Ibintu 8 bishora kuzitira amasengesho ntasubizwe

Amasengesho ni ikintu cy’ingenzi mu buzima bw’umukirisito. Ni umwanya mwiza wo kuramya Imana, Kwihana no gusaba Imana, Nicyo gituma ntawakifuzako amasengesho atagera ku Mana.

Hano hari ibintu 10 byatuma amasengesho y’umuntu adatanga umusaruro kabone nubwo yaba yasenganye umwete mwinshi cyangwa se yasenze igihe kirekire.

1.Amasengesho azitirwa n’urwango

Mu bintu byiza byose umuntu yatunga, icyatandukanya umukirisito n’abandi bose ni urukundo. Igihe urukundo ruzabura, urwango ruziganza icyo gihe ntabwo isengesho rishobora gutumbagira kurwego rwuko ryakomanga ijuru, nubwo isengesho ryakomanga ijuru nta rukundo ijuru ntiryafunguka(Imana ntiyaryumva).
Nutanga, uzahabwa. Ikigero utangaho nicyo uzakiraho. “mutange namwe muzahabwa. Urugero rwiza rutsindagiye, rucugushije, rusesekaye ni rwo muzagererwa, kuko urugero mugeramo ari rwo muzagererwamo namwe.” (Luka 6:38)
“Uwica amatwi ngo atumva gutaka k’umukene, Na we azataka kandi ntazumvwa.”(Imigani 21:13)


2. Amasengesho azitirwa n’ubwirasi

Kwikuza no kwikunda ni ibintu binyuranyije n’urukundo rwa gikirisito, isengesho ry’umuntu ubifite ntirishobora kugera ku Mana. Hari ubwo kenshi dusaba nabi bigatuma tudahabwa.
“murasaba ntimuhabwe kuko musaba nabi mushaka kubyayisha irari ryanyu ribi.” (Yakobo 4:3)

3. Amasengesho azitirwa no gushindikanya no kutizera

Ntibishobokako umuntu utizera Imana ashobora kunezeza Imana. Umuntu wese ujya gushaka Imana agomba kwizera ko ibaho kuko Imana igororera abayishaka bose bayizera.
Ariko utizera ntibishoboka ko ayinezeza, kuko uwegera Imana akwiriye kwizera yuko iriho, ikagororera abayishaka. (Abaheburayo 11:6)

“Ariko niba hariho umuntu muri mwe ubuze ubwenge, abusabe Imana iha abantu bose itimana, itishāma kandi azabuhabwa. Ariko rero asabe yizeye ari nta cyo ashidikanya, kuko ushidikanya ameze nk’umuraba wo mu nyanja, ujyanwa n’umuyaga ushushubikanywa. Umeze atyo ye kwibwira ko azagira icyo ahabwa n’Umwami Imana, kuko umuntu w’imitima ibiri anāmūka mu nzira ze zose.” (Yakobo 1:5-8)
“Si mwe mwantoranyije, ahubwo ni jye wabatoranyije kandi mbashyiriraho kugira ngo mugende mwere imbuto, imbuto zanyu zigumeho kugira ngo icyo muzasaba Data cyose mu izina ryanjye akibahe.” (Yohana 15:16)

4. Amasengesho azitirwa n’agasuzuguro

Dukeneye kubaha Imana n’abantu bayo kugirango amasengesho dusenga abashe gusubizwa. Hari ubwo Imana ibuza umuntu ikintu bitewe nuko ishaka kuzamuha ibyiza kurushaho ariko iyo atayumviye agakomeza kuyihata, aba ari agasuzuguro bene ayo masengesho ntasubizwa.
“Icyo umunyabyaha atinya ni cyo kizamugeraho, Ariko icyo umukiranutsi yifuza azagihabwa.” (Imigani 10:24)
“Bakundwa, imitima yacu nitaducira urubanza, turatinyuka imbere y’Imana kandi icyo dusaba cyose tugihabwa na yo, kuko twitondera amategeko yayo tugakora ibishimwa imbere yayo.” (1Yohana 3:21-22)


5. Amasengesho ashobora kuzitirwa n’amakimbirane y’umuryango

Imibanire y’abashakanye ni amahame yashyizweho n’Imana, mu gitabo cy’Itangiriro mu gice cya mbere. Ni kimwe mu bice 6 byagaragaye mu iremwa ry’isi. Imana yaremye buri kimwe cyose irangije irakitegereza ibona ni cyiza. Hanyuma yitegereza umugabo ibona ko atari byiza ko aba wenyine, imuremera umufasha. Umugabo n’umugore baremwe n’Imana mu buryo bwihariye kugirango basohoze umugambi w’Imana, buzuzanye.
Umubano w’umugore n’umugabo ushushanya uwa Yesu n’itorero, Mu gihe uyu mubano ubangamiwe buri kimwe cyose kirangirika.

“Namwe bagabo ni uko; mubane n’abagore banyu, mwerekane ubwenge mu byo mubagirira kuko bameze nk’inzabya zidahwanije namwe gukomera, kandi mubūbahe nk’abaraganwa namwe ubuntu bw’ubugingo, kugira ngo amasengesho yanyu ye kugira inkomyi.” (1 Petero 3:7)

6. Amasengesho azitirwa no kutagira imbabazi

Ibuye rikomeza imfuruka ritera ibyiringiro abakirisitu ni Yesu wemeye gupfira ibyaha byacu. Yesu niwe watanze ikiguzi, yishyura ibyaha . Niba udashobora kumva bihagije imbabazi wagiriwe kugirango nawe ubashe kubabarira abandi ntabwo ushobora gusenga isengesho risubizwe. Ntaho waba utandukaniye nutizera.
“Kuko nimubabarira abantu ibyaha byabo, na So wo mu ijuru azabababarira namwe, 15ariko nimutababarira abantu, na So na we ntazabababarira ibyaha byanyu.” (Matayo 6:12-15)
“Kandi nimuhagarara musenga hakaba hari umuntu wabagiriye nabi, mumubabarire kugira ngo So wo mu ijuru na we abababarire ibyaha byanyu. Ariko nimutababarira abandi, So wo mu ijuru na we ntazabababarira ibyaha byanyu. ” (Mariko 11:25-26)

7. Amasengesho azitirwa n’amakimbirane

Ntibyakundako umuntu yasenga afite uwo yanga atarikiranura na we bikundeko amasengesho ye agera ku Mana. Nibyiza gusenga ubanje kwiyunga n’uwo wahemukiye.
“Nuko nujyana ituro ryawe ku gicaniro, ukahibukira mwene so ko afite icyo mupfa, 24usige ituro ryawe imbere y’igicaniro ubanze ugende wikiranure na mwene so, uhereko ugaruke uture ituro ryawe..” (Matayo 5:23-24)

8. Amesengesho azitirwa no gushaka ibitarimo ubushake bw’Imana

Kimwe mu bintu by’ingenzi mu isengesho harimo no gushaka ko ibyo wifuza byabaho mu bushake bw’Imana. Ubwo Yasengaga yasabye ko ibyo ashaka byaba mu bushake bw’Imana. Nidusenga mu buryo buhabanye n’ubu amasengesho yacu azagaragara nko kwirwanaho.

Kandi iki ni cyo kidutera gutinyuka imbere ye: ni uko atwumva iyo dusabye ikintu nk’uko ashaka. (1 Yohana 5:14)