Ibintu 5 wakora mu gihe wumvako Imana itakwitayeho

Ese waba utekerezako Imana itakikwitayeho? Imana ni nziza kandi ibihe byose.

Rimwe na rimwe hari ibibazo duhura nabyo bigoye ubuzima bwacu:

Wabuze uwo wakundaga kubw’impanuka
• Umwana wawe yavukanye uburwayi
• Wambuwe ibyawe n’umuntu wizeraga, araguhemukira
• Wapfushije ubukwe kandi wasengaga, urabengwa .

Uribaza ngo ese Imana ni nziza ? Ese Imana ni nziza mu gihe nta kazi ufite ? Ese Imana ni nziza uwo mwashakanye yagutaye ? Ese Imana ni nziza mugihe ubeshyerwa barakujyanye mu nkiko? Ese Imana ni nziza mu gihe muganga yakubwiyeko nta kindi yakora ku burwayi bwawe ?

Mu by’ukuri Kwizera Imana ni byiza ibihe byose ariko kuri bamwe ibyiyumviro byabo ntibishyikira ubwiza bw’Imana. Iyo utekereje ko Imana ari nziza, ikwitaho, ihorana nawe bizana umudendezo no mugihe cy’amakuba.

Ni iki wakora mu gihe wumva ko Imana itakwitayeho ?

Nta buryo buhoraho buzwi bw’icyo umuntu yakora , gusa Imana ubwayo ifite ibisubizo byinshi ku bibazo by’abana bayo. Hari intambwe zishobora kugufasha.

1.Menya ko uri kumwe n’inshuti nziza: zimwe mu nshuti z’Imana zarayibashije, urugero nka Mose , asubira ku Uwiteka aramubaza ati “Mwami, ni iki gitumye ugirira nabi ubwo bwoko? Ni iki cyaguteye kuntuma? (Kuva 5:22), Dawidi, Nzabaza Imana igitare cyanjye nti “Ni iki gitumye unyibagirwa? Ni iki gituma nambikwa ibyo kwirabura n’agahato k’abanzi banjye?” Abanzi banjye bameze nk’inkota iri mu magufwa yanjye, Iyo banshinyagurira bakiriza umunsi bambaza bati “Imana yawe iri hehe?” (Zaburi 42:10-11), Marita , abwira Yesu ati “Databuja, iyaba wari hano musaza wanjye ntaba yarapfuye. (Yohana 11:21). Kumva uri wenyine , ukabaza Imana ntibisobanura ko utayizera. Ibukako ibitugu by’Imana bihagije ushobora kubiririraho kandi ashoboye gukemura ibibazo byose.

2.Gerageza kwakira ibikubaho wihe umwanya wo kuruhuka: Isi tubayemo ni isi y’icuraburindi bikaba akarusho iyo tunaniwe n’imibereho y’ubuzima bugoye kububamo. Eliya yigeze atakaza ibyiringiro, arahunga nubwo yariyabonye Imana imukoresha ibidasanzwe. Eliya abyumvise atyo arahaguruka arahunga ngo yikize, ajya i Bērisheba y’i Buyuda aba ari ho asiga umugaragu we.

“Ariko agenda wenyine urugendo rw’umunsi umwe mu ishyamba, ahageze yicara munsi y’igiti cy’umurotemu, yisabira gupfa ati “Uwiteka, ndarambiwe. Icyabimara ni uko ubu wakuraho ubugingo bwanjye, kuko ntaruta ba sogokuruza ubwiza.” Nuko yiryamira munsi y’icyo giti cy’umurotemu arasinzira, agisinziriye marayika araza amukoraho aramubwira ati “Byuka urye. (1 Abami 19:1-8)

Nyuma yo kuruhuka uzabona impinduka, burya ikintu udafitiye ubushobozi ntikiba kiri ku rwego rwawe tegereza Imana. Gusa si byiza guhamagara Imana nyuma yuko unaniwe gusa ahubwo wakayihamagaye na mbere bugahinduka ubuzima bwawe bwa buri munsi waba wishimye cyangwa ubabaye.

3.Gerageza kuzirikana ibyo Imana yagukoreye ubisangize abandi: Akenshi ibitekerezo byacu tubihanga kubiri imbere gusa dushaka ko Imana idukorera ariko dukeneye no kwiyibutsa ibyatambutse Imana yadukoreye , bikaduhesha umunezero ko n’ibisigaye Imana izabikora. Ni byiza kuba ufite aho wanditse ibyo Imana yagukoreye , niba utandikaga ibyo yagukoreye mu rwego rwo kubizirikana, tangira uyu munsi.

“Imana yibagiwe kugira neza? Umujinya wayo utumye ikingirana imbabazi zayo?” Maze ndavuga nti “Ibyo ni indwara y’umutima wanjye. Mbega natekereje yuko ukuboko kw’iburyo kw’Isumbabyose guhinduka!” Nzibutsa abantu ibikomeye Uwiteka yakoze, Kuko nzibuka ibitangaza byawe bya kera. (Zaburi 77:10-12)


4.Gerageza kuba mu materaniro y’abera bagusangize impamvu z’ibyiringiro:
Mu gihe urimo guhura n’ibibazo by’inzitane, akenshi hari ubwo umuntu atamenya ikibazo ufite ariko biba byiza iyo ushatse umwizerwa akakuganiriza cyangwa ukaba mu materaniro y’abakirisito aho abantu basangizanya ubuzima, bagahana ubuhamya bwaho Imana yagiye ibakura.

5.Ikoreze Uwiteka Imitwaro yawe: Imana igufata nk’icyaremwe gitandukanye n’ibindi bigatuma iguha agaciro gasumbyeho.
Nk’uko se w’abana abagirira ibambe, Ni ko Uwiteka arigirira abamwubaha. Kuko azi imiremerwe yacu, Yibuka ko turi umukungugu. (Zaburi 103:13-14)

Ntabwo Imana inezezwa n’imibabaro ucamo, yemerako ibigoye bikubaho kugirango wige kuyisenga, kuyubaha hari nubwo iba igirango ikwigishe kubana n’imigisha izaguha.

Kandi ujye wibuka urugendo rwose rwo mu butayu, Uwiteka Imana yawe yakuyoboyemo iyi myaka uko ari mirongo ine, kugira ngo igucishe bugufi, ikugerageze imenye ibyo mu mutima wawe, yuko wakwitondera amategeko yayo cyangwa utayitondera. Nuko yagucishije bugufi ikundira ko wicwa n’inzara, ikugaburira manu wari utazi, na ba sekuruza banyu batigeze kumenya, kugira ngo ikumenyeshe yuko umuntu adatungwa n’umutsima gusa, ahubwo yuko amagambo yose ava mu kanwa k’Uwiteka ari yo amutunga.(Gutegeka 8:2-3)

Mwibuke ko umutoza ashyira umukinnyi yizeye mu mwanya ukomeye kugirango abashe guhangana n’ibikomeye. Kandi Leta ishyira abasirikare bakomeye , wahawe imyitozo ikarishye ahantu hakomeye kuko baba bizeyeko bazabasha guhangana n’ibizaza bikomeye.

Guhora uhanze amaso kuri wowe ubwawe ni nko gufata inzira itagira aho ikujyana ariko gutumbira Uwiteka bikura umuntu mu mfunganwa bikamushyira ahagutse kandi bizana umunezero.

Uwiteka akurinde umubi agukomeze