Ese Abayebusi bari bantu ki?

Muri iyi nyandiko uzagenda urushaho gusobanukirwa neza ijambo ry’Imana aho uzarushaho no kumenya amoko yose y’abanyamahanga avugwa muri Bibiliya

Uyu munsi turahera ku bwoko bwitwaga Abayebusi

Igihe Imana yasezeranyaga Abrahamu kuzaha urubyaro rwe igihugu, Bibilia igaragaza ko cyari gituwe n’amoko menshi, harimo n’Abayebusi (Itang 15:18–21). Mbese baba bari bantu ki kandi inkomoko yabo ni iyihe?

Mbese abayebusi bari bantu ki kandi bakomotse he?

Ukurikije uko amahanga yagiye abaho nkuko tubibona mu itangiriro 10, Abayebusi bakomoka ku muhungu wa Nowa witwaga Hamu ku muhungu we na we witwaga Canaan ubwo bakaba ari abuzukuru ba Hamu n’abuzukuruza ba Nowa. Abayebusi bari bamwe mu bwoko bw’Abamori bagiweho n’umujinya w’Imana kubera gukiranirwa kwabo (Itang 15:16).

Imana igaragaza ibyaha byabo mu (guteg 20:18). Bishobora kuba byarimo no gutamba ibitambo bo kunyuza abana babo mu muriro niyo mpamvu Imana yabwiye Abisiraherikurimbura ubwoko bw’Abamori bwose igihe bageraga i Canaan. Abisiraheri kandi bari barabujijwe n’Imana gushyingiranwa na bo kugira ngo Abayebusi batazabanduza ibizira bakoraga.

Abayebusi babaga mu gihugu cy’imisozi, nk’i Yerusalemu nk’umwe mu mijyi yabo y’ingenzi (kubara 13:29; abacamanza 19:10–11). Izina ry’Abayebusi bari i Yerusalemu barikomoraga kuri “Jebus”, kandi hakomeje kwitwa gutyo kugeza ku gihe cy’umwami Dawidi

Mu gihe cya Yosuwa, umwami w’Abayebusi Adonisedeki (Adoni-zedek) afatanije n’abandi bami bane b’abamori barwanirije Abisiraheri i Gibeyoni (Joshua 10:5), ariko yaje gutsindanwa hamwe na bagenzi be bimuviramo no gupfa.

Nyuma, Abayebusi baje kwifatanya na Yabini umwami wa Hasori kurwanya Abisiraheri ariko nabwo batsindirwa imbere y’ingabo z’Abisiraheri (Yosuwa 11:3). Hanyuma y’uko gutsindwa kose ariko, Abayebusi bakomeje kuba mu gihugu cy’imisozi miremire hafi ya Yerusalemu mu bihe bitandukanye. Mu gihe cy’abacamanza, Abisrael bamwe batangiye gushyingirana n’Abayebusi, bibakongereza umujinya w’Imana kuri bo ibahaana mu maboko y’abanzi babo (Abacamanza 3:5).

Dawidi amaze kuba umwami wa Israel, yateye abayebusi b’i Yerusalemu (2 Samweri 5:6) yigarurira uwo mujyi ari naho haje kuba umurwa wa Dawidi. Dawidi aza no kugirana n’abayebusi basigaye isezerano ry’amahoro, kubera ko yaguze na Arauna w’umuyebusi isambu yo kubakamo igicaniro (2 Samweri 24:18–25). Kuva ubwo Abayebusi baba abagaragu ba Israel ndetse bari bamwe mu bo umwami Salomo yakoreshaga yubaka urusengero, inzu ye bwite ndetse n’indi mirimo.

Nubwo bari bemerewe kubana n’abisrael, Abayebusi n’abandi bamori bakomeje kugira imibereho yabo y’umwihariko kandi bakomeje kubera abisrael umutego. Igihe Ezra yari ayoboye amateraniro yo kugarura ububyutse mu bayuda bavuye mu bunyage i Babuloni yahuye n’ikibazo cy’abisrael bivanze n’abanyamahanga harimo abayebusi n’andi moko barabyarana (Ezra 9:1). Ezra yategetse abagabo b’abisrael kwihana ibyaha byabo kandi bakirukana abagore b’abanyamahanga bashatse bityo uburakari bw’Imana bukabavaho.

Nyuma y’aho, Abayebusi baje kwibagirana mu mateka; bishoboka ko bivanze n’andi moko y’abanyamahanga babaga muri Israel.

By BYIRINGIRO Jean Dominique