Ese byari bikwiye ko Mose yica Umunyegiputa?

Mu gitabo cyo kuva 2 :1-10 hatubwirako Mose yavutse ku babyeyi b’Abaheburayo babaga mu gihugu cya Egiputa. Muri icyo gihe Farawo yari yarategetse ko umwana w’umuhungu mu baheburayo uvutse agomba kwicwa. Hanyuma Abanyegiputa bari baragize abacakara Abaheburayo bakabakoresha imirimo ivunanye. Igihe cyarageze Imana isaba Mose ko ajya gucungura ubwoko bw’abisirayeli. Mu urworugendo Mose umuntu w’Imana yishe umunyegiputa mu gihe yari amusanze agirira nabi mwenewabo w’Umuheburayo.( kuva 2:11-12)

Mose yari Umuheburayo wavukiye mu buzima butari bworoshye Abisirayeli bari barimo muri Egiputa. Ababyeyi be bagerageje kumubohera akato gakoze mu ntamyi bamuhisha ku nkombe y’uruzi, ubwo umukobwa wa Farawo yamubonaga yamujyanye iwe amwita izina rya Mose, kandi yakuranye na mama we umubyara kuko ariwe wamureze.

“Umukobwa wa Farawo aramusubiza ati’Nuko genda umunzanire’.Umukobwa aragenda, ahamagara nyina w’uwo mwana”(Kuva2:8) .

Igihe yari amaze gukura, yagiye kureba benewabo abona ubuzima babayemo nibwo yishe Umunyegiputa warenganyaga benewabo.
“Icyo gihe ,Mose amaze gukura asanga bene wabo abona uburetwa barimo,bukeye abona Umunyegiputa akubita Umuheburayo muri bene wabo.Akebaguza impande zose abona nta wuhari,yica uwo uwo munyegiputa amuhisha mu musenyi.(Kuva2:11-12).

Ese byari bikwiye ko Mose yica Umunyegiputa ?

Bibiliya igaragazako Mose yishe umuntu nyuma yo kurebareba hirya no hino hanyuma akamuhisha mu musenyi. Ese kuki yakoze atyo?

Mose yakuranye na nyina ,yaraziko ari Umuheburayo.Yagiye muri benewabo abona uko bababazwa.Abahanga benshi bavugako Mose yarazi ko yahamagariwe kuzacungura Abisirayeli. Abandi bahanga bemezako yari arakajwe n’ukuntu Abanyegiputa bakandamizaga benewabo b’Abaheburayo.

“Ariko amaze imyaka mirongo ine avutse,yigira inama mu mutima we kugenderera bene wabo,ari bo bana ba Isirayeli.Abonye umuntu urengana aramutabara,ahorera urengana akubita Umunyegiputa.Yibwiraga yuko bene wabo bamenya ko Imana ibakirisha ukuboko kwe, ariko ntibabibimenya.(Ibyk. 7:23-25)

Ese niki twakwigira kuri ibi?

Nshuti , Mose yarazi mu mutima we ko Imana izamukoresha agacungura ubwoko bwa Isirayeli.Yarazi neza ko afite umuhamagaro wo kuzakura abantu b’Imana mu bucakara bakaba mu mudendezo.Ikibazo ni uko atabikoze muri gahunda y’Imana ahubwo akabikora ubwe ubwo yicaga Umunyegiputa.

Muri iyi minsi abenshi muri twe bameze gutyo. Abantu baziko bafite imihamagaro n’icyo Imana ibashakaho ariko aho gutegereza ko Imana ibaha amabwiriza yuko bakora ibyo ishaka mu nzira yayo, ahubwo bahitamo gukora ibyo bishakiye binyuranije n’uko Imana ibishaka.

Bakristo , Ntidushobora gukora iby’Imana ishaka dukoresheje imbaraga zacu, kuko bituzanira ibibazo byinshi kandi byatumye na Mose ahunga imyaka mirongo ine nyuma yo kwica Umunyegiputa, ahubwo dukore ibyo idutegetse kuko nibyo bizatuma tubona imigisha yayo.

[email protected] agakiza.org