Icyo konsa bimarira umwana n’umubyeyi.

Muri iyi nyandiko, tugiye kubagezaho, icyo konsa bimarira umwana ndetse no ku mubyeyi umwonsa, turavuga kandi ibyo umubyeyi aba agomba kwitaho mu gihe yonsa umwana we, turasoza tugaragaza ingaruka mbi ku mubyeyi no ku mwana mu gihe konsa/konka bitabayeho.

Nyuma yuko umwana avutse, aba akwiye guhita yonswa,kuko aribwo aba ahawe urufatiro rw’ubuzima bwiza, iyo rero umwana avutse, ntahite yonswa cyangwa se nibura ngo yonswe mu isaha ya mbere nyuma yo kuvuka, bimugiraho ingaruka zitari nziza k’ ubuzima bwe bwose.

Kuva umwana avutse kugera ku mezi atandatu, umwana aba agomba konka gusa, nta kindi kinyobwa cyangwa ikiribwa ahabwa, kuko kuri iki kigero, aba abasha guhazwa n’amashereka, ndetse no kubona intungamubiri zose zikenewe kugira ngo akure mu bwenge ndetse mu mubiri.Umwana utararenza amezi atandatu rero, aba agomba konka gusa, nta kindi avangiwe, nkuko bitangazwa n’abashakashatsi babahanga mu by’imirire,iyo umwana yujuje amezi atandatu, aba agomba gutangizwa imfashabere, kuko aba amaze gukura, amashereka atakimuhaza, ariko kandi kumutangiza imfashabere, biba byiza iyo akomeje gonswa kugeza nibura ku myaka ibiri.

Dore konsa umwana icyo bimumarira:

 Konsa bifasha umwana mu kwagura ubusabane hagati ye na nyina.
 Amashereka afasha ubwonko bw’umwana gukura neza.
 Amashereka aba akungahaye ku bwirinzi kamere bw’umubiri, bufasha umubiri guhangana n’indwara zitandukanye,cyane cyane iterwa na virusi na bagiteri ndetse n’izifata ubuhumekero,bityo umwana akagira ubuzima buzira umuze.
 Konsa umwana, bimugabanyiriza ibyago byo kurwara zitandukanye, nk’izifata ubuhumekero, diyabete, ubwandu bw’amaraso,kanseri n’izindi zitandukanye.
 Amashereka arinda umwana kugira ikibazo cy’impatwe ndetse no gucibwamo( Diarrhea)
 Konsa umwana,bimurinda gutakaza ibiro mu buryo butitezwe, ariko kandi bikamurinda no kugira ikibazo cy’umubyibuho ukabije.
 Iyo umwana yonka neza, birinda umubyeyi kubura amashereka

Konsa umwana kandi bifite icyo bimarira umubyeyi um
wonsa

 Iyo umubyeyi yonsa umwana, bimufasha kudatakaza amaraso menshhi mu gihe amaze kubyara.
 Bimufasha kutabura amashereka no kugabanya ibiro yiyongereho mu gihe yari atwite.
 Bimurinda gusama imburagihe, kuko bikerereza uburumbuke
 Konsa umwana bigabanya ibyago byo kugira agahinda gakabije cyangwa se intimba
 Konsa umwana, bigabanya ibyago byo kurwara indwara zikomeye nka kanseri y’inkondo y’umura, n’izindi
 Konsa umwana binafasha umubyeyi, kudasesagura amafaranga agura nk’amata (Formula) n’ibindi
Umubyeyi, aba agomba kugira ibyo yitaho, mu gihe yonsa umwana, muri ibyo twavugamo nko:
 Kwita ku isuku cyane, mu gihe agiye konsa umwana akabanza agakaraba amazi meza ndetse n’isabune
 Guterura umwana amwiyegereje, kuburyo, akamutamika ibere neza, kuburyo imoko yose ayitamira, kuburyo akananwa k’umwana ariko konyine gakora ku mubiri w’ibere ry’umwonsa.
 Umubyeyi aba agomba kwicara mu buryo yumva atekanye ndetse kandi akaba afite umunezero,arebana n’umwana mu maso, mu gihe yonsa umwana, kugira ngo intungamubiri zo mu mashereka, zigere ku mwana zigifite ubwiza
 Kwibuka ko ari byiza, kureka umwana akonka ibere rimwe, akarihumuza,akabona gufata irindi, kuko buryo intungamubiri zose ntiziza zivangavanze, iyo rero, utaretse ngo abanze ahumuze rimwe, harizo ashobora kutabona, bitewe no kutamenya k’umwonsa.
 Kwibuka konsa umwana inshuro zikwiye, utarindiriye ko arira, no mu gihe yasinziriye, umubyeyi aba afite inshingano zo kubyutsa umwana akonka.

Reka dusoze tugira inama, abagore banga konsa abana babo, kugirango bakomeze kugaragara neza, ko atari byiza, ahubwo ko kutonsa ari imbararutso yo kugira ubuzima buri mu kaga, haba kuribo ubwabo ndetse no ku bana baba bagomba konsa, mu gihe muganga atakugiriye inama yo kureba konsa ku bw’ibibazo by’ubuzima bishobora kubaho, ni byiza konsa umwana wawe, mu buryo bwiza.
[email protected]