Ese ibi nawe ujya ubitekerezaho? Ntacyo se bikwigisha?

Ibintu byose Imana yaremye biremanywe ubuhanga butangaje ku buryo igihe cyose ubyitegereje ushobora kubikuraho isomo kandi ritari rito. Aha tugiye kuganira ku itungo rito ryitwa inkoko. Turareba uburyo inkoko ibaho kuva iva mu igi kugeza ikuze. Uhawe ikaze muri iyi nyigisho, kandi ndasaba Imana ngo igusobanurire ibiruta ibyo nanditse mu izina rya Yesu.

-Inkoko ni itungo risuzuguritse cyane ku buryo ingo z’abakomeye zidakunze kuryorora, nyamara bagakunda kurirya n’ibirikomokaho byose. Si ingo nyinshi uzanga boroye inkoko cyane cyane mu mijyi no mu ngo z’abakomkeye, ariko abo nibo baza kumwanya wa mbere mu gukenera inkoko n’amajyi yazo.

Isomo: Ushobora kuba utubashwe ndetse udahabwa umwanya imbere y’abakomeye, ariko uri uw’agaciro imbere y’Imana, ndetse amasengesho yawe atunze benshi muri abo bakomeye, kuko usengera igihugu, usaba imvura n’izuba, n’ibindi. Ikindi Kuba ukiri mu isi niyo mpamvu isi igifite ubuzima umunsi itorero ryatashye nibwo isi izamenya agaciro wari ufite n’ubwo ugaragara nk’insuzugurwa.

-Inkoko itangira ari igi. Igi riba rifite ishusho y’ibuye, ntirigira ahagaragara rihumekera, biragoye kwizera ko hazavamo ikinyabuzima kigenda gihumeka. Ubwo ni ubuhanga bw’Imana ubwayo. Ariko inkoko iriryama hejuru kugeza icyo yizeye muri ryo ikibonye.

Isomo: Uyu munsi nawe ubwawe biragoye ko wakwihamiriza uti: "nzaba iki n’iki" bitewe n’ubuzima ubayemo. Ariko ndagutangariza ko Imana iha igi kuba isake itananirwa kuguhindurira imibereho. Rindira amasezerano yawe wizere kugeza igihe azasohorera. Kwizera ntibigira umupaka, iherezo ryo kwizera ni igihe icyo wizeye ukibonye. (Yesaya: 60:22)

-Inkoko imaze kuva mu igi, iba ari akantu gato cyane kandi gahigwa n’ibikoko byinshi kandi bikarusha imbaraga pe. Gatangira kwiga kwicungira umutekano kakiri gato kugeza kabaye gakuru aho kabasha kwimenya ubwako kakamenya n’izindi nkoko.

Isomo: Ndagutangariza ko uhigwa n’ibinyembaraga ngo bigukure mu murongo wo gutunganira Imana, yewe no gupfa burya wapfa. Kuko bikurusha imbaraga rero, ntubasha kubirwanya ngo ubitsinde, hungira muri Yesu arakurengera akurwanirire kandi akuneshereze. Imana yemera ko urwana iyo ntambara ukiri muto (Ugiciriritse) kugira ngo numara kugera mu rwego rwo hejuru uzabashe kuzirikana abakiri aho wahoze.

-Inkokokazi itera igi, ikamarana naryo iminsi 21 yose iribundikiye irishyushya kugeza igihe rizatangira umusaruro. Umva akantu gatangaje. Burya ngo iramutse igize ibyago ikayararira ari amahuri (Itarabanguriwe) ngo igumana nayo kugeza igihe nyirayo azabitahurira akayikuramo ku ngufu. Igira kwihangana guteye ubwoba.

Njyeze aha nibuka ukuntu Danyeri nawe yihanganye agategereza igisubizo cy’amasengesho ye iminsi 21 numwe yose, kandi yahavuye atabawe. Ntekereza ko iyo arambirwa akagenda mbere byari kuba birangiye. (Danyeri:10:13)

Isomo: Ntuzigere na rimwe ugira impamvu ituma ugamburura imbere y’amakuba, nunapfa uzapfe wiringiye Imana uzaba intwari mu gihe cy’umuzuko. Komeza usenge wirinde kandi wizere Imana yawe. (Imigani: 24:10)

-Inkoko, nyuma yo kwihanganira inzara yo kurarira amabuye akavamo imishwi, Itoragurira abana bayo kandi nayo idahaze.

Isomo: Amasezerano amaze gusohora rero, ukwiye kuyarinda kugira ngo ibisubizo bitagupfira ubusa, cyangwa satani akabikuriganya ugasubira uko wahoze.

Aha kandi ugomba kubyara: Ukwihangana kwawe kuvuga ubutumwa abakizwa bakaboneka. Usabwa kubitaho nabo, ukihotorera abashonje muribo, ntabwo ubagaburira ibyo usigaje, wambika imfubyi atari uko nawe wambaye ibyo ushaka byose. Iyo ufasha abato, (Abacishije bugufi) Yesu yavuze ko ariwe uba ufasha kandi azabikwitura. (Matayo: 25:40)

-Inkoko ishobora guhara inyungu zose yabonaga ku muntu ariko ntayikubitire umwana (Umushwi). Iramusimbukira n’uburakari bwinshi nk’uko ibigenzereza ibikoko byose.

