Ibintu abakristo bakora bagatakarizwa icyizere.

Kwizerwa cyangwa kuba umwizerwa ni ikintu gikwiye kwitabwaho cyane kuko iyo icyizere bakugiriraga gisenyutse biragoye kongera kugisana cyangwa kongera kugufata nk’uko bagufataga mbere, ni ngombwa rero ngo dukore uko dushoboye kugirango kidatakara.

Abakristo benshi batakarizwa icyizere kubera ibintu byinshi bakorera imbere y’abantu, ariko ni ngombwa ko baba abizerwa kukigero cyo hejuru Imbere y’Imana n’imbere y’abantu.

Ibi ni bimwe mubituma abakristo batakarizwa icyizere:

Abakristo bakwiye kumenyako hari ibintu bakora baba babizi cyangwa batabizi bikaba intandaro yo gutuma abantu babatakariza icyizere kandi bakaba ikigusha imbere yabo, bagatukisha izina ry’Imana.

1. Iyo twishe amasezerano

“ Ni nde ushaka ubugingo, agakunda kurama kugirango azabone ibyiza? Ujye ubuza ururimi rwawe rutavuga ikibi n’iminwa yawe itavuga iby’uburiganya.(Zaburi 34:13-14)

Iyo tunyuranyije nibyo twavuze, tuba duhaye abantu urwaho rwo kutatwizera.Abantu benshi barakazwa no kumva tuvuga ibintu ariko ntitubikore ahubwo tugakora ibinyuranyije nibyo twavuze akenshi tukagaragara nk’ababeshyi.

2. kuvuga ibihuha

Kuvuga ibihuha cyangwa amakuru atizewe ni kimwe mu bituma umuntu atakarizwa icyizere.ese ni inde wakwizera umuntu ugenda uvugavuga?

Bibiliya itubwira ibyago bizanwa no kuvuga ibihuha, ikadusaba kubigendera kure.

• “Ugenda ari inzimuzi amena ibanga,nuko ntukiyuzuze n’ukunda kuvugagura. » (Imigani 20 :19)

• "Amagambo y’inzimuzi aryohera amatwi, aba nk’uturyohera umuntu asamuye tujya mu nda ye. » ( Imigani 18 :8)

• " ugenda azimura agaragaza ibihishwe, ariko ufite umutima w’umurava ntamena ibanga. » ( Imigani 11 :13)

• « Imburakamaro igambirira ibibi, kandi ururimi rwayo rwotsa nk’umuriro.Umuntu ugoreka ukuri aba abiba intonganya, kandi unegurirana mu byongorerano atandukanya incuti z’amagara.Umunyarugomo yoshya umuturanyi we, kandi akamunyuza mu nzira idatunganye. Uwica ijisho aba atekereza iby’ubugoryi, agahekenya amenyo agira ngo asohoze ibibi. » (Imigani 16 :27 -30).

3. Iyo dukoze ibyaha.

Ikintu kimwe gituma dutakarizwa icyizere ni igihe twishe ubuhamya bwacu bwiza dukora ibyaha.Birumvikana ntidutunganye ariko iyo dukora ibyaha abantu badutekereza bitandukanye nuko turi.

Nk’abakristo tugomba gukurikira Imana mu byo dukora byose : Haba mu byemezo dufata n’uburyo tuvuga.Yesu Kristo ntiyigeze akora icyaha na kimwe. Nk’abamuhagarariye hano ku isi tugomba kwitonda, tukirinda gukora icyaha, bityo abantu bazatubona nk’abakurikiye Yesu , nidukora ibihesha Imana icyubahiro.

[email protected]