Ese koko ku musaraba biranagana? Ibiki?


Iyi nteruro si nshyashya mu matwi ya benshi, ni kenshi inyigisho zitandukanye twakunze kumvamo ko ku musaraba binagana. Wakurikirana neza ugasanga ibyo tubwirwa binagana bitandukanye cyane n’intego y’umusaraba mu by’ukuri.

Uzumva bakubwira ngo ku musaraba hari Viza, Imodoka, Inzu, umugore, umugabo, abana, mbega bya byifuzo byose muzi bikomeye duhora dusengera hano ku isi.
Njyewe rero ndagira ngo twiganirire nkwibutse ko na mbere y’uko umusaraba ubambwaho umucunguzi ibi byose byari bihari. Intego nkuru yo kuza kujya ku musaraba kwa Yesu si ugusubiza bene ibi byifuzo tuvuze haruguru.

Twaba dutesha agaciro amaraso ya Yesu turamutse dukomeza kumusanga kubera impamvu z’umuceri, ibirayi, n’ibindi. Ibi n’umuntu usanzwe muziranye cyangwa mutanaziranye yabiguha.

Yesu yatuzaniye icyo tutari guhabwa n’inshuti, tutari guhabwa n’urubyaro, n’abakomeye, n’ababyeyi, cyangwa undi muntu wese wo ku isi.

Umujura ntazanwa n’ikindi kereste kwiba no kwica no kurimbura, ariko njyeweho NZANYWE NO KUGIRA NGO ZIBONE UBUGINGO. Yohana 10:10

Yesu aza mu isi yazanye ikitari gihari. Simpamya ko abavuga ko ku musaraba binagana baba bazi neza icyo bari gukora, ariko njye mbibonamo umugambi ukomeye wihishe wo gukundisha abantu isi bakibagirwa ijuru, kandi uko bakumbura isi niko bihata kuyikorera hanyuma uko bibagirwa ijuru ni nako bagwa mu mutima ntibibuke ko byose birangiye hariho ubugingo buhoraho.

Nawe urumva umuntu wakirijwe mu giterane cyo kwakira igitangaza n’ubuhanuzi nka bimwe tumenyereye, agakizwa n’uko bamubwiye ko Imana igiye kumutuza mu Mudugudu w’abaherwe, ko agiye kubona viza, ko agiye kubona umugabo w’umukire... bizagorana cyane kugirira inyota kubona Yesu amaso ku maso, ahubwo umutima we utumbiriye igitangaza cyo kunezeza umubiri gusa.

Satani akora mu buryo bw’ibanga bukomeye, ikibabaje nuko aterwa inkunga na benshi mubo twita abakozi b’Imana. Nkababazwa cyane n’uko bamwe muri bo baba bazi icyo bakora abandi nabo bakabigenderamo gutyo gusa kuko babonye bikora bakayoba gutyo batabizi.

Icyo gitangaza bashobora kukikubeshya cyangwa bakanagikora, ariko wibuke mbere y’uko Yesu akiza umubiri yabanzaga kureba uburwayi bw’umutima. Iyo Mana ibona ko ukwiye Imodoka itabonye ko waraye usambanye wakagombye kuyigirira amakenga.

Ku musaraba wa Yesu rero hatonyanga amaraso yeza ibyaha agatanga ubugingo, nicyo yazanye kuko ni cyo isi itagiraga. Naho ibindi baratubeshya. Hari abatunzi benshi mu buryo bw’umubiri kandi bakijijwe, hari n’abakene benshi mu buryo bw’umubiri kandi bakijijwe. No mu badakijijwe birasa.

Igitandukanya ukijijwe n’udakijijwe, nuko ukijijwe ahora yizeye ko icyo abonye cyose giturutse mu kuboko kw’Imana, kandi akacyakira nk’ubufasha mu rugendo kuko ategereje kugera ahataba ibyifuzo, bityo bikamutera gushima Imana muri byose mu bibi no mu byiza.

Hanyuma abadakijijwe bo babibona mu buryo bwabo ntari butindeho, kandi nyuma yabwo hari umuriro utazima baba babyemera cyangwa batabyemera.

Ese waba warakijijwe bakubwiye ko uzahita uba umuherwe ? Ese ubutumwa busa butya waba ujya uhura nabwo? Dukwiye kuba maso tugashaka Imana yacu bwite kandi tukayizera uko itwihishurira mu ijambo ryayo, tugashishikarira kurisoma kandi tugasaba umwuka wera udufasha gutandukanya ukuri n’ikinyoma, bitari ibyo satani yayobya benshi. (2Timoteyo 3:1-17)

Niba hari aho wibonye mu Ijambo ry’Imana wasitaye cyangwa waba warayobye bigatuma uva ku Mwami wawe cyangwa umuvuga nabi mu buryo butandukanye, egera abakozi b’Imana bagufashe gusenga wihane ugaruke mu nzira yawe, imigisha y’Imana izagusanga mu nzira ugenda ujya mu ijuru igamije kugufashe gukomeza, Imana ntizaguha ibyo usaba gusa, ahubwo izaguha ibyo ibona bikwiye, akenshi utanasabye, ntizaguha ibikugusha cyangwa ibikunaniza, wowe ntiwabimenya ariko yo irabibona kuko ireba imbere aho wowe utareba kandi ariyo nzira uzanyuramo.

Vedaste Niyondora @agakiza.org