Ibimenyetso biranga itorero ryapfuye

“Yita uwo mwana izina ikabodi ati “icyubahiro gishize kuri isirayeli.” abivugishwa n’uko isanduku y’imana yanyazwe, kandi n’ibya sebukwe n’umugabo we. aravuga ati “icyubahiro gishize kuri isirayeli, kuko isanduku y’imana yanyazwe.” (1 Samweli 4:21-22)

Ijambo ry’Imana ritubwirako haba igihe Imana ikagenda ntibe ikibanye n’abantu bayo. Ibi tubisanga mu gitabo cya 1 Samweli ubwo izina ikabodi ryahawe umwuzukuru wa Eli umutambyi mukuru nyuma y’uko isanduku y’Imana yanyazwe n’Abafilisitiya. Byongeye kandi mu gitabo cy’Ibyahishuwe 3:1 Yesu yabwiye ab’itorero ry’I Sarudi ko ryibwirako ririho nyamara ari intumbi.

Mu Ibyahishuwe 2:5, Yesu yabwiye itorero rya Efeso ko niritihana azaza agakuraho igitereko cy’itabaza cyaryo. Mubisanzwe , igitereko cy’itabaza cyagaragazaga itorero ry’ukuri . Yesu yabashinje kureka urukundo rwa mbere bivuzeko bari barapfuye mu buryo bw’Umwuka.

Ibi bimenyetso bikurikira nibyo biranga itorero ryamaze gupfa:

1.Ntiriba rigishishikariye amasengesho yo guterana

Amatorero yapfuye , abantu bake nibo baba bafite ubushake bwo gusenga no gushaka Imana , n’ubwo biba bisa nk’aho Imana idahari cyangwa itari hagati yabo kuko badaterwa imbaraga n’uko yavuganye na bagenzi babo, bagatekereza ko itabumvise.

2.Ntabyiringiro by’uko amasengesho asubizwa

N’ubwo bake basenga, ntibaba bizeyeko Imana izasubiza amasengesho yabo. Niba uri mu itorero ritizera Imana, ritizerako isubiza amasengesho tuyisenze mu kwizera, umenyeko ryapfuye.

3. Imana ntigaragara mu materaniro y’abera

Iyo itorero ryapfuye, nta mwuka w’Imana ugaragara mugihe cy’amateraniro. N’ubwo Yesu yasezeranijeko ababiri cyangwa abatatu bateranye mu izina rye aba ari hagati yabo.(Matayo18:20)

4.Imbaraga z’Imana ntizigaragara

“Ariko urutoki rw’Imana niba ari rwo rumpa kwirukana abadayimoni, noneho ubwami bw’Imana bubaguye gitumo.(Luka11:20).

Yesu yavuzeko iyo abadayimoni birukanwa aba ari ikimenyetso cy’uko ubwami bw’Imana buri muri bo. Intumwa Pawulo yavuzeko ibitangaza bikoreka kubwo kwizera(Abagalatiya3:5)Yesu yasabye abakristo kwizera gusa kuko kubasha gukuraho imisozi kandi kukazana n’ibisubizo by’amasengesho yabo.(Mariko11:23-24)
Iyo mu itorero hatari imbaraga ziturutse mu ijuru ni ikimenyetso kigaragazako ryarangije gupfa.

5.Ijambo ry’Imana ryigishwa nabatabifitiye ubushobozi

Abayobozi b’amadini bigishaga imyizerere ipfuye mu gihe cya Yesu, batangazwaga n’imyigishirize ye kuko yabigishaga nk’ufite ubutware.(Mariko1:22)

Mu itorero ryapfuye, abavugabutumwa nta mbaraga n’ubushobozi baba bafite byatera abantu kwihana ibyaha byabo.

6.Ntirigira abakizwa ngo babatizwe

Mu itorero rya mbere, Umwami Imana yongereraga itorero abakizwa(Ibyakz 2:47). Mu gihe mu itorero hatavamo abakizwa ngo babatizwe , ni ikimenyetso cy’uko Umwami Imana atagikorera hagati muri ryo.

