Dore inshingano buri mukristo akwiye kuzuza

“Nuko Yesu arabegera avugana na bo ati “Nahawe ubutware bwose mu ijuru no mu isi. Nuko mugende muhindure abantu bo mu mahanga yose abigishwa, mubabatiza mu izina rya Data wa twese n’Umwana n’Umwuka Wera, mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y’isi.”( Matayo 28:18-20)

Buri mukristo wese usoma bibiliya azi umurimo ukomeye yashinzwe. Buri muntu azi umurimo agomba gukora, aziko Umwami Yesu ashaka ko abamwizeye bagenda bakajya kubwiriza ubutumwa bwiza abantu bose, bakabahindura abigishwa, bakabigisha ibyo yabigishije biri mu ijambo ry’Imana.

Kugeza ubu abakristo bagomba kumenyako hari ibintu bakwiye kuzirikana mu bitekerezo byabo, mu mitima ndetse bagaha igihe cyo kujya kubwiriza abantu ubutumwa bwiza bukiza.

Ibi ni bimwe mu bintu bakwiye kumenya :

Ubutumwa bwahawe abantu bose : Buri mukristo aziko Imana ishaka ko abamukurikiye bajya kubwiriza ubutumwa bwiza, abenshi batekerezako kubwiriza ari iby’ababihamagariwe , babwiriza buri gihe cyangwa abafite impano yo kubwiriza. Ariko sibyo, kuko Umwami Yesu yatanze iri tegeko bwambere ku ntumwa ze kandi abenshi muri bo ntibari barize bihambaye.

Abenshi muri bo nka Petero bari abarobyi batigeze bafata igihe ngo basome ibitabo n’izindi nyandiko zitandukanye ngo basobanukirwe , ahubwo bamaraga igihe cyabo mu nyanja baroba .Kuva ubwo umwami yabahaye itegeko ryo kwigisha bose ubutumwa bwiza, kandi impamvu yabahaye izo nshingano ni uko bari baramwizeye kandi baramukurikiye.

Buri muntu wizera umwami Yesu Kristo akwiye kumenya ko ashaka ko tugenda tukigisha ubutumwa bwiza tugahindura abantu abigishwa be.

Kwigisha ubutumwa bwiza bikwiye kuba intego mu buzima bwawe : Ikindi kintu abenshi muri twe badasobanukiwe ni uko kwigisha ubutumwa bwiza no guhindura abantu abigishwa bidakwiye guharirwa idini gusa cyangwa ngo bikorwe hashakwa inyungu.
Abakristo bakwiye kumenya ko ari inshingano ya buri wese mu buzima butandukanye babamo .
Abakristo bakora imishinga itandukanye bakwiye kumenyako Imana yayibahaye kugirango bateze imbere ubwami bw’Imana.

Abaririmbyi b’abakristo n’abandi bakristo baririmba bagomba gufata iya mbere bakamamaza ubwami bw’Imana, kandi kumenyekana kwabo kukaba kujyana ubutumwa bwiza kuri bose.

Abakristo b’abavugabutumwa bakwiye kumenya ko Imana yabahamagariye kuyikorera igihe cyose bigisha ubutumwa bwiza , banashishikariza abandi gukora uwo murimo, atari ukubwiriza ibibajemo cyangwa ubutumwa barose mu nzozi.

Buri mukristo akwiye kwita kugutanga ubutumwa ikaba intego y’ubuzima, amahirwe abonetse yose bakayakoresha , bakabwiriza mu rugo, aho bakorera, ku ishuri, inshuti n’abagenzi bacu bakamenya Imana.

Tuzagira ibyishimo : Abamenye Yesu bakwiye kumenya ko kuzuza inshingano zabo bizatuma banezerwa. Ku iherezo ry’ubuzima bwacu, igihe tuzahura n’Imana tuzerekana ibyo twakoze mu buzima twabayemo mu isi.

Niba turi abakristo, Imana izadushimira uko twakoze iby’ishaka ndetse n’umuhati twagize tuzana abantu bayo kuri Yo, kandi Umwami yesu yadusezeranije kuzahabwa ingororano nitumwizera, tugakora ibiri mu bushake bwe , aduha n’isezerano ryo kubana natwe iminsi yose ndetse tukazahabwa n’ubugingo buhoraho.

Sophie @agakiza.org