Hari icyo waba uzi ku bitabo by’amateka n’ibyo ari byo?

Muri rusange ibitabo by’amateka y’Isirayeli bigizwe na Yosuwa, Abacamanza, Rusi, 1 na 2 Samweli, 1 na 2 Abami, 1 na 2 Ngoma, Ezira, Nehemiya na Esiteri. Mu bitabo byiswe "inyandiko" bashyiramo Rusi, Abami , Ngoma ,Ezira , Nehemiya na Esiteri.

Ibindi bisigaye byose rero babyise “Abahanuzi ba mbere”: ibyo ni Abacamanza, Yosuwa na Samweli.

Ibitabo bivuga amateka (inkuru) y’Isirayeli kugeza igihe ubwami bushingiwe ni : Yosuwa, Abacamanza, Rusi na Samweli. Ibitabo Abami na Ngoma bivuga inkuru ebyiri zisa kugeza igihe cy’ ubunyage. Ezira na Nehemiya bivuga ibyo kuva mu bunyage i Babuloni. Esiteri avuga iby’Abayuda bari mu Buperesi.

Usibye Ezira na Nehemiya, ibindi bitabo nta we uzi abanditsi babyo ariko ibitabo bya Yosuwa na Samweli birimo amagambo yavuzwe n’abo batware b’Isirayeli (reba 1 Ngoma 29:29), nyamara izo nkuru zanditswe nyuma y’urupfu rwabo: muri ibi bitabo habonekamo cyane inyandiko z’ubuhanuzi n’amateka y’ubutegetsi.

Isezerano ry’Uwiteka na Aburahamu, Isaka na Yakobo, rigaragaza ishusho n’ ikiri mu masekuruza.
Ibice by’amateka y’Isirayeli byibanda mu kuva mu bubata bwo mu Egiputa. Izo nkuru zinavuga uko ubwoko bw’Isirayeli bwatoranyijwe n’Imana kandi bukanagira inshingano yo kurinda ibyahanuwe (Rorn.3:2). Aha rero Abami bemerwaga hakurikijwe ibikorwa byabo mu maso y’Uwiteka. Barebaga niba barageze ikirenge cyabo mu cya Dawidi wakiranukaga cyangwa mu cya Yerobowamu, mwene Nabati wacumuraga.

Ibi bitabo ntibivuga gusa inkuru z’intwari z’igihugu nka Yosuwa, Samweli, Dawidi cyangwa Salomo, ahubwo zinagaragaza amagambo y’aboroheje nk’umuhanuzi Mika mwene Yimula, utaretse n’abagore boroheje bafashije Eliya na Elisa. Ni ibitabo bivuga imirimo ikomeye y’Imana (Zab. 111:4) ; byerekana uko Uwiteka yakuye abami ku ntebe z’ubwami, agashyira hejuru aboroheje.

Ni ibitabo bihishura ukwera k’Uwiteka, kwihangana, imbabazi, gushaka kubabarira k’Uwiteka. Biranavuga icyifuzo cy’Imana mu gushaka abazimiye, utaretse umunezero Imana igira iyo bagarutse. Ibi bitabo bidufasha gusobanukirwa uko Imana isohoza umugambi wayo wo gucungura abantu, itegura kuza k’umwana wayo.

Muri ibyo bitabo ndetse n’ iby’abahanuzi hagenda hahishurwa umugambi w’Imana.Uhereye kuri Isirayeli, ishyanga ryatoranyijwe, twegera Isirayeli nyakuri, abarokotse b’abanyamurava abo dusangamo umugaragu watoranyijwe, ishami rya Dawidi, "imbuto" ari we mwana ukundwa w’Imana .

Amateka, ndetse n’ubuhanuzi, aganisha iteka kuwagombaga kuza. Amasekuruza n’ibyabaye bigize uruhererekane rw’umugambi w’Imana muri Adamu, washohorejwe abantu muri Kristo. Ni iby’igiciro gukurikirana neza uko Yesu yavuze ku byerekeye inkuru zo mu Isezerano rya Kera .

Ntiyigeze azishidikanyaho. Avuga kuri Dawidi n’imitsima yo kumurikwa yatse umutambyi (Mar.2:26), akavuga iby’icyubahiro cya Salomo (Mat. 6:29), iby’umugabekazi w’i Sheba (Mat. 12:42), uko Elisa yatumwe ku mupfakazi w’i Sareta (Luka 4:27). Yesu yemeraga adashidikanya ibyanditswe muri ibyo bitabo. Natwe tugomba kumukurikiza nta shiti.

N’ubwo ibyo bitabo bivuga amateka, ariko muby’ukuri ni uguhishurwa kw’imirimo y’Imana, amasezerano yayo y’imbabazi mu bihe byose hamwe n’umugambi wo gucungura muri Yesu Kristo, mwene Dawidi. Ibi bitabo binerekana uburyo kutumvira ubutumwa bw’abahanuzi

(Mat. 21:33-46) byaherutswe no kwigira umuntu k’Umwana w’Imana.
Mu nyandiko itaha tuzagenda tu bagezaho incamake ya buri gitabo kugirango turusheho kugenda dusobanukirwa neza

[email protected]