Ese ikoranabuhanga ryatubuza kujya guterana kwera?

Muri iki gihe, ikoranabuhanga rifite uruhare rukomeye mu guhindura isi, kandi rigira uruhare rutandukanye mu iterambere ry’ibihugu,usanga rikoreshwa mu guhaha, kwivuza,kwiga,gukurikirana inama n’ahandi ndetse muri iki gihe usanga no mu buryo bw’imyizerere abakristo benshi batakitabira kujya mu nsengero,bagahitamo gukurikirana amasengesho cyagwa ibyigisho kuri televiziyo,radiyo,imbuga nkoranyambaga bakumva nta mpamvu yatuma bafata ingendo ndende bagana insengero.

Ni byiza rwose gukoresha ikoranabuhanga kuko ridufasha mu mirimo itandukanye kandi ikihuta.ariko rero mu buryo bw’imyizerere birakwiye ko ababishoboye bashishikarira guteranira hamwe kugirango baronke ubuntu bw’Imana . Ntidukwiye kwirengagiza ko hari abadashobora kujya guterana bitewe n’impamvu zitandukanye zirimo uburwayi,abari ahantu hataba insengero,aho ubutumwa bwiza butaragera, abakora imirimo itabaha akanya ko kujya gusenga,…. Kandi nabo bakeneye kwakira ubutumwa buruhura imitima yabo buva kuri Yesu ,bikaba ngombwa kwifashisha ikoranabuhanga mu gushaka ubutumwa bwiza bufasha ubugingo bwabo.

Muri iyi minsi ikoranabuhanga rikataje,usanga hari amayeri menshi satani akoresha yinjiriye mu ikoranabuhanga ,akazinura abakristo kujya mu materaniro, akabumvisha ko yaba uwasengeye mu rugo(uwakurikiye icyigisho kuri radiyo,televiziyo,imbuga nkoranyambaga, )n’uwagiye mu rusengero bose ko nta tandukaniro, ko hose ari ugusenga no gusenga bityo akabavutsa umugisha bakura mu nzu y’Imana. Doreko akenshi umuntu asa naho atinze umwanya. Gukurikirana ijambo ry’Imana uri ahandi bitandukanye no kurikurikirana hari umwigisha imbere yawe ntakindi kirangaza gihari uhanze amaso kuvuga kandi utekereza gusa ibyo ubwibwa n’Imana.

Ariko se ni uwuhe mumaro wo kujya guterana n’abandi ?

Mu rusengero si ahantu twigira ubutumwa bwiza gusa ahubwo ni ahantu hatuma dusangizanya ubuzima bityo bigatuma n’abakristo bakura mu by’umwuka.Mu nzu y’Imana hatuma abakristo basangira ubuzima/ubuhamya bigatuma bakomera rwose kandi bakabona imbaraga zibakomeza n’iyo baba baca mubikomeye.
Mu guteranira hamwe kandi Imana ubwayo iriyizira, iyo abantu bateraniye hamwe bituma Imana ibishimira kandi ikazanywa no kubaha umugisha wayo.

Guterana kandi bigira umumaro kuko bituma twigana ubuzima bw’intumwa za Yesu,kandi tukarushaho gusobanukirwa n’ubutumwa dufite hano mu isi.(Intumwa za Yesu zahuriraga hamwe zigasenga,bigatuma zibona imbaraga zibakomeza mu buzima bwabo.Guhurira hamwe rero mugasenga ,mukinginga bituma Imana ibaha imbaraga zo gutsinda ibibagerageza.

Ese bibiliya ivuga iki ku guterana ?

Mu rwandiko rwandikiwe Abahereyo 10 :25 hagira hati « Twe kwirengagiza guteranira hamwe nkuko bamwe bajya bagira,ahubwo duhugurane kandi uko mubonye urya munsi wegera,mube ari ko murushaho kugenza mutyo ».

Birakwiye ko abakristo bashishikarira guterana n’abandi bagasangizanya amateka yaranze ubuzima kandi bagafatanya kwigira hamwe iby’iki gihe tugezemo no kwitegura kugaruka k’Umukiza wacu.
Imana itwigishe kumenya iby’igihe tugezemo mu izina rya Yesu.
[email protected]