Imbaraga z’isengesho zirenze ubwenge bwa muntu.

Gusenga ni uburyo bwo kuganira n’Imana, turayibwira nayo ikatwumva kandi ikadusubiza. isengesho ni intwaro ikomeye cyane umukristo arwanisha akabasha gutsinda umubisha satani. Kuko intwaro z’intambara yacu atari iz’abantu, ahubwo imbere y’Imana zigira imbaraga zo gusenya ibihome no kubikubita hasi (2 Abakorinto 10:4)

Isengesho rigira umbaraga zikomeye igisabwa gusa ni ukugira ukwizera gukomeye kuko rimwe na rimwe Imana ikirisha abantu bayo ibintu wabona ko bidafatika mu bwenge bw’abantu.

Mu gihe Mose yari ageze ku Nyanja itukura, Farawo n’abantu be babonaga ko nta kintu na kimwe gishobora kubambutsa, nyamara Mose yakoresheje inkoni inyanja icikamo kabiri abisiraheri batambuka nkaho bari kugenda mu muhanda.

Ku rundi ruhande, ubwo Dawidi yicaga Goriyati wari warazengereje ubwoko bwa Isiraheli, yakoresheje ibuye rito ariko kuko yari afite kwizera iryo buye ryishe Goriyati. Ukoresheje ubwenge bwa muntu wasanga ibuye atari ikintu wajyana ku rugamba ugiye kurwana n’umuntu ufite intwaro zikomeye. Muri macye inkoni ya Mose n’ibuye rya Dawidi mu buzima busanzwe wabona ko ari intwaro zidasobanutse, ariko zabazaniye insinzi ku bw’imbaraga z’Imana.

Hamwe no kwizera, bituma Imana ikora ibitangaza byinshi bitarondoreka.
Bijya bishoboka ko umuntu abona kwizera kwe nk’aho guciriritse ugereranyije n’ibikomeye biri imbere ye, ariko ndagirango twumvikane kuri iki kintu: imbere y’intege nke zacu, hari imbaraga z’Imana zikomeye. Ni imbaraga z’Imana zabashije gusenya inkike z’i Yeriko, niyo mpamvu tudakwiye kwigereranya n’ibibazo bidukomereye ahubwo tujye dufata ibibazo byacu twumve ko Imana yacu ifite ububasha bwo kubikuraho.

Mugihe dusenga, ikigero cyo kwizera dufite nicyo cyerekana ko Imana izasubiza cyangwa itazasubiza amasengesho yacu. Rimwe na rimwe Imana isubiza amasengesho yacu ariko twebwe tukabura kwizera ngo twumve ko yadusubije. Mu byakoze n’intumwa 12, itorero ryasengeye Petero ngo avanwe mu nzu y’imbohe, hanyuma Imana isubiza amasengesho yabo ubwo yoherezaga Marayika akamukura mu nzu y’imbohe. Ubwo Petero yakomangaga ku rugi rw’aho abanyetorero barimo basengera, ntibigeze bemera ko ari Petero, ahubwo bakomeje gusenga ngo Imana imukure mu nzu y’imbohe.

Imbaraga z’isengesho ntizigedera ku magambo meza cyangwa uburyo bwiza tuyavugamo. Imbaraga z’isengesho kandi ntizishingira ku myifato y’umuntu urugero kuba wasenga uhagaze, wicaye, upfukamye cyangwa uryamye, ahubwo imbaraga z’isengesho ziva ku Mana ishobora byose yumva kandi igasubiza amasengesho yacu.
Isengesho riduhuza n’Imana, kandi tugomba kwitegura kwakira ibivuye ku Mana kuko ishobora guhitamo kudusubiza cyangwa ntidusubize bitewe n’ibyo twayisabye, Imana ni nk’umubyeyi, umwana asaba ibibonetse byose, nyamara umubyeyi we ahitamo kumuha ibimufitiye umumaro. Bityo rero tujye tumenya ko Imana ariyo iturobanurira ibyo igomba kuduha bikatugirira umumaro.

Source: www.topchretien.com
www.gotquestions.org