7.Nta Mwuka Wera uherekeza buri murimo mu itorero

“Maze aramubwira ati “Wapfa Samusoni, Abafilisitiya baragusumiye.” Arakanguka yibwira ko yisohokera nk’ubundi akikunkumura, ariko yari atazi ko Uwiteka yamuretse.”(Abacamanza16:20)

Buri kintu cyose cyo mu iteraniro kigomba guherekezwa n’Umwuka Wera. Iyo mu iteraniro rigira ibice bitandukanye: kuramya, gushima , kwigisha ijambo ry’Imana ,ariko ugasanga nta mwanya bahaye Umwuka Wera ngo akore. Umwuka ashobora kugenda abantu ntibabimenye.
Mu by’ukuri buri kintu cyose gikorwa mu itorero hatarimo gukorana n’Umwuka Wera byerekana ko ari ibintu byateguwe n’abantu bitarimo Imana.

8. Ntirishobora guhindura abantu abigishwa
Intego y’amatorero yose aba ari ukuzana abantu kuri Kristo, bakaba abigishwa. Kuba urusengero ari runini gute ntacyo bivuze, igifite agaciro n’uburyo bigisha bikabavana mu byaha bakabafasha kwinjira mu mudendezo w’ubwiza bw’abana b’Imana.”(Abaroma8:19-21)

9. Abantu baba bishimira imyanya y’icyubahiro no kugira amazina meza

Mu itorero ryapfuye, abantu baba batagishaka icyubahiro cy’Imana ahubwo bagaharanira kwemerwa n’abantu. Byongeye kandi itorero ridafite ubuntu bw’Imana, risigarana gusa ubwibone bwo gushakisha imyanya myiza n’amazina meza.

10. Nta guhishurirwa kuvuye mu ijuru kuhaba

“Aho guhishurirwa kutari abantu bigira ibyigenge, Ariko ukomeza amategeko aba ahirwa.”(Imigani29:18)
Iyo hatari icyerekezo no guhishurirwa kuvuye mu ijuru abantu baba ibyigenge. Iyo iteraniro ripfuye ntirishobora kuzuza no guhishurirwa imihamagaro y’Imana igaragara muri bibiliya.

11. Ntihaba hakiboneka abantu bitangira umurimo w’Imana

Zaburi 110:3 havugako abantu bitanga babikunze bahabwa umugisha w’Imana. Ariko mu itorero ripfuye abantu bake cyane nibo bashobora kwitangira kuvuga ubutumwa.

12. Itorero ntiriba rikigira abantu batanga icyacumi n’ubundi bufasha

Yesu yavuzeko aho ubutunzi bwacu buri ,ariho hazaba umutima wacu.(Matayo6:21)
Iyo itorero ryapfuye , bake cyane nibo bagira ishyaka ryo kuzana ubutunzi bwabo bakarishyigikira. Ku rundi ruhande ariko, iyo abantu babona Imana itembera mu rusengero, bagira icyizere ndetse bakagira n’umuhate wo gutanga ubutunzi bwabo bazi ko babiba mu butaka bwiza.

13. Abakristo ntibahinduka

Imana yahamagariye abakristo kuba umunyu n’urumuri mu isi(Matayo5:13-16). Iyo itara ryacu rizimye abantu badukikije ntibashobora guhindurwa n’ubutumwa bwiza. Byongeye kandi ingirwa-nsengero nazo ntacyo zikora ngo zihindure abantu.

Biragatsindwa ko igitereko cy’itabaza kiva ku itorero, nyiyo mpamvu, itorero rikwiye kurinda igitereko cy’itabaza cyaryo kugirango icyubahiro cy’Imana kitava muri ryo kandi rigahora ryiyeza kugeza igihe Kristo azaza kurijyanira.

[email protected]