Ese nkwiye kwikunda ngakabya? (Selfishness)

Mu mibereho ya muntu kuva avutse kugeza arangije urugendo rwe hano ku isi arangwa no kwikunda cyane, si ukuvuga ko kwikunda ari bibi ariko iyo birengeje urugero hari icyo bibyara . Wakwibaza ngo biterwa n’iki? Bigira izihe ngaruka mu mibanire y’abantu?

Kuva icyaha cyakwinjira mu isi, Abantu bose (uretse Yesu) bavukanye icyaha. Twafatira isomo ku bana bato. Ufashe igikinisho ugihereje umwana muto ngo agikinishe hanyuma uramubwiye ngo atize abandi bana nabo bagikinishe. Umwana azanga kubatiza, agikoreshe wenyine.

Abana bamwe bagera aho bakarambirwa ibikinisho byabo, bityo bakabishyira hasi ntibongere gukina, ariko iyo babonye hari undi ugifashe agatangira kugikinisha, bahita bakimushikuza bakamubwira ngo tuvire ku gikinisho cyacu. Ibi rero bigaragaza ko kwikunda ari umuzi w’ibyaha byinshi.

Inkomoko y’ibibazo byinshi bibaho mu mibanire y’abashakanye bituruka ku kwikunda ndetse no kwishyira hejuru, iyo ufite iyi mico, ukimara gufata icyemezo cyo kubaka urugo uba wabanje gushima uwo muzabana ukabona agushimishije, nyamara mwamara kubana, ukamurambirwa bwa bwiza n’igikundiro wamubonagamo bikarangirira aho.

Byongeye aha niho umuntu atangira kwibaza niba yarahisemo neza, ati: “Ese uyu niwe Imana yangeneye?”

Muri macye, niba ushaka kugira urugo rwiza, ugomba kubanza ukisobanukirwa (uko wikunda ) ukamenya ingaruka bikugiraho n’iyo bigira kuwo mwashakanye. Hanyuma mwembi mugashyira hamwe mukamenya ko imbere yanyu hari intamabara hagati yo kwikunda (selfishness) no kwitanga (self-sacrifice), bityo muriyunga ntihabe hakibayeyeho ubutane.

Pawulo yatanze inama agira ati: “nicyo gituma ukwiriye kuganduka utabiterwa no gutinya umujinya gusa, ahubwo ubyemejwe n’umutima uhana” (Abaroma 13:5)
Kugirango amahoro aganze mu batuye isi birasaba uruhare rwa buri muntu wese no kureka kwizirikana ubwe ahubwo akazirikana n’abandi (Abafiripi 2:4)