Dukwiye kwifuza kuba imifuka mishya isukwamo vino idasembuye

“ Nta wutera ikiremo cy’igitambaro gishya ku mwenda ushaje kuko icyo kiremo cyaca umwenda, umwenge ukarushaho kuba mugari. Kandi nta wusuka vino y’umutobe mu mifuka y’impu ishaje, uwagira atyo iyo mifuka yaturika, vino igasandara hasi imifuka ikononekara. Ahubwo vino y’umutobe isukwa mu mifuka mishya, byombi bikarama.”(Matayo9:16-17)

Umwami Yesu yavuze nta wa suka vino y’umutobe mu mifuka ishaje kuko yasandara ikononekara. Ibi bisobanuyeko nta muntu ufite imyumvire ya kera/ ibitekerezo bishaje n’ubwo byaba byibanze ku mahame ya bibiliya ushobora guhangana n’ibitekerezo bishya bihishuriwe mu ijambo ry’Imana. Ibi nibyo byabaye ku b’Abafarisayo.

Abafarisayo bari abayobozi b’idini mu gihe cya Yesu. Basomaga ibyanditswe, bakiga amategeko y’Imana , bakayigisha n’ abantu. Ariko nibo bafashe inyigisho za Yesu nk’izubupfu, zidashimishije ndetse zitari izo kwizerwa.

Intumwa zo zabashishe kwakira inyigisho ze. Kuki babishoboye? Ni ukuberako bari imifuka mishya yo gushyiramo vino. Abafarisayo bari bafite umuzingo w’amategeko araho gusa ku buryo nta muntu wagombaga kuyica ngo arenge ku byanditswe. Aba bantu bari barayobye. Intumwa zo n’ubwo zitari zarize nka bo , byihuse bakurikiye Yesu bumvira n’ijambo rye.

Niba dushaka kugira ubushobozi bwo kwakira inyigisho za Yesu, dukwiye guhinduka imifuka mishya isukwamo vino. Niba dushaka kugira ubushobozi no kwakira ihishurirwa riturutse mu ijambo ry’Imana, dukwiye guhinduka imifuka mishya. Imifuka mishya ya vino ihwanye no kugira ubushake bwo kumvira ibintu bishya bivuye ku Mana.

Ese urashaka kuba umufuka mushya ? niba ubyifuza, ibi ni ibintu ukwiriye gukora:

Abantu bakomeje kuba imifuka ishaje kuko bagikunze vino ishaje. Bishimira ibyo bamenyereye. Ntibashobora gusiga ibibashimisha , ntibagira ubushake bwo gusiga ibyo bibashimishije ngo bizere ibintu bikoreka binyuze mu kwizera. Umwami Yesu ubwe yavuzeko imifuka ishaje ikomeza kuba gutyo kuko batararikira imishya.

“Kandi nta muntu wanyoye vino ihiye washaka idahiye, kuko agira ngo ‘Ihiye ni yo nziza. ” (Luka5:39)

Dukwiye kureka kureba inyuma ngo tugereranye ibya kera n’ibishya:

“Ariko Yesu aramubwira ati “Nta muntu ufashe isuka ureba inyuma, ukwiriye ubwami bw’Imana.”(Luka9:62)

Ese niki dukwiriye gukora?

Niba dushaka kuba imifuka mishya ijyamo vino idahiye, dukwiye kwibagirwa ibya kera.

“Ibya kera ntimubyibuke, kandi ibyashize mwe kubyitaho. Dore ngiye gukora ikintu gishya, ubu ko kigiye kwaduka ntimuzakimenya? Nzaharura inzira mu butayu, ntembeshe imigezi mu kidaturwa.”(Yesaya43:18-19)

Dukwiye kureka ibyo twari tumenyereye ahubwo tukifuza kuba imifuka mishya yumvira ijambo ry’Imana kandi tugaharanira kuzinjira mu bwami bw’Imana.

Sophie @agakiza.org