Imibabaro ya Yesu Kristo

Ijambo imibabaro ya Yesu (passion of Christ) ryakoreshejwe muri Tewolojiya rifite igisobanuro cyo “kwihangana” cyangwa “kuhangayika” biganisha kuva Yesu asengera mu gashyamba ka Getsemani kugeza ku rupfu rwe rwo ku musaraba, mbese igihe cy’imibabaro ye twavuga ko yari ikomeye. Bityo imibabaro ya Yesu iri mu masaha make y’ubuzima bwa Yesu mbere y’urupfu rwe (Mat 26:36–27:56, Marik 14:32–15:14, Luk 22:39–23:49, na Yoh 18:1–19:37.)

Ibyanditswe byera hari icyo bivuga ku mibabaro ya Yesu. Byongeye kandi, urupfu rwa Yesu ku musaraba nicyo kimenyetso cya nyuma kigaragaza imibabaro ya Yesu ndetse rwaje guhinduka ishingiro ry’inyigisho z’intumwa: “Kuko nagambiriye kutagira ikindi mbamenyesha keretse Yesu Kristo, ariwe Yesu Kristo wabambwe” (1 Abakor 2:2). Ni muri iyo mibabaro ya Yesu twiyungiye n’Imana.

Imibabaro ya Yesu ntabwo ari inkuru ahubwo ni iy’ukuri. Yarababajwe ndetse aranapfa. Igihe Yesu yasengeraga i Getsemani, “Data niba bishoboka, iki gikombe kindenge” (Mat 26:39), yari afite umubabaro mwinshi kubera ibyo yari agiye kubabazwa byose (Luk 22:44). Igihe yarimo akubitwa anatukwa, igihe bamutamirizaga ikizingo cy’amahwa mu mutwe, bamutoboza imisumari ku birenge no mu biganza, byose yababajwe kubw’ibyaha byacu. Ibyo byose yabyihanganiye kugira ngo akize abazamwizera.

Yesaya 53:4–12 yahanuye iby’imibabaro ya Yesu mbere ndetse aranayisobanura neza ati:

Ni ukuri intimba zacu nizo yishyizeho , imibabaro yacu niyo yikoreye, ariko twe twamutekereje nk’uwakubiswe n’Imana agacumitwa nayo, agahetamishwa n’imibabaro. Nyamara ibicumuro byacu nibyo yacumitiwe, yashenjaguriwe gukiranirwa kwacu, igihano kiduhesha cyari kuri we, kandi imibyimba niye niyo adukirisha. Twese twayobye nk’inama zizimiye, twese twabaye intatane, Uwiteka amushyiraho gukiranirwa kwacu twese. Yararenganye ariko yicisha bugufi, ntiyabumbura akanwa ke amera nk’umwana w’intama bajyana kubaga, cyangwa nk’uko intama icecekera imbere y’abayikemura, niko atabumbuye akanwa ke.

Guhemurwa no gucirwaho iteka nibyo byamukujeho. Mub’igihe cye ninde witayeho ko yakuwe mu isi y’abazima, akaba yarakubitiwe ibyaha by’ubwoko bwe? Bategetse ko ahambanwa n’abanyabyaha, yari kumwe n’umutunzi mu rugo rwe nubwo atagiraga urugomo, kandi ntagire uburyarya mu kanwa ke. Ariko Uwiteka yashimye kumushenjagura, yaramubabaje. Ubwo ubugingo bwe buzitamba ho igitambo cyo gukuraho ibyaha, azabona urubyaro, azarama, ibyo Uwiteka ashaka bizasohozwa neza n’ukuboko kwe.

Azabona ibituruka mu bise by’ubugingo bwe bumwishimishe, bimuhaze. Umuhungu wanjye ukiranuka azatuma benshi baheshwa gukiranuka no kumenya, kandi azishyiraho gukiranirwa kwabo. Nicyo gituma nzamugabanya umugabane n’abakomeye, azagabana iminyago, azagabana iminyago n’abanyamaboko, kuko yasutse ubugingo bwe akageza ku gupfa akabaranwa n’abagome, ariko ubwe yishyizeho ibyaha bya benshi kandi asabira abagome.

Yesu yaje mu isi afite umugambi wo gutanga ubugingo bwe ngo aducungure mu bubata bw’icyaha, imbaraga zacyo ndetse n’urupfu rw’iteka nkuko Pawulo abivuga ati, “Kuko utigeze kumenya icyaha Imana yamuhinduye kuba icyaha kubwacu, kugira ngo muri we duhinduke gukiranuka kw’Imana”. Na none mu gitabo cy’ibyahishuwe agaragara nk’umwana w’intama watambwe kuva isi yaremwa (Ibyah 13:8).

Ikindi Kubabara kwa Yesu Kristo gufite umumaro mu mibereho yacu ya buri munsi cyane cyane mu mibabaro ducamo. Yarayisogongeye kugira ngo abashe kutabara ababazwa bose nkuko uwandikiye Abaheburayo abivuga ati, “Kuko ubwo yababajwe no kugeragezwa ubwe, abasha no gutabara abageragezwa bose”(Abah 2:18)

By BYIRINGIRO Jean Dominique

  •