Ibimenyetso 5 byakwereka ko wagabweho ibitero bya satani

Mu buzima tubamo tugabwaho ibitero bya satani. Bibiliya itubwira ko satani umwanzi wacu agendagenda ashaka uwo aconshomera. N’ubwo yatsinzwe ahora arekereje ashaka umuntu wese wizera Kristo kugirango amugushe.

Umwami Yesu ubwe yaravuze ati “Nanjye ndakubwira nti ‘Uri Petero, kandi nzubaka Itorero ryanjye kuri urwo rutare, kandi amarembo y’ikuzimu ntazarishobora.”(Matayo16:18).
Amagambo ya Yesu asobanuyeko akomeje kudukomeza ngo turusheho gusa na we, niyo mpamvu satani akora uko ashoboye ngo aburizemo uwo murimo. Ni ibyo kwishimirwa kuberako n’amarembo y’ikuzimu adashobora guhagarika Imana gukora umurimo wayo kuko Kristo yatsinze satani . Nta ntwaro n’imwe ishobora kugira icyo idutwara niba muby’ukuri turi muri Kristo.

Niba ari ukuri dufite insinzi muri Kristo, ni ukuri ko satani akomeje kugerageza kutuvana mu mwanya w’insinzi ya Kristo. Satani ntiyigeze yishimira na rimwe insinzi ya Kristo, niyo mpamvu dukeneye guhora turi maso igihe cyose.

Dore bimwe mu bimenyetso byakwereka ko watewe na satani:

1. kugira uburakari

Bibiliya itubwirako uburakari budashobora gusohoza gukiranuka kw’Imana(Yakobo1:20). Umwanzi ahora agerageza gushaka inzira izarizo zose zo kutuyobya no kudutera uburakari budutera gukora icyaha.

“Nimurakara ntimugakore icyaha, izuba ntirikarenge mukirakaye kandi ntimubererekere Satani.”(Abefeso4:26-27)

Igihe tugize uburakari tugakora icyaha n’ibindi bikorwa bibi, dukwiye kwibuka ko satani ahora yifuza ko twakora ibyaha, hanyuma tukarushaho kwirinda icyatuma turakara tukagwa mu mutego wa satani.

2. Guhorana impungenge

Muri ubu buzima abantu bahorana impungenge ,bagahangayika kuko batekerezako ikintu runaka kizagenda nabi, ko ntakiza bazageraho mu byo bakora byose.
Nta muntu n’umwe udahangayika :Abakene bahangayikishwa n’icyo bazarya ejo mu gihe abakire bahangayikishwa no kuba batakaza amafaranga yabo. Ariko igihe cyose duhangayitse, ibyiringiro dufitiye Imana biba bijegajega kandi ntituba tukiyibandaho. Ni nde wifuzako duhangayika uretse satani? Satani ashaka ko amaso yacu atareba Kristo wahemuye ku mugaragaro abafite ubutware n’ubushobozi kubw’Insinzi ye(Abakolosayi2:15), ahubwo agashaka kuduhunza umurimo yakoreye ku musaraba.

3. Ubwoba

Hari ubwoko 2 bw’ubwoba .Gutinya Imana ni ubwoba bwiza kuko butuma twiga kuyubaha no kuyitinya. Kurundi ruhande ubwoba bw’umuntu cyangwa bwa satani ni ubwoba bubi. Igihe dutinya Imana, ntakindi kintu tuzatinya . Igihe twizera Imana dushobora guhangana na buri kintu cyose cyatugeraho.

“Naho nanyura mu gikombe cy’igicucu cy’urupfu, Sinzatinya ikibi cyose kuko ndi kumwe nawe, Inshyimbo yawe n’inkoni yawe ni byo bimpumuriza. Untunganiriza ameza mu maso y’abanzi banjye, Unsīze amavuta mu mutwe, Igikombe cyanjye kirasesekara.”(Zaburi23:4-5)

Satani ashakako abantu b’Imana bose birengera, mu buzima babayemo ariko Imana iravuga iti :“kuko ushaka kurengera ubugingo bwe azabubura, ariko utita ku bugingo bwe ku bwanjye, azabubona.”(Matayo16:25)

4. Umubabaro

Umubabaro ni kimwe mu bitero bya satani. Imana ntiyifuzako abantu bayo bababara cyangwa baterwa agahinda n’icyo ari cyo cyose. Kuko iyo tubabaye twumva ducitse intege ntitubashe kuba twakorera Imana ibyo idushakaho, natwe ubwacu ntitugire icyo twigezaho.

5. Guta icyizere

Gutakaza ibyiringiro ni ikintu giteye ubwoba kuko bituma tubura icyizere cyo kubaho no kugera ku bintu bikomeye. Iyo tubuze icyizere ubwacu turiyanga ndetse abenshi bahitamo kwiyahura . Imana ishimwe ko muri Kristo twabonye ibyiringiro.

Satani ashaka ko tuva kuri Kristo. Ese ni ukubera iki? Ni ukuberako tudafite Kristo , imibereho yacu ntacyo yaba ivuze ndetse nta kintu twabasha gukora. Kuzuka kwa Yesu kwaduhaye ibyiringiro, n’ubwo satani ahora abirwanya ariko dukwiye guhora tumwiringiye kuko muri we tubona ubuzima bwuzuye.

[email protected]