Ese kurya karoti bimaze iki?

Karoti ibarizwa mu bwoko bw’imboga, ikaba ikiribwa cy’ingirakamaro ku bana ndetse n’abakuru kuko ifasha umubiri kumererwa neza habai, mu mikurire, yongera ubwirinzi bw’umubiri, karoti ifasha urwungano ngogozi gukora neza, si ibyo gusa ahubwo yunganira n’ubwonko kunoza imikorere yabwo.

Mu rwego rwo kubungabunga ubuzima buzira umuze, ni ngombwa nibura kurya karoti buri munsi, yaba ari ukuyirya itetse cyangwa kuyihekenya kuko yuzuyemo intungamubiri umubiri wacu ukenera.

Karoti ifasha umubiri mu buryo bukurikira:

Karoti ifasha umusatsi kugubwa neza: bitewe n’uko karoti ikungahaye kuri vitamine A, kuyirya bigira umumaro ntagereranywa mu gukuza umusatsi, kuwuha ireme, kuwurinda gupfuka n’ibindi.

Karoti ifasha urwungano ngogozi mu kunoza umurimo warwo: mu gihe habayeho indwara ya diarrhe, bisobanuye ko igikorwa cy’igogora kitagenze neza, kurya karoti ni umuti w’ako kanya ariko biba byiza cyane kuyihekenya.

Karoti kandi ni ingenzi ku menyo: iyo umuntu arya karoti inshuro nyinshi bituma agira amenyo akomeye, ikindi kandi karoti irwanya indwara z’amenyo n’izindi microbe izo ari zose zibasira mu kanwa.

Karoti ivura uburwayi bw’igifu: ku bantu bakunda kurwara igifu bagirwa inama yo gukamura umutobe wa karoti bakawunywa kuko womora udusebe two mu gifu.
Karoti ifasha umubiri gukora amaraso ndetse n’abasirikare: karoti ikungahaye kuri vitamine A iyi vitamine ijya mu mwijima igakora amaraso umubiri ukeneye ndetse ikunganira mu gukora abasirikare bashinzwe kurwanya ikintu cyose cyava hanze kigamije gutera indwara mu mubiri, haba mu byo kuya cyangwa mu mwuka wanduye.

Karoti ituma uruhu rutoha: umuntu urya karoti ku kigero gikwiriye zimufasha kugira uruhu rwiza ruhehereye, karoti kandi irinda uruhu kwangizwa n’imirasire y’izuba.
Karoti ifasha amaso kureba neza: nk’uko karoti iri mu bwoko bw’imboga, igira umumaro mu gusigasira ubuzima bwiza bw’amaso harimo kurinda indwara zayo.
Karoti igira umumaro ku bwonko kuko irwanya kwibagirwa: karoti yifitemo carotene ituma ubwonko bukora neza, kunoza uburyo bwo kuvuga, gukurikiranya ibitekerezo neza no kuvuga ushize amanga mu ruhame.

Nta gushidikanya karoti ifatiye runini umubiri wacu, ntidukwiye kuyirengagiza mu ifunguro dufata, nimucyo dukurikize inama duhabwa kugirango turusheho kugira amagara mazima dore ko ari yo bukungu, iyo aducitse ntacyo twatorany mu byo dutunze kibe cyatumara agahinda.

Source: www.healthline.com