Ese kugira umugisha ugatunga, ni ikimenyetso cyo kwemerwa n’Imana?

“Ntimukayobe bene Data bakundwa. Gutanga kose kwiza n’impano yose itunganye rwose ni byo biva mu ijuru, bimanuka bituruka kuri Se w’imicyo udahinduka, cyangwa ngo agire n’igicucu cyo guhinduka.”(Yakobo1:16-17)

Bibiliya itubwirako Imana ari nziza, ari umubyeyi mwiza uduha impano nziza,n’ibyo dukeneye byose. Bibiliya itubwirako Imana yagiye itanga ikimenyetso ku bantu bayisabye. Bibiliya itwereka abantu batandukanye basabye Imana ikimenyetso mbere yo kugira icyo bakora:

Gideyoni: : Abacamanza 6, tuhasoma uburyo Imana yasuye Gideyoni. Gideyoni yibwiragako Imana idashobora kumusura kuko yari umuntu woroheje.(Abacamanza6:15), maze asaba Imana ikimenyetso, Imana irakimuha.“Uwiteka aramubwira ati “Ni ukuri nzabana nawe, kandi uzanesha Abamidiyani nk’unesha umuntu umwe.”Gideyoni aramusubiza ati “Niba mpiriwe mu maso yawe, nyereka ikimenyetso kimpamiriza ko ari wowe tuvuganye.”(Abacamanza6:16-17)

Petero : Matayo 14 tuhasanga inkuru izwi cyane , igihe Yesu yagenderaga hejuru y’amazi. Petero yasabye Yesu ikimenyetso kimwemeza ko ari we amusabako yamwemerera kugenda hejura y’amazi akamusanga. “Petero aramusubiza ati “Mwami niba ari wowe, untegeke nze aho uri ngendesha amaguru hejuru y’amazi.”(Matayo14:28) Umwami Yesu yategetse ku musanga agendera hejuru y’amazi , n’ubwo nyuma yo gutera intambwe nke yatangiye kurohama.

Gideyoni yarisuzuguraga cyane kuburyo atizeraga ko Imana ishobora kumusura ikamwita ‘umugabo w’imbaraga kandi w’intwari)( Abacamanza 6:11-12). Petero na we nyuma yo kwemererwa kugenda ku mazi, yararohamye kuberako yari afite ukwizera guke. ( Matayo14:31)

Nshuti , simvuzeko tudakwiye gusaba Imana ikimenyetso cyangwa icyemeza imigambi yayo idufiteho, kuko ari byiza kubikora. Uku niko Dawidi yasenze Imana :
“Unkebuke umbabarire, Uhe umugaragu wawe imbaraga zawe, Ukize umwana w’umuja wawe. Unyereke ikimenyetso cy’ibyiza, Kugira ngo abanyanga bakirebe bamware, Kuko wowe Uwiteka, untabaye ukamara umubabaro.”(Zaburi 86:16-17)

Dawidi yari umugabo wuzuye kwizera, n’ubwo yasekwaga n’abavandimwe be, akangwa n’umwami Sawuli , akaza no guhunga kuko uwo mwami yashakaga kumwica. Ariko umutima we yawuhindukirije ku Mana, ayisaba kumukiza kugirango abamwanga bose bamware.

Imana yahaye Gideyoni ikimenyetso kuko yari imufiteho umugambi wo kumukoresha . Yesu yemereye Petero kugendesha amaguru hejuru y’amazi kuko yari afite umugambi wo kuzamukoresha iby’ubushake bwe. Byongeye kandi Yesu yemereye Petero kugendera hejuru y’amazi kugirango atwereke mu by’ukuri ko ari we, ko ari Imana isumba amazi. Ku rundi ruhande, Dawidi yasabye Imana ikimenyetso cyo kumuba bugufi no kumwereka urukundo rwayo.

Imana ishobora gutanga ikimenyetso kuko ari Imana nziza atari uko dukomeye. Bityo rero iyo iduhaye umugisha mu bigaragara si uko tuba turi beza cyangwa dukomeye ahubwo ni uko Imana ihora ari nziza, iba ishaka kudusukira umugisha wayo.

Ikintu cyiza n’indi mpano yose nziza ituruka ku Mana, harimo n’imigisha iduha. Ariko iyo dushyize imitima yacu ku migisha Imana yaduhaye, aho gushishikarira gukora ibiri mu bushake bwayo , bidatinze tuzisanga twagiye kure yayo kandi dukora ibitayishimisha. Ntimuyobe bakristo,kandi niba dushaka ikimenyetso cy’Imana , soma ijambo ry’Imana kuko icyemewe cyangwa icyangwa nayo kiboneka mu ijambo ry’Imana.

Sophie @ agakiza.org