Gufasha no kwitangira abandi, inkingi y’imibereho myiza.

Mu buzima kugirango umuntu yitwe intwari ni uko aba yakoze ibikorwa by’indashyikirwa mu muryango mugari, kugirango abigereho bimusaba kwiyambura umwambaro wo kwikunda wenyine ahubwo yishyira mu mwanya wa bagenzi be bababaye hanyuma akabakemurira ibibazo nk’aho ari we urimo kubyikorera, kwitangira abandi ni umuco w’igihugu ariko kandi ni indangagaciro y’abizera Imana.

Rimwe na rimwe tubona abantu bategurwa kuba bakwemera gutakaza ubuzima bwabo ngo bitangire abandi. Nyamara iki ni ikintu cyakomereye abahanga mu mitekerereze (philosophers) n’impuguke mu bumenyi (science). Neo-Darwiniam, mu bitekerezo bye avuga ko mu by’ibanze bigize ikiremwa muntu harimo kwikunda biba mu turemangingo tw’umubiri duha umubiri intego yo kubaho yiyitaho wenyine.

Tugendeye ku gitekerezo cya Neo-Darwiniam, birasobanura ko abantu bafasha abo bafitanye isano ishingiye ku tunyangingo tw’imibiri yabo, nka bamwe mu bagize umuryango: abavandimwe, ababyara, kuko kubafasha biba bisa nk’aho ari ukwikorera. Ariko se kuki ushobora gusanga abantu bamwe bafasha abo badafitanye isano ishingiye ku maraso cyangwa se inyamaswa?

Hari ibisobanuro byinshi byatanzwe bivuga kuri iyi ngingo. Bamwe baravuze bati nta kintu cyiza kibaho gishimisha nko kuba “udafite ikizinga”. Iyo dufashije abantu bo hanze y’umuryango wacu cyangwa se inyamaswa, bitubera inyungu ubwacu, bigatuma tugubwa neza kandi tukumva twubashywe mu muryango mugari.

Ku rundi ruhande, kwitanga ni bumwe mu buryo bugaragara nk’igishoro. Kandi icyo ushoye nicyo kikugarukira. Dukorera abandi ibyiza twizeye ko natwe bizatugarukira. Burya ineza ntihera, naho umuntu atayiturwa n’uwo yayigiriye ariko ituruka ahandi ikamugarukaho.

Kwitangira abandi bishingira ku mpuhwe.impuhwe twavuga ko ari ubushobozi bwo kubona ikintu kiri kuba ku wundi muntu ukishyira mu mwanya we ukumva ko ari wowe biri kubaho. Mbese ni ubushobozi bwo kwinjira mu bitekerezo by’undi muntu kuburyo wumva ibyishimo bye cyangwa umubabaro we. Impuhwe ni isoko yo gufasha ndetse no kwitangira abandi.

Mu gitabo cye, “Spiritual Science”,Neo-Darwiniam, yavuzeko atari byiza kubona abantu bireme ibice bakumva ko bagomba kwikunda bashingiye ko bahuje uturemangingo gusa, ahubwo bakwiye gushingira ku mutima w’impuhwe bagafashanya batagendeye ku isano bafitanye

Hari ubuhanga twifitemo kandi budufasha kwibumbira hamwe dushingiye ku mutima nama bidufasha kwishyiraho imitwaro yabo tukabafasha ,tukabarinda mu rwego rwo guteza imbere imibereho myiza.

Icyo Bibiliya ibivugaho:
“Gutanga kuzana umugisha kurusha guhabwa” aya ni amagambo umwami Yesu yavuze. Pawulo nawe yayasubiriyemo abakuru bo mu itorero rya Efeso abakangurira gukora imirimo ngo babone uko bafasha abadakomeye. (Ibyakozwe n’intumwa 20:35-38)

Abizeye bose bahuzaga umutima n’inama kandi nta n’umwe wagiraga ubwiko ku kintu, ahubwo byose barabisangiraga. Nta mukene wababagamo kuko barafashanyaga uko bashoboye kose bakirinda ko hagira uheranwa n’ibibazo. (Ibyakozwe n’intumwa 4:32-35)

Birakwiye turangwa n’umutima w’urukundo tugafasha abantu uko dushoboye tutitaye ku masano dufitanye cyangwa twumva ko bagomba kutwitura, ahubwo tujye tubikora tubikunze nk’abakorera ingororano tuzahabwa n’Imana.

[email protected]