Guca bugufi imbere y’Imana

Maze abantu banjye bitiriwe izina ryanjye nibicisha bugufi bagasenga, bagashaka mu maso hanjye bagahindukira bakareka ingeso zabo mbi, nanjye nzumva ndi mu ijuru mbababarire igicumuro cyabo, mbakirize igihugu. Uhereye none amaso yanjye azajya areba, n’amatwi yanjye azajya yumva gusenga kuzasengerwa aha hantu.(2Ngoma7:14-15)

Iyo dusomye muri Yohana 1:12-13 haragira hati “Icyakora abamwemeye bose bakizera izina rye, yabahaye ubushobozi bwo kuba abana b’Imana. Abo ntibabyawe n’amaraso cyangwa n’ubushake bw’umubiri, cyangwa n’ubushake bw’umugabo, ahubwo babyawe n’Imana.”

Urufunguzo rwo kugirango Imana igirire umuntu imbabazi ni uguca bugufi. Imana ituye Ahera, Imana ishobora byose, Imana yaremye isi n’ijuru, Imana yaturemye kugirango tuyiheshe icyubahiro izumva gusenga kwabo. Urufunguzo rwo kugirango Imana yumve gusenga kwacu, ijambo ry’Imana ryavuzengo abo bantu nibicisha bugufi. Guca bugufi bibiliya itubwiye ni igikorwa kigaragarira mu mutima, imitima yabo nica bugufi igashaka mu maso h’Imana, bazagenda babona ubwiza bw’Imana.

Icyo kintu cyo guca bugufi turagikeneye ngo tugituze mu mitima yacu kugirango Imana yumve gusenga kwacu. Imana yigeze ibwira Sawuli ko itanezezwa n’ibitambo ahubwo yita ku mutima uciye bugufi,umutima umenetse niwo Imana yishimira. Ni ryari tuzavuga ngo dufite umutima uciye bugufi cyangwa umenekeye Imana ? Ibi bigaragara igihe umuntu amaze gukora ikosa cyangwa amara gukora ikosa akumva byamutandukanije n’Imana, yarangiza akagira agahinda ko mu buryo bw’Ubumana. Bibiliya ivugako agahinda ko mu buryo bw’Ubumana ari akazana agakiza ariko agahinda ko mu buryo bw’isi kagatera urupfu cyangwa se kagatera kurimbuka.

Iyo umuntu agenda atekereza ku bintu akora mu buzima bwe bwa buri munsi akumva koko bimuteye agahinda akumva muri we ashaka gukora ibyo Imana ishima icyo gihe aba atangiye ikintu cyo guca bugufi. Bibiliya igenda igaruka ku kintu cyo guca bugufi kenshi,ikatubwirako Imana idakunda abantu bafite ubwibone bwo mu mitima cyangwa bishyira hejuru ahubwo Imana ikunda abantu kandi ikorana n’abafite imitima iciye bugufi. Abantu bibiliya ivuga bagiye bakora ibintu bikomeye, bakagera ahantu hakomeye ni abari bafite imitima iciye bugufi.
Iyo usomye muri Yesya 57:15, haravugango, Nimwumve uko Iyo iri hejuru cyane, ituye ahahoraho ivuga, izina ryayo ni Uwera ikavuga iti “Aho ntuye ni hejuru kandi harera. Mbana n’ufite umutima umenetse wicisha bugufi, kugira ngo mpembure imyuka y’abicisha bugufi, mpembure n’abafite imitima imenetse. Kimwe mu bintu dukeneye ni ukugirango tube inshuti n’Imana, iri jambo rije ribyemeza kugirango umuntu abe inshuti n’Imana, agendane n’Imana ni uko agira umutima uciye bugufi. Ikindi uyu muntu umaze kugira umutima uciye bugufi ntabwo Imana yumva gusenga kwe gusa ahubwo igenda imuyobora mu nzira zayo, ikamwigisha ikamubwira ati” Ibi simbikunda ,ibi ndabikunda.”

Ubundi umutima uciye bugufi utega amatwi ukumva, warangiza ugashyira mu bikorwa ibyo wumvishije ariko umutima urimo ubwibone ukunda kwishyira hejuru ikindi ntugirwa inama, bene aba bantu hari ubwo ujya kumugira inama warangiza ukicuza impamvu wamuganirije kubera ujya kumubwira ibintu akibwirango ibi ndabizi, ibi ngibi ndabizi kandi ikintu cyose ugerageje gukora ubonako ari cyiza we abona ari amafuti, we yumva ariwe muntu ushobora gukora ikintu kiza abandi bose bakora amafuti. Mwene uyu muntu wumva ariwe ukora ibintu byiza gusa uyu aba ahorana ubwibone mu mutima.

