Dore indangagaciro zikwiye kuranga umugore mwiza

Niba wubatse urugo, ibaze niba uri umugore mwiza ubereye umugabo. Niba ukiri ingaragu, ibaze niba uzaba umugore mwiza . Niba ubona ushidikanya, bibiliya izakuyobora inzira ya gushoboza kuba umugore w’umukristo mwiza w’uyu munsi ndetse n’igihe kizaza.

Ibi ni bimwe mu biranga umugore mwiza :

Umugore mwiza aba umwunganizi

Ushobora kuba warumvise bavuga ko nyuma y’umugabo ushoboye hagomba kuba umugore ushoboye. Ni ingenzi cyane k’ umugore gushyigikira umugabo we akamukomeza mu bibazo no mu ntege nke afite. Abagore batabasha gukomeza abagabo babo, ahubwo bagahinyura ibyo bakeneye bashobora gusenya urugo.

Ibi ntibisobanuye ko abagore b’abakristo bagomba guhora bemera ibyo abagabo babo bifuza byose, ntibisobanuyeko abagore bagomba kuba iteka ku mugongo w’umugabo. Ahubwo niba umugabo afite icyo kuvuga , umugore mwiza akwiye kwerekana ikinyabupfura akamutega amatwi akagerageza gufasha ibyo umugabo we akeneye uko ashoboye kose.

Byongeye kandi, umugore mwiza agomba guhora atera umugabo we akanyamugabo akamukomeza.

Mu Abefeso4:29 hagira hati:
“Ijambo ryose riteye isoni ntirigaturuke mu kanwa kanyu, ahubwo uko mubonye uburyo mujye muvuga iryiza ryose ryo gukomeza abandi, kugira ngo riheshe abaryumvise umugisha.”( Abefeso4:29)

Kunyuranya n’ibi bishobora gusenya umubano wanyu. Niba umugore ahora aca intege umugabo we ibi bizatera umugabo kumva nta kamaro agifite kandi ntacyo avuze. Guca intege bigaragarira mu buryo butandukanye nko guhora uhinyura ibikorwa by’umugabo cyangwa ibitekerezo bye. Ibi bizatuma umunsi wira umugabo yumva atifuza kugaragara imbere y’umugore we, aho kumva bimuteye ishema kuba hamwe na we.

Umugore mwiza aba umwizerwa

Mu mubano , hagomba kugaragara kwizerana kuzuye umwe ku wundi.
“Umutima w’umugabo we uhora umwiringira, Kandi ntazabura kunguka.”(Imigani31:11). Ibi bivuzeko niba umugabo yiringira umugore we, uyu mugabo azagira ubuzima bunyuzwe.

Umugore mwiza akwiye guhora yitonda,yubaha kandi agahora yihesha agaciro. Aharanira ukuri akakurwanira. Agomba kuba umwizerwa ku mugabo we, akita ku bana be, agafasha umugabo we gufata ibyemezo by’ingirakamaro. Agahora ahamye mubyo akora. Umugore w’umukristo umeze nk’uyu, nta gushidikanya azahaza ubuzima bw’umugabo we mu buryo ubwo ari bwo bwose.

Hakwiye kutabaho ubusumbane hagati y’umugabo n’umugore , bakwiye kuzuzanya, kandi bakwiye kwitanaho nk’abashakanye. Nibigenda gutya buri umwe azaba afite ikintu kihariye aha mugenzi we adafite.

Umugore mwiza iteka arubaha

Niba urukundo ari ingenzi mu mibanire, hakwiye kubaho kubaha kugirango habeho gushyikirana. Umugore n’umugabo bagomba kugira imyumvire imwe yo kubahana umwe ku wundi. Ibi ntibikwiye kugibwaho impaka. Mu by’ukuri Imana yategetse ko abagore bagomba kubaha abagabo babo.

“Nuko namwe umuntu wese akunde umugore we nk’uko yikunda, kugira ngo umugore na we abone uko yubaha umugabo we.”(Abefeso5:33)

Nta mugabo uzifuza kubaho ubuzima abana n’umuntu udashobora kumwubaha. Nta mugabo wifuza kubana n’umugore utamuha agaciro. Kugira ngo umubano ukomere , kubaha bigomba kuba urufatiro. Zirikana ko imwe mu ntego y’urugo ari uko buri muntu umwe abera mugenzi we mwiza.

Urugo rwubakiye kuri Kristo ruba rwubakiye ku rukundo, icyizere, kubaha, no kwizera. Nta muntu wavuze ko kubana ari umurimo woroshye, ariko iyo wubatse urufatiro rukomeye, Imana ikaba hagati yanyu, muzagira urugo rwiza.

Sophie @Agakiza.org