngo yihane.”(1Samueli 15:29)
Aha Imana yihesheje icyubahiro ubwo Sawuli umwami wa Isirayeli yasuzuguraga Imana ntiyumvire icyo imutegetse ikamukura ku ngoma.

4. “ Mwaturire Uwiteka yuko izina rye rifite icyubahiro, muze imbere muzanye ituro, musengane Uwiteka ubwiza bwo kwera.”( 1 Ngoma 16:29)

5. “Bana b’abantu, muzageza he guhindura icyubahiro cyanjye igisuzuguriro?Muzagezahe gukunda ibitagira umumaro no gukurikiza ibinyoma? (Zaburi 4:3).

Umwanditsi wa Zaburi yasabaga abantu kudasuzugura icyubahiro cy’Imana ahubwo bagahindukira bagakora ibyo gukiranuka.

6. “Ijuru rivuga icyubahiro cy’Imana, isanzure ryerekana imirimo y’intoki zayo.” (Zaburi: 1)

7. “Nimuhe Uwiteka Imana yanyu icyubahiro itarazana umwijima, ibirenge byanyu bitarasitara ku misozi iriho umwijima, kandi mwategereza umucyo akawuhindura igicucu cy’urupfu, akawugira n’ umwijima w’icuraburindi.” (Yeremiya13:16)
Iki gihe ab’inzu ya Yuda na Isirayeli banze kumvira Uwiteka kandi yari yarabagize ubwoko bw’izina, n’ishimwe n’icyubahiro ariko ntibabyumvira, ivuga ko nibatihana izihesha icyubahiro ikabarimbura.

8. “Ubwo ni bwo bazabona Umwana w’umuntu aje ku bicu , afite ubushobozi bwinshi n’ubwiza”.Mariko 13:26
Aha havugwa umunsi wo kugaruka k’umwana w’umuntu uzaza mu cyubahiro kujyana intore zakoze neza muri uru rugendo rwo ku isi,bagasaba abakristo guhora biteguye.

9. “uvuga ibye ubwe aba yishakiye icyubahiro, ariko ushakira Iyamutumye icyubahiro uwo ni we w’ukuri, gukiranirwa ntikuri muri we.(Yohana7:18)
Aha Yesu yahanaga abantu kutishakira icyubahiro cyo mu isi, ahubwo bagashaka icyubahiro cy’Imana no gukiranuka kwayo.

Icyubahiro cy’Imana cyahozeho kandi n’ubu niko biri ,birakwiye gushaka mu maso h’Imana kugirango tuvirwe n’umucyo wayo kandi duhunge umujinya wayo uzatera.
Imana iduhane umugisha!

Sophie @Agakiza.org