Ese satani adufiteho ububasha ?


“Kandi Umwami Yesu aravuga ati ‘Simoni ,Simoni, dore Satani yabasabye kugira ngo abagosore nk’amasaka’.”Luka 22:31

Abantu benshi bakunze kwibwirako niba Imana ari umwami w’Ijuru, satani na we ari imana y’ikizimu,bagatekereza ko ifite ubushobozi nk’ubw’Imana, kandi ko imbaraga z’urumuri zingana ni z’umwijima, icyiza kikangana n’ikibi.

Bibiliya itubwirako Imana ihora ari Imana ibihe byose , ko ari imwe rukumbi, ko n’abadayimoni babyizera bagahinda imishyitsi(Yakobo2 :19).Satani ubwe azi ko adahwanyije ubushobozi n’Imana,icyo akora ni ukuriganya abantu kuburyo batekerezako ahwanye n’Imana ariko mu by’ukuri yaciriwe ikuzimu.

« Wa nyenyeri yo muruturuturu we, mwana w’umuseke ko uvuye mu ijuru ukagwa ! Uwaneshaga amahanga ko baguciye bakakugeza ku butaka !Waribwiraga uti ‘Nzazamuka njye mu ijuru nkuze intebe yanjye y’ubwami isumbe inyenyeri z’Imana, kandi uti ‘Nzicara ku musozi w’iteraniro mu ruhande rw’impera y’ikasikazi, nzazamuka ndenge aho ibicu bigarukira,nzaba nk’Isumbabyose.’Ariko uzamanuka ikuzimu ugere ku ndiba ya rwa rwobo. » (Yesaya 14:12-15)

Iyo dusomye mu b’Abakolosayi 2 :15 hatubwirako Kristo yahemuye kumugaragaro abatware n’abafite ubushobozi binyuze ku musaraba . Ku bwa Kristo satani yaratsinzwe ategereje umunsi azacirwaho urubanza.

« Kuko ubwo Imana itababariye abamarayika bakoze icyaha ahubwo ikabajugunya mu mworera, ikababohesha iminyururu y’umwijima ngo barindirwe gucirwa ho iteka » (2Petero2 :4).

Niki dukwiye gukora kugira ngo turwanye satani?

Muri iki gihe abantu benshi ba bakristo baracyahagaze ku binyoma bya satani, ntibarakamenya ukuri, ariko bakwiye kumenyako iyo umuntu ari muri Kristo, satani nta mwanya akwiye kugira mu buzima bwabo, ko nta buyobozi abafiteho.

“ Sinkivugana namwe byinshi, kuko umutware w’ab’iyi si aza kandi nyacyo amfiteho.”(Yohana 14:30)
“Dore mbahaye ubutware bwo kujya mukandagira inzoka na sikorupiyo, n’imbaraga z’Umwanzi zose, kandi nta kintu kizagira icyo kibatwara rwose.”( Luka: 10:19)

Yesu yabwiye Petero ati: “Kandi Umwami Yesu aravuga ati ‘Simoni ,Simoni, dore Satani yabasabye kugira ngo abagosore nk’amasaka.”(Luka 22:31)

Uyu murongo uratwumvisha ko satani adashobora gukora ibyo yishakiye ku bantu b’Imana, mbere yo kugira ikintu akora kuri twe, agomba kubanza gusaba Imana ikabimwemerera.

Yobu 1:6-12 hatubwirako Imana na satani baganiraga , Imana igashima Yobu kubwo kuyubaha no kuyikiranukira, satani ntiyarafite icyo amushinja,ariko yifuje kugerageza Yobu niko kumusaba Imana.

“Uwiteka asubiza satani ati “ Dore ibyo atunze byose biri mu maboko yawe, keretse we ubwe kumuramburaho ukuboko kwawe.”Nuko satani aherako ava imbere y’Uwiteka.”(Yobu: 1:12)

Ariko satani yananiwe kugera ku ntego ye yo gutuma Yobu yihakana Imana. Muri Yobu igice cya 2 dusoma ko Imana yongeye gushima Yobu,satani ayisubiza amurega.Imana yongera kumuha uburenganzira kuri we uretse gusa ubugingo bwe.

Niki dukwiye kwigira kuri ibi?

Nshuti, satani ntashobora kugira ikintu cyose adukoraho keretse gusa Imana ibimwemereye. Ariko ibi ntibisobanuyeko Imana ishaka kutugirira nabi no kudutera ibyago , ahubwo bivuzeko umwanzi adashobora kutugirira nabi uretse igihe Imana ibonako tubasha kwihanganira ububabare , ikabona guha satani uburenganzira bwo kutugirira nabi, nk’ikimenyetso cy’ukuntu Imana idutangira ubuhamya ko tuyikiranukira.

“Dore ni jye urema umucuzi uvugutira umuriro w’amakara agakuramo icyuma akoresha umurimo we, kandi umurimbuzi namuremeye kurimbura.Ariko nta ntwaro bacuriye kukurwanya izagira icyo igutwara, kandi ururimi rwose ruzaguhagurukira kukuburanya uzarutsinda.Ibyo ni byo murage w’abagaragu b’Uwiteka, kandi uko ni ko gukiranuka kwabo guturuka aho ndi. Ni ko Uwiteka avuga.”

Abakiristo bakwiye kumenya imigambi yose ya satani , kandi bagafasha n’abandi kumenya urukundo rw’Imana, bagaharanira gusa nka Kristo,kuko abo Imana yamenye kera yabatoranirije gushushanywa n’ishusho y’Umwana wayo.

[email protected]