Ikintu cyagufasha kumva ishusho nyayo y’urukundo rw’Imana

Uyu munsi abakristo benshi bananirwa kumva byuzuye urukundo rw’Imana. Bazi ko Imana ibakunda, bakumvako nabo bagomba kuyikunda bityo bamwe bakumva bihagije bagahita bisubirira mu mibereho bahozemo bataramenya Kristo,bakananirwa kubona ishusho yuzuye y’uko Imana iri.

Dushobora kunanirwa kumva uko Imana iri. Dushobora kandi kuyumvaho igice. Mu yandi magambo dushobora kwibanda ku rukundo rwayo rufite ubushobozi tukibagirwa ibindi bintu byose biyerekeyeho. Muby’ ukuri Imana ni urukundo, bibiliya itubwirako Yera, ari nziza kandi itabera. Iyo tunaniwe kubona ishusho yayo y’uko iri, bituma tuyisuzugura, ntituyihe agaciro.

Abakristo benshi bo mu nsengero z’uyu munsi, ntibazi ishusho yose y’ubutumwa bwiza. Bumva ko Kristo yaje kubakiza ariko ntibiyumvishe impamvu ari Kristo waje kudukiza. Bumva ko Kristo yapfiriye ku musaraba ariko ntibumve icyatumye agomba ruriya rupfu.

Bibiliya itubwirako Imana ari Iyera kandi itihanganira icyaha. Nta muntu ushobora kwirata imbere yayo(1Abakorinto1:29). Nta munyabyaha cyangwa ikibi gishobora guhagarara imbere yayo. Nta munyabyaha utazahanwa nayo(Imigani 11:21) Twakoze icyaha, bidutandukanya n’Imana(Abaroma3:23). Ibyaha byacu byerekanaga igihano Imana yari yarabigeneye aribyo gusukwaho umujinya wayo(Abaroma1:8)

Mu rukundo rwayo, Imana yashakagako twiyunga nayo. Inzira imwe yo kwiyunga nayo ni igihe yagaragazaga gukiranuka kwayo. Birababaje ko nta muntu washoboye gukora ibyo ishaka kuberako twese twakoze ibyaha. Ariko Imana kubw’ubuntu bwayo, yohereje umwana wayo w’ikinege, Yesu Kristo kuducungura(Yohani3:16) kandi ubutumwa bwe bwo kudukiza ntibwari kubaho hatabayeho kubabara (Luka24:26).
Yesu kristo yaje kuzuza ugukiranuka kw’Imana kuri twe, twari twarananiwe kugera ku gukiranuka kw’Imana(Matayo5:17, 2Abakorinto5:21). Yaje yambaye umubiri kugira ngo ashobore gukiza abafite umubiri bose(Abaheburayo2:17). Yabayeho ubuzima budakora icyaha , byongeye kandi niwe muntu wenyine washoboye kuzuza gukiranuka kw’Imana(Abaheburayo4:15, 2Abakorinto5:21)

Itegeko ry’Imana ryavugagako amaraso agomba kumeneka kugirango tubabarirwe ibyaha(Abaheburayo9:22). Mu isezerano rya kera, amaraso y’inyamaswa zitazira yakuragaho abantu ibyaha. Kristo, yakoze ibiruta ibyo aduhanaguraho ibyaha byacu. Yikoreye gukiranirwa kose n’ibyaha byacu ku musaraba. Yesu Kristo yafashe igihano cyari kidukwiriye, umujinya w’Imana wari gusukwa ku byaha byacu. Kristo yahindutse igitambo cy’intama , amaraso ye yatumye ibyaha byacu bibabarirwa, amakosa yacu arahanagurwa.

Muri make , umujinya w’Imana wari gusukwa ku banyabyaha, yawushyize ku mubiri w’utarigeze kumenya icyaha umwana w’Imana wikoreye ibyaha byacu ku musaraba(Yesaya53). Byose ni urukundo rw’Imana: Urukundo rwanesheje icyaha binyuze mu rupfu rw’umukiza utarakoze icyaha biduha ubugingo binyuze mu kuzuka kwe.

Nshuti , ukwera kw’Imana, ubutabera, no gukiranuka byadusabagako umunyabyaha agomba guhabwa igihano cyo kubabazwa iteka ryose . Ariko urukundo rw’Imana binyuze muri Kristo Yesu yemeye icyo gihano kugirango twese tubashe kubabarirwa.

“Ni nde wizeye ibyo twumvise, kandi ukuboko k’Uwiteka kwahishuriwe nde? Kuko yakuriye imbere ye nk’ikigejigeji, nk’igishyitsi cyumburira mu butaka bwumye, ntiyari afite ishusho nziza cyangwa igikundiro, kandi ubwo twamubonaga ntiyari afite ubwiza bwatuma tumwifuza. Yarasuzugurwaga akangwa n’abantu, yari umunyamibabaro wamenyereye intimba, yasuzugurwaga nk’umuntu abandi bima amaso natwe ntitumwubahe.

Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro. Nyamara ibicumuro byacu ni byo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye ni yo adukirisha. Twese twayobye nk’intama zizimiye, twese twabaye intatane, Uwiteka amushyiraho gukiranirwa kwacu twese.

Yararenganye ariko yicisha bugufi, ntiyabumbura akanwa ke amera nk’umwana w’intama bajyana kubaga, cyangwa nk’uko intama icecekera imbere y’abayikemura, ni ko atabumbuye akanwa ke.

Guhemurwa no gucirwa ho iteka ni byo byamukujeho. Mu b’igihe cye ni nde witayeho ko yakuwe mu isi y’abazima, akaba yarakubitiwe ibicumuro by’ubwoko bwe? Bategetse ko ahambanwa n’abanyabyaha, yari kumwe n’umutunzi mu rupfu rwe nubwo atagiraga urugomo, kandi ntagire uburyarya mu kanwa ke.

Ariko Uwiteka yashimye kumushenjagura, yaramubabaje. Ubwo ubugingo bwe buzitamba ho igitambo cyo gukuraho ibyaha, azabona urubyaro, azarama, ibyo Uwiteka ashaka bizasohozwa neza n’ukuboko kwe. Azabona ibituruka mu bise by’ubugingo bwe bimwishimishe, bimuhaze. Umugaragu wanjye ukiranuka azatuma benshi baheshwa gukiranuka no kumenya, kandi azīshyiraho gukiranirwa kwabo.

Ni cyo gituma nzamugabanya umugabane n’abakomeye, azagabana iminyago n’abanyamaboko, kuko yasutse ubugingo bwe akageza ku gupfa akabaranwa n’abagome, ariko ubwe yishyizeho ibyaha bya benshi kandi asabira abagome.”

Sophie @agakiza.org