Dore uburyo abakristo bafasha satani mu bikorwa bye

Abakristo bahawe amahirwe akomeye yo guhagararira Imana ku batayizi. Niyo mpamvu bakwiye kugerageza kugera kukigero gishyitse cyo gusa na Kristo, kugirango n’abatizera bahereho bizera kubw’ishusho ya Kristo bababonana.

Abakristo bamwe, bashobora kuba bazi cyangwa batabizi ko aho gukora ibintu Imana ishaka ko bakora, ahubwo bakora imirimo ya satani. Twese twahamagariwe gukora umurimo w’Imana mu ruzabibu rwe ariko birababaje kubona abenshi muri twe bavuga ko bakurikiye, bakanubaha Kristo aribo bakora imirimo ya satani.

Ariko se koko ni gute abakristo bakora imirimo ya satani ? Aha hari uburyo abakristo bakora ibikorwa bya satani:

Gutuka , gushinja amakosa, no gusebanya: Birashoboka ko abenshi mu bakristo bashinja bagenzi babo b’abakristo ibinyoma , bakabatuka no kubasebya mu ruhame . Ibyahishuwe 12:10 hatubwirako satani umurezi wa benedata , yahoraga abarega umunsi nijoro imbere y’Imana . Igihe turega benedata tubashinja ibinyoma, tubatuka, tubahora ibyaha bakoze ndetse Imana yarangije kubabarira ,ese nituba dukora umurimo wa satani?

Iyo umukristo akwirakwiza ibihuha atuka abandi, avuga nabi bene se bo mu itorero, aba afasha satani mu bikorwa bye byo kurega abana b’Imana ngo bagirweho n’urubanza rubaciraho iteka. Ndetse n’abashumba bakora ibi, iyo biremye amatsinda bagasebya andi matorero, bagenzi babo, n’abavugabutumwa baba bafashije umurezi satani kandi ibi ntibikwiriye abana b’Imana.

Kwigisha ubutumwa bupfuye: Umwami Yesu yabwiye Petero ibyerekeye itorero rye: “Nanjye ndakubwira nti ‘Uri Petero, kandi nzubaka Itorero ryanjye kuri urwo rutare, kandi amarembo y’ikuzimu ntazarishobora.’’(Matayo16:18)

Tugendeye kuri uyu murongo , tuzi nezako umutware w’umwijima akora ibishoboka byose ngo asenye itorero. Ibi hari abakristo babizi n’abatabizi ariko satani agerageza kuyobya intekerezo zabo agakora n’ibikorwa bitandukanye ajamije guhinyura itorero rya Kristo. Ibi biba iyo bigisha inyigisho zinyuranyije n’ijambo ry’Imana ahubwo bakagendera kubitekerezo byabo n’inzaduka z’iyi minsi.

Gushinja abandi ibyaha :
Ni igikorwa kigayitse igihe umukristo ashinja icyaha mugenzi we, kuko aba ariho umwuka wa satani . Bibiliya igira iti: “Mwirinde ibisindisha mube maso, kuko umurezi wanyu Satani azerera nk’intare yivuga ashaka uwo aconshomera”(1Petero5:8). Satani ahora ashaka iteka abakora icyaha, ariko ntidukwiye kumufasha muri iyo migambi ye.

Iyo dukoreye ibi abakristo bagenzi bacu, dukomeretsa amarangamutima yabo bityo tukaba twabatera gucumura no gukora icyaha tukaba dufasha satani kumukorera umurimo we ariko ntitugomba gukora gutyo. Abakristo benshi ntibamenya ibi, ariko ikintu kirusha ibinti kuba kibi dushobora gukora ni ugufasha satani mubikorwa bye tugatera abandi kwanga no kureka Kristo binyuze mu bikorwa no mu magambo yacu.

Niba ubuzima tubayemo bunyuranya nibyo twigisha cyangwa tuvuga nta bunyangamugayo buzatubaho. Ahubwo ni igihe cyiza kuri twe cyo gusoma bibiliya zacu tukubaha icyo ivuga, ni umwanya wo gusenga no gushaka Imana, ni n’umwanya mwiza kandi wo gukora ibihesha Imana icyubahiro. Kandi n’iba waragaragaweho na bimwe mu bikorwa bya satani ku mukristo mugenzi wawe, ukwiye kubyihana kandi ukagerageza kubaho ukiranuka imbere y’Imana.

Sophie @agakiza.org