Hari ibintu bimwe na bimwe muzasanga abantu benshi bagenda bubakiraho bikazamura ubwibone bwo mu mutima kandi byose ari ibitizanyo. Hari igihe tugira umugisha Imana ikaduha ibintu runaka, tukabitunga bikaba imitungo yacu, twarangiza kubera kwibagirwa aho Imana yadukuye ugasanga byabintu Imana yamutije agenda abikandagirisha abandi: Yagize amahirwe y’akazi keza,urugo rwiza ariko kuko aziko hari abandi batabifite we akabigira iturufu yo kwereka abandi ko bari munsi y’ibirenge bye ahubwo aribwo yagaciye bugufi kugirango Imana igende imwongera kuri byabindi afite.

Umwami Nebukadinezeri yagiye I Buyuda akurayo abanyagano abazana I Babuloni, bagezeyo atoranyamo abasore beza bato bafite ubuhanga kugirango abarere abigishe ubwenge bw’Abakarudaya, igihe kimwe amaze kubaka Babuloni arihimbaza aravuga ati “ Babuloni yanjye niyubakiye” muri ako kanya umwami Nebukadinezari yumva ijwi rimubwira ngo ubwami bwawe ubukuwemo.

Nebukadinezari yari yarigeze kurota inzozi babasha no kuzimusobanurira ariko kuberako atumvaga ibyo bamugiraho inama,atumvaga ibyo umwuka w’Imana urimo kumubwira yanga kubyumvira arangije arihimbaza mu mutima. Iyo dukomeje gusoma inkuru yo mu gitabo cya Daniyeli hatubwirako Nebukadinezari yagiye mu ishyamba imyaka irindwi, ari kurisha kimwe n’andi matungo kandi ikindi yatondwagaho n’ikime nkuko ikime gitonda kubyatsi. Ijambo ry’Imana ritubwirako Nebukadinezari igihe gishize yongera gutekereza ukuntu Imana ikomeye ariyo ishyiraho abami ikabakuraho, ariyo ishyira ikuzimu ikagarura I buntu, ariyo ifata umuntu waruciye bugufi ikamwicazanya n’ibikomangoma yongeye gutekereza kuri ayo magambo aca bugufi atakambira Uwiteka. Imana iramwumva irangije imusubiza mu mwami bwe.

Ibintu byose umaze kugeraho ntabwo byavuye mubushobozi bwawe, ntanubwo byavuye mu mbaraga zawe cyangwa mu mashuri wize, ahubwo ibintu byose umaze kugeraho byavuye mu bushake bw’Imana. Niba hari abantu wajyaga usuzugura bitewe nuko batareshya nawe,utangire wige guca bugufi niba hari abo wasuzuguye usubire inyuma ubasabe imbabazi. Imana itakurengeye ntawakurengera. Ijambo ryarambwiye mu 2 Ngoma 7:13 hagira ati “Nindamuka nkinze ijuru imvura ntigwe, cyangwa nintegeka inzige ngo zone igihugu, cyangwa ninohereza mugiga mu bantu banjye” Nubundi Imana itagize icyo igukorera ntacyo wageraho kuko nabagira icyo bagufasha ni ukubera Imana.

Benedata ni byiza kwibuka aho Imana yagiye idukura mu buzima butandukanye kandi guca bugufi ntabwo bikuraho icyubahiro cyawe ahubwo nibwo abantu barushaho kukubaha kuko baba babona ko usabana n’abantu bose, ntabantu uheza , Ijambo ry’Imana rivugako abashaka ubwiza n’icyubahiro no kudapfa babishakisha gukora ibyiza badacogora , gukora ibyiza tudacora ni uko dukwiye kubikorana umutima uciye bugufi nibwo Imana izatwishimira, nibwo tuzagirana ubushuti n’Imana.

Imana ikorana n’abafite umutima uciye bugufi niba ufite umutima uciye bugufi itegure gukora n’Imana, Imana izagukoresha ibikomeye, Imana izakugeza ahantu utagombaga kwigeza. Niba utaragira umutima uciye bugufi saba Imana iguhe umutima uciye bugufi kimwe mu bantu b’Imana bakeneye ni ugutunga umutima uciye bugufi.
Imana iturinde gukora ibihuye n’amarangamutima yacu bigatuma tujya kure y’Imana

Isamel Agakiza.org