Ibyo abakristo bakwiye kumenya igihe bigisha ubutumwa bwiza

Umwami Yesu Kristo yategetse abamwizeye bose bakamukurikira ko bakwiye kwigisha ubutumwa bwiza abantu bose,abemeye kumwizera kakabahindura abigishwa be.

Abakristo benshi bakunze kugira intege nke zo gukora uyu murimo wo kubwiriza ubutumwa bwiza. Yesu si we wishimira kureka abantu be ngo bahure n’ingorane kandi nta n’ibyiringiro bafite ko bizagira umusaruro abantu bagakizwa. Mu by’ukuri,Umwami Yesu yatumye kubwiriza ubutumwa bwiza bishobokera abamwizeye bose.

Ibi ni ibintu abakristo bakwiye kwibuka igihe bigisha ubutumwa bwiza ku batarizera Kristo:

Abakristo bategetswe kwigisha ubutumwa bwiza ku bantu bose nta vangura

Abakristo benshi batekerezako kubwiriza ari itegeko rigenewe gusa abantu bafite umuhamagaro wihariye, babitorewe, cyangwa babishoboye . Ibi sibyo. Ni itegeko ryahawe abantu bose bizera Yesu Kristo.

Abakristo benshi bagomba gusobanukirwa ko bategetswe kubwiriza ubutumwa bwiza ibiremwa byose. Bategetswe kandi kuvuga urukundo rw’Imana rukiza umuntu wese runyuze muri Kristo hatabayeho kuvangura.

Yesu ubwe yaravuze ati: “Mujye mu bihugu byose, mwigishe abaremwe bose ubutumwa bwiza.”( Mariko16:15)

Abantu bose ntibazizera/Ntibazakira ubutumwa bwiza

Abakristo benshi bacibwa intege no kwamamaza ubutumwa bwiza ,bagatekerezako abo babubwira bashobora kutabwizera. Bakibaza bati ‘Ese nzakora iki nimbwiriza ntibabwumve?’ ‘Bizagenda gute ntibatabwizera’?
Umwami Yesu ubwe yavuze ko dukwiye kwibanda gusa kwigisha ubutumwa bwiza kuri bose. Ntibagomba guhatira abantu kwizera Kristo, ahubwo umurimo wabo ni uwo kubwira abantu ibya Yesu.

Yesu yagize ati: “Uwizera akabatizwa azakizwa, ariko utizera azacirwaho iteka.”(Mariko16:16)

Ibimenyetso n’ibitangaza bizabana n’abizera .

Abakristo benshi babona nk’ibidashoboka kwigisha ubutumwa bwiza bw’Imana, kandi bakabona nk’ibidashoboka kwizerako ko Imana ikora ibitangaza. Ni ukuri, Umwami Yesu yavuzeko nibizera ibimenyetso n’ibitangaza bizabana na bo.

“Kandi ibimenyetso bizagumana n’abizera ngibi: Bazirukana abadayimoni, mu izina ryanjye, bazavuga indimi nshya, bazafata inzoka, kandi nibanywa ikintu cyica nta cyo kizabatwara na hato, bazarambika ibiganza ku barwayi bakire.”(Mariko16:17-18)

Ibimenyetso n’ibitangaza byemezako Yesu ahorana n’abamwizera nk’uko yabisezeranije: “Nuko Yesu arabegera avugana na bo ati “Nahawe ubutware bwose mu ijuru no mu isi. Nuko mugende muhindure abantu bo mu mahanga yose abigishwa, mubabatiza mu izina rya Data wa twese n’Umwana n’Umwuka wera, mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y’isi. (Matayo28:18-20)

Abakristo bakwiye kubwiriza ubutumwa bwiza bashize amanga , bizeyeko Umwami Yesu ari kumwe nabo, kandi bagahabwa ubushobozi bwo gukora ibitangaza mu izina rya Yesu.

[email protected]