Isomo: Ntugatange amahirwe na make ngo isi na satani bakinishe ibyo waruhiye. Njya ufuhira abo wabyaje ubutumwa, ubabe hafi igihe bishoboka kandi ubasengere. Ntukagurane iby’ubugingo indamu zo mu isi. Nugira umutima umeze utyo Imana ntizakuba kure, no mu gutabaruka kwawe uzagenda uri intwari nka barya batubanjirije.

-Imishwi y’inkoko yubaha nyina ku buryo bukomeye. Nyina irahamagara gusa, imishwi yose ikayikurikira itabajije aho bajya. Iyo imaze gukura rero nayo ikabyara, ibikora neza nk’uko nyina yabikoraga.

Isomo: Muvandimwe, burya uburere abantu bakubonana buhita bwambika isura uwakureze, wabyemera utabyemera. Aha abarera n’abarerwa bahafite inshingano ikomeye. Nyabuneka abarera mugishe Imana inama, murere neza kuko murarera abarezi, kandi uko mubarera niko nabo bazarera. Abavugabutumwa benshi babwiriza nk’uko babwirijwe. Akirisito benshi bakunda kuvuga nk’abashumba babo, ibyo bakora akenshi bisa n’iby’abashumba babo.

Nawe ukiri muto ukeneye kurerwa, iga guca bugufi nyabuneka, ugishe inama kandi wemere guhanwa. Impamvu y’uburere ntuyibona ukirerwa uzayibona umaze gutandukana n’ukurera. Reka agasuzuguro, reka ubwigenge, iga kugandukira abakurera haba mu mwuka no mu mubiri, nibwo uzakura neza ube icyo Imana ishaka ko uba cyo, kuko niko yabigennye, na Yesu ubwe yabanje kuba mu muryango arerwa nk’abandi bana bose.

Ntabwo bisaba ubushishozi bwinshi kugira ngo utandukanye umuntu warezwe n’utararezwe. Biragatsindwa guhurira n’umuhanuzi, umushumba, umuririmbyi, umuvugabutumwa, umudiyakoni mu murimo atararezwe. Ntiyomora abakomeretse ahubwo aho anyura ahasiga inkomere gusa.

Impano ni nziza ariko iyo zifatanije n’uburere bwiza bigira umumaro mwinshi. Naho iyo zihari nta burere aho kungura abantu zihinduka umutwaro ku bantu.

-Inkoko igira amakenga ku buryo imenya ko agaca kaje kakiri kure mu kirere, kandi yo iba ireba hasi itoragura ibiyitunga.

Isomo: Muvandimwe amaso yawe ntagahore mu isi ngo n’umutima wawe wose utwarwe n’irari ryayo wibagirwe ko uri ku rugamba kuko umwanzi iyo atera ntateguza, ugomba gukora byose usabwa ariko ugahora uri maso witeguye ko igihe cyose satani ashobora kugutungura mu buryo ubu n’ubu, akakwangiriza ubugingo n’umubiri atawubabariye.

-Inkoko iyo imaze gucuka itandukana na nyina ikajya kwibeshaho kandi nayo igaturaga izindi.

Hari abakirisito banze gukura burundu kandi barabonye ibibakuza byose.
Isomo: Niba warabwirijwe ubutumwa ukihana, ukaba wumva ari byiza kuki utumva ko ufite inshingano yo kubwiriza abandi no kuberera imbuto ngo nabo bakizwe? Ntuzahora uri nk’umwana ukwiye kurerwa ugakura nawe ukarera abandi.

-Inkoko ntijya iganya uko byagenda kose iyo itaziritse ibona ibiyitunga kandi ikubahiriza neza igihe. Igira igihe itahira, igihe ibyukira, ndetse igira n’igihe iruhukira iyo iri gutora. Kandi ntishobora kuyoberwa aho itaha.

Isomo: Ntukabe umunebwe Muvandimwe, ntugahore uteze amaboko ku bantu, gerageza ukoreshe amahirwe yose Imana iguhaye kugira ngo nawe ubeho ubuzima buhimbaza Imana. Twese ntituzaba abakire ariko kandi ntabwo Imana yaturemeye kwicwa n’inzara no guhorana amaganya.

Hari n’abo Imana icira inzira bakagenda bagiye hehe no kwibuka inzu y’Imana.

Muvandimwe numara kubona imigisha y’Imana ntukibagirwe. Ntugasengere kujya mu gihugu ukunda, hanyuma Imana nigucira inzira ukagituramo, ngo uyiture kwivuruguta mu byaha no kuzinukwa inzu yayo. Jya wibuka ko ku Mana ariho hari ubuturo bwawe, dore n’inkoko ntiyoba iwabo kabone n’ubwo yatorera kure.

Navuga byinshi kuri iri tungo, ariko kimwe nashimangira muri byose twavuze, ni ukwitoza kubaho ubuzima butuma Imana yishimira kuturema.

Twirinde ubuzima bubabaza Imana Benedata, niba inyamaswa zitagira ubwenge zibaho gutyo, twebwe twabaho neza kuzirusha kuko dufite ubwenge tukagira n’Umwuka Wera.

Komeza ubane natwe ntuzicuza. Yesu aguhe umugisha.

[email protected]