Ikigereranyo cy’inzu yo ku musenyi n’iyubatse ku rutare


“Nuko umuntu wese wumva ayo magambo yanjye akayakomeza, azaba nk’umunyabwenge wubatse inzu ye ku rutare, imvura iragwa, imivu iratemba, umuyaga urahuha, byose byikubita kuri iyo nzu ntiyagwa, kuko yari ishinzwe ku rutare. “Kandi umuntu wese wumva ayo magambo yanjye ntayakomeze, azaba ari nk’umupfapfa wubatse inzu ye ku musenyi, imvura iragwa, imivu iratemba, umuyaga urahuha, byose byikubita kuri iyo nzu iragwa, kandi kugwa kwayo kwabaye kunini.” (Luka 6.47-49)

Mu bihugu bimwe na bimwe bigize umubumbe dutuyeho tugenda twumvayo ibihe bikomeye by’ibiza ndetse n’imiyaga ikomeye, imyuzure, inkuba n’ibindi
Ibyo byose byagiye bihitana ubuzima bwa benshi bitarobanuye abakiri bato cyangwa abakuze, ariko kandi ntitwirengagize ko hariho n’ababirokoka. Imiyaga ihuha amazu yubatse aho hantu cyangwa imvura iyanyagira iba ari imwe, nyamara zimwe ziragwa izindi zigasigara zihagaze, bitewe ahanini n’uburyo zubatswemo. Ubuzima bwa buri munsi n’ibyo tunyuramo bidusigira isomo rikomeye mu buryo bw’ubumana.

Ubuzima bwa gikristo tunyuramo bugereranywa no kubaka inzu. Kumwe tugerageza twirinda ibyaha, kwera imbuto zikwiriye abihannye burya tuba twubaka, uko dusura abarwayi tugahumuriza abababaye tuba twubaka, kurya dutanga amaturo mu rusengero tuba twubaka, niyo twirinda imirimo yose ya kamere tuba twubaka inzu yacu muburyo bw’umwuka.

Inzu tuvuga hano igereranywa n’agakiza, iyo umuntu amaze gukizwa burya n’inzu aba atangiye hanyuma rero imyubakire yayo ikagenwa n’uburyo witwararika ako gakiza ndetse no gukora imirimo myiza yo gukiranuka.

Nyama nk’uko twabisomye umuntu wese wumva amagambo y’Imana ntayiteho ameze nk’umuswa wubatse inzu ye kumusenyi, naho uyaha agaciro akayakurikiza ameze nk’umunyabwenge wubaka ku rutare. Benedata imiyaga n’imvura bigerageza izi nzu biba ari bimwe ahubwo bijyana nuburyo zubatswe.

Iyo twumva ijambo ry’Imana mu rusengero ryarangira tugataha, iyo dusoma Bibiliya twarangiza tukajya mu mirimo yacu ya buri munsi burya ni kukibuga (terrain) tuba tugiye gushyirirayo mu bikorwa ibyo twumvise, hanyuma rero ibyo twumva n’ibyo dukora bigira igihe cyo kugeragezwa ngo Imana irebe ko dushyitse rwose.

Ibigeragezo n’intambara tunyuramo bisa n’imiyaga n’imvura bigerageza agakiza kacu. Bamwe barageragezwa bakahatambuka amahoro bakagera imbere bari mu mashimwe, abandi nabo bageragezwa bakivovota bakarekura umusaraba bakava mugakiza, ariko uburyo utwaye agakizza kawe bishobora kugufasha kunesha ibigeragezo. Yesu niwe rutare ruzima dukwiye kubakaho. Kuko nta nakimwe twakwishoboza ubwacu, biradusaba guhora dukurikirana ijambo ry’Imana ariko ntitwibagirwe no gusenga kugira ngo wa Mwuka wera Yesu yasezeranye kutwoherereza aze adufashe kunesha.

Gukizwa ni umurimo umwe ariko ukorwa igihe kinini. Kubaka neza rero ni ukuba umuneshi nk’uko Yesu yanesheje. Ikindi cyose wakwishingikirizaho gitandukanye no kwizera Yesu no kugendera mu ijambo ry’Imana utunganye, ntabwo kizakurengera ku munsi w’amakuba. Ndetse ntitwatinya kuvuga ko uri kubaka ku musenyi, imiyaga niza izagusenyera nta kabuza.

Hari abubakira ku mashuri n’impamyabumenyi zihanitse bafite, abandi bakubakira ku butunzi bafite, abandi bakubakira ku miryango, abandi bakubakira ku babyeyi babo bakomeye cyangwa ku bana babo bakomeye, n’ibindi byinshi. Nyamara ibyo byose nta nakimwe cyakubuza kugeragezwa, kandi nta nakimwe cyakubashisha gutsinda intambara yo mu buryo bw’umwuka. Kereka gusa kuba ubana na Yesu bya bugufi kandi ukitondera ijambo ry’Imana.

Uko Yobu yanesheje niko nawe wanesha niba wubakiye ku rufatiro ruzima. Ndakwifuriza gusubiza amaso inyuma ukamenya ko Yesu ari we wakubakaho ubukirisitu bwawe bukaba bukomeye butanyeganyezwa, hanyuma kumwubakiraho ntakundi ni ukumwizera, kumwubaha no kwitondera Ijambo rye, bityo ukera imbuto zikwiriye abihannye, nubaho gutyo uzakomezwa rwose ntuzanyeganyezwa.

Claire Umumararungu