Ese wafatikanya kuvuga ubutumwa bwiza n’indi mirimo ukora?

Abantu benshi batekereza ko kubwiriza ubutumwa bigarukira gusa ku bashumba cyangwa abandi bayobozi b’amatorero ariko ibi si byo, kuko buri muntu aho ari hose , icyo akora cyose akwiye kuvuga ubutumwa kandi akazana abantu ku Mana.

Bibiliya itwereka ingero nyinshi z’ abantu bakoze ubutumwa mu bintu bitandukanye, nka Tabita wadoderaga imyambaro abakene n’abandi . Ibi biratwereka ko buri muntu aho ari hose ashobora gukora ibiri mu mugambi w’Imana.

Abantu benshi batekerezako gukorera Imana bikwiye gukorerwa gusa mu itorero, kuririmba, gusoma ijambo ry’Imana, n’ibindi ariko dukwiye kurenga inkuta z’insengero tugakorera ubutumwa hanze yaryo.

Ese imirimo ukora , ikorwa mu kubwira abantu ubutumwa bwiza ? Ese ufite resitora? Ushobora kugaburira abatagira aho baba rimwe ukaba uvuze ubutumwa bwiza.Ese uri umucuruzi? Reka imvugo yawe y’ubugwaneza no kubana neza n’abandi bizane abantu kuri Kristo.

Pawulo yazige ati “Ibyo mukora byose mubikore mubikuye ku mutima, nk’abakorera Shobuja mukuru badakorera abantu”( Abakolosayi3:23). Ibi bivuzeko ibyo dukora byose, dukwiye kubikora dukorera Imana.

Umwami Yesu yaravuze ngo: “Nk’uko Umwana w’umuntu ataje gukorerwa, ahubwo yaje gukorera abandi no gutangira ubugingo bwe kuba incungu ya benshi.”(Matayo20:28)

Mu gihe cye, Yesu ntiyagumye mu isinagogi yigisha ahubwo yagiye mu bice bitandukanye akora ibintu byiza anakiza abari mu bubata bwa satani kuko Imana yari kumwe na we. “Ni irya Yesu w’i Nazareti, uko Imana yamusutseho Umwuka Wera n’imbaraga, akagenda agirira abantu neza, agakiza abo Satani atwaza igitugu, kuko Imana yari iri kumwe na we.”( Ibyakoz 10:38)

Abantu b’ubwoko bwose baramukurikiraga akabigisha gusenga no gukunda Imana. Yagaburiye abantu ibihumbi, yigisha benshi harimo n’ Umufarisayo witwaga Nikodemo, akiza abarwayi, azura abapfuye. Mbere y’uko ava hano ku isi ajya kwicara iburyo bw’Imana Data, Yesu yasize ategetse abagishwa be kujya mu mahanga yose bagahindura abantu abigishwa. “Nuko Yesu arabegera avugana na bo ati “Nahawe ubutware bwose mu ijuru no mu isi.
Nuko mugende muhindure abantu bo mu mahanga yose abigishwa, mubabatiza mu izina rya Data wa twese n’Umwana n’Umwuka Wera, mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y’isi.”(Matayo28:18-20).

Buri mukristo yaba ukora ubucuruzi, umwarimu, umuyobozi, umushumba w’itorero, yahawe ububasha bwo kugera kubantu bose akabashyira ubutumwa bwiza. Dukwiye gukorera Imana ahantu hose turi, no mubyo dukora byose.

Sophie @agakiza.org