Gusenga k’umukiranutsi.

YESAYA 38:1-8

Muri iyo minsi Hezekiya ararwara yenda gupfa. Bukeye umuhanuzi, Yesaya mwene Amosi aramusanga aramubwira ati “Uwiteka aravuze ngo ‘Tegeka iby’inzu yawe kuko utazakira, ahubwo ugiye gutanga.’ ” Nuko Hezekiya yerekera ivure atakambira Uwiteka ati “Ndakwinginze Uwiteka, uyu munsi wibuke ko najyaga ngendera mu by’ukuri imbere yawe n’umutima utunganye, ngakora ibishimwa imbere yawe.” Nuko Hezekiya ararira cyane. Maze ijambo ry’Uwiteka rigera kuri Yesaya riti “Subirayo ubwire Hezekiya uti ‘Uwiteka Imana ya sogokuruza Dawidi iravuze iti: Numvise gusenga kwawe mbona n’amarira yawe, kubaho kwawe nzongeraho indi myaka cumi n’itanu. Kandi nzagukizanya n’uyu murwa mbakize umwami wa Ashuri, nzawurinda.

Mu gihe cya none usanga abasenga barushaho kuba benshi. Uwavuga ko ari ikintu kigezweho ntiyaba akabije. Gusa, igiteye urujijo ni ukubona itandukaniro hagati y’abitwa ko basenga n’abadasenga Imana. Reka twongere twibukiranye ko turi abakristo kandi ko dukwiriye kumaramaza tukaba ab’ukuri kugeza no ku gupfa.
Kumenya icyo byabaye ihumure ku muririmbyi waririmbye n°108 yo mu gitabo cy’indirimbo zo gushimisha Imana. Arahamya ati icyo kinyibagiza n’ibyago byose nkumva nduhuwe n’Umwami Yesu.

Hezekiya asenga, yari azi neza ibyo yabwiwe n’umuhanuzi Yesaya, ko ari ukuri koko kandi byavuye ku Mana. Ashingiye ku buhamya yitangiraga ubwe ko yagendeye iteka imbere y’Uwiteka n’umutima utunganye kandi akora ibishimwa nawe, aramutakambira kandi bikora ku mutima w’Imana imwongerera kurama.

Dutegekwa gusenga dukiranuka. Iyo tugize intege nkeya nk’abantu tugakiranirwa, hariho imbabazi k’uwemera kuzakira. Iyo atabyitayeho agasenga bihinduka ikizira mu maso y’Uwiteka. Aho Dawidi yibazaga ku muntu ukwiriye kuguma mu ihema ry’Uwiteka kandi agatura ku musozi we wera, yasanze nta wundi keretse ugendera mu bitunganye, agakora ibyo gukiranuka kandi akavuga iby’ukuri nk’uko biri mu mutima we(Zaburi 15).
Ngibyo ibifite agaciro kuruta kumenya gutondeka amagambo meza dusenga.

Imbere y’Imana, imirimo ya Tabita niyo yatumye ijwi ryo gutatabaza kw’abo yagiriye neza ryumvikana mu matwi yayo kandi riremerwa, Tabita arazuka. Mu gusengana umwete kw’abakiranutsi nta kidashoboka. Petero wari mu nzu y’imbohe ategereje kwicwa yageze kuri bagenzi be ari muzima, batungurwa no kubona Imana ikoze ibirenze ibyo batekerezaga(Ibyakozwe.11).

Benedata, birakwiriye ko uwavutse bwa kabiri abaho rwose ubuzima bushya mu myitwarire n’imigendere ye yose. Byaba ari igihombo ku muntu ukomeza kuba mu nzu y’Imana ariko itamwemera. Ihumure dufite ni uko tukiri mu gihe cy’imbabazi k’uzemera,akatura, akazizera.

Mwakire neza ijambo ry’Imana.
[email protected]