Ese ni ngombwa ko umuntu asenga Imana ayisaba uwo bazabana?

Ubukwe ni igikorwa kiri mu gushaka kw’Imana,ni ikintu cyera, niyo mpamvu ari byiza gusaba Imana kukuyobora ku muntu ukwiye kugirango uhitemo umufasha mwiza. Birashoboka ko yaba ari umuntu mutarahura ariko ugomba kuba uzi neza indangagaciro umuntu w’Imana agomba kuba yujuje.

“Kandi iki ni cyo kidutera gutinyuka imbere ye: Ni uko atwumva iyo dusabye ikintu nk’uko ashaka” (1Yohana5:14).

Arasenga ati “ Uwiteka Mana ya databuja Aburamu, ndakwingize, umpe ihirwe uyu munsi, ugirire neza databuja Aburamu, Dore mpagaze ku isoko, abakobwa b’abo mu mudugudu basohotse kuvoma . Bibe bitya : Umukobwa ndibubwire nti “ndakwinginze, cisha bugufi ikibindi cyawe nyweho” akansubiza ati “ Nywaho, nduhira n’ingamiya zawe, abe ariwe watoranirije Isaka umugaragu wawe. Ibyo ni byo bizamenyesha yuko ugiriye databuja neza ”(Itangiriro24:12-14)

Umugaragu w’Imana yagaragaje ubwenge mu gusaba kwe. Umukowa utwaye ikibindi byerekanaga umuntu ufite imbaraga, utarwaye kandi ukorana umwete, guha amazi umunyamahanga byerekanaga ko afite umutima mwiza, kuhira ingamiya kugeza zihaze byerekanaga umuntu udafite ubwoba bwo gukora akazi kagoye. Kuhira ingamiya icumi ni akazi gakomeye. Ntabwo iriya mirimo yose yari gukorwa hatarimo umugambi w’Imana kubera icyifuzo umugaragu wayo yari yayigejejeho.

Uwo mugaragu wa Aburahamu ntiyicaye i Kanani ngo asengere Isaka kugirango abone umugore, yizereko Imana izakora buri kimwe cyose. Ahubwo yarahagurutse, ajya I Harani aho bene wabo na Aburahamu babaga ariko azi ibyo agomba kugenderaho asabira Isaka umugeni. Yateganyagako umugambi we ushobara kutagera ku ntego, ko bishobokako ataza kubona umugore wujuje ibisabwa.(Itangiriro24:8)

Twemerako Imana ishoboye byose hatavuyemo na kimwe. Mu bintu byose uzasaba Imana, ntuzicare ngo umere nk’utegereje ibivuye mu ijuru nk’uko imvura igwa ivuye hejuru, Ahubwo usabwa gusenga ukanakora, ukagerageza mu nzira nyinshi wabonamo igisubizo, hamwe n’uko waba ugiriyeho Imana umugisha ikakuyobora kandi n’ibyiza gusenga usaba Imana ubwenge mu byo ukora.

Imana irihagije iteka, ibi ntibishidikanywaho. Mu buryo bwose abantu babikora bifashishije amarangamutima yabo bitewe nuko batekereza Imana isumba byose iri mu ijuru, abenshi bashimangira imbaraga zayo zikomeye. Ni yo Nyir’inama, na Nyiri imigambi.

Niba wumva ukeneye kugira umufasha mwiza wubaha Imana, senga Uwiteka umusaba kukuyobora aho uwo ukeneye ari, kandi ntucike intege ugumye ushakishe unasenga.

[email